Cef Bezos: Süni intellekt işçiləri əvəzləməyəcək, işçi çatışmazlığı yaradacaq

"Amazon"un qurucusu Cef Bezos süni intellektin işçi qüvvəsi çatışmazlığı formalaşdıracağını, lakin kütləvi işsizliyə səbəb olmayacağını qeyd edərək, bu texnologiyanın insan əməyini əvəzləyəcəyinə dair artan narahatlıqları rədd edib.

Parisdə keçirilən "VivaTech" konfransında çıxış edən Bezos süni intellektin insanları "ixtisara salacağı" proqnozları ilə razılaşmayıb. O, bunun əvəzinə texnologiyanın yeni iqtisadi aktivliyə təkan verəcəyini və əmək bazarına olan tələbatı artıracağını müdafiə edib.

“Bu mövqe ilə tamamilə razı deyiləm. Hesab edirəm ki, süni intellekt, əksinə, işçi qüvvəsi qıtlığı yaradacaq”, — deyə o, qeyd edib.

Süni intellektlə bağlı ixtisarlar

Bezosun bu açıqlamaları texnologiya nəhənglərinin süni intellekt sistemlərinə yatırımları artırdığı, digər tərəfdən isə kütləvi iş ixtisarlarına getdiyi bir dövrə təsadüf edir.

“Challenger, Gray & Christmas” şirkətinin hesabatına görə, ABŞ-də fəaliyyət göstərən işəgötürənlər may ayında 97 min iş yerinin ixtisar ediləcəyini açıqlayıblar. Bu ixtisarların təxminən 40 faizi süni intellektə keçidlə bağlı yenidənqurma işləri ilə əlaqələndirilir.

Ayrıca keçirilən “Reuters/Ipsos” sorğusu isə əhali arasında avtomatlaşdırma ilə bağlı narahatlığın artdığını göstərir. Belə ki, amerikalıların təxminən yarısı süni intellektin onları və ya ailə üzvlərindən birini işsiz qoya biləcəyini düşünür.

Son illərdə “Amazon” da daxil olmaqla bir çox aparıcı şirkətlər on minlərlə korporativ ştatı ixtisar edib. Şirkət rəhbərləri bunu süni intellekt alətləri və avtomatlaşdırma sayəsində səmərəliliyin artması ilə izah edirlər.

Cef Bezos iddia edir ki, bəşəriyyət iş yerlərinin çatışmazlığından deyil, yeni fəaliyyət sahələrinin yaranmasına mane olan amillərdən əziyyət çəkir.

O, süni intellektin həmin maneələri aradan qaldıracağını bildirib. İş adamının sözlərinə görə, bu texnologiya məhsuldarlığı artıracaq və iqtisadiyyatın müxtəlif sahələrində yeni tələbat yaradaraq sonsuz imkanlar açacaq.

Milyarderin bu sözləri süni intellektə qarşı etirazların artdığı vaxta təsadüf edir. İşçi qrupları, yaradıcı sahələr və əmək bazarına yeni daxil olan gənclər iş yerlərinin itirilməsi və əməkhaqqı təzyiqi ilə bağlı narahatlıqlarını ifadə edirlər.

“Blue Origin” kosmik şirkəti

Cef Bezos bu çıxışından özünün “Blue Origin” kosmik şirkətini diqqət mərkəzinə gətirmək üçün də istifadə edib. O bildirib ki, kosmik texnologiyaların inkişafı gələcəkdə ağır sənayenin Yer kürəsindən kənara köçürülməsinə imkan verə bilər.

İş adamının sözlərinə görə, kosmik səyahətlərin daha ucuz və etibarlı olması fonunda asteroid və Ay resurslarından istifadə planetimiz üzərindəki ekoloji təzyiqi azalda bilər.

“Blue Origin”in baş icraçı direktoru Devid Limp də şirkətin ağır raket proqramı üzərində işləri davam etdirdiyini və Floridadakı “New Glenn” start meydançasında baş vermiş partlayışdan sonra yenidənqurma işlərinin getdiyini təsdiqləyib.

Teqlər

Cef Bezos süni intellekt işçi çatışmazlığı Amazon Avtomatlaşdırma Əmək bazarı Blue Origin Gələcəyin iqtisadiyyatı