“AnewZ Səhər Xülasəsi” — 10 iyul 2026

Məlumatlı olmaq üçün gününüzə “AnewZ Səhər Xülasəsi” ilə başlayın. İyulun 10-u üçün bilməli olduğunuz əsas xəbərləri təqdim edirik.

İran ABŞ-nin hərbi obyektlərini vurub, Xameneinin dəfn mərasimi keçirilib

ABŞ-nin İran ərazisindəki hədəflərə zərbələr endirməsindən sonra Tehran Körfəz ölkələrində yerləşən ABŞ hərbi obyektlərinə hücumlarla cavab verib. Qarşılıqlı zərbələr qüvvədə olan atəşkəs ətrafındakı gərginliyi daha da artırıb.
İran Küveyt, Qətər və Bəhreyndəki ABŞ obyektlərini hədəfə aldığını açıqlayıb. Region ölkələrinin rəsmiləri isə hücumlar zamanı raket və PUA-nın zərərsizləşdirildiyini bildiriblər.
Gərginliyin yenidən artdığı bir vaxtda İranın ali rəhbəri Ayətullah Əli Xameneinin dəfn mərasimi keçirilib. Xamenei ABŞ və İsrailin bundan əvvəl həyata keçirdiyi birgə zərbə nəticəsində öldürülüb.

Sudan ordusu ABŞ-nin sülh planına dəstək üçün qiyamçıların tam geri çəkilməsini tələb edir

Sudan ordusu bildirib ki, qiyamçı Çevik Dəstək Qüvvələrinin (RSF) münaqişə başlayandan bəri nəzarətə götürdüyü bütün şəhərlərdən geri çəkiləcəyi halda ABŞ-nin sülh təklifini tam dəstəkləyəcək.
ABŞ-nin təklif etdiyi plan 90 günlük humanitar atəşkəsin tətbiqini, daha sonra isə daimi atəşkəsin əldə olunmasını ehtiva edir. Sonrakı mərhələdə hakimiyyətin mülki şəxslərə təhvil verilməsi ilə bağlı danışıqların keçirilməsi nəzərdə tutulur.
“Reuters” agentliyinin nəzərdən keçirdiyi sənədlərə əsasən, Sudan ordusu təklifin əksər hissələrini qəbul edib, lakin RSF-nin yalnız məhdud sayda ərazidən geri çəkilməsi ilə bağlı müddəanı rədd edib.

“Bavi” tayfunu Yaponiya və Tayvanda leysanlara səbəb ola bilər

“Bavi” tayfunu cümə günü Yaponiyanın Sakisima adalarına yaxınlaşıb. Bölgədə güclü külək, leysan yağışları və mümkün daşqınlarla bağlı xəbərdarlıq edilib.
Sakinlər tayfuna hazırlaşarkən, aviaşirkətlər uçuşları ləğv edib. Rəsmilər isə əhalini ehtiyatlı olmağa çağırıblar.
Tayvanda da güclü yağışlara hazırlıq çərçivəsində mindən çox insan təxliyə edilib, minlərlə hərbçi isə hazır vəziyyətə gətirilib.
Proqnozlara görə, “Bavi” şənbə günü axşam saatlarında Çinin şərqindəki Vençjou şəhəri yaxınlığında sahilə çatacaq.

İspaniyada yanğınlar 12 nəfərin həyatına son qoyub

İspaniyanın cənubundakı Əndəlüs  bölgəsində baş verən meşə yanğınları nəticəsində azı 12 nəfər həlak olub. Yanğınsöndürənlər alovun nəzarətə götürülməsi istiqamətində səylərini davam etdirirlər.
Rəsmi məlumata görə, bunlar bölgə tarixində ən dağıdıcı meşə yanğınlarıdır. Minlərlə sakin təxliyə olunub, bir neçə nəfər isə xəstəxanaya yerləşdirilib.
Yanğınlar İspaniyada davam edən isti hava şəraitində baş verib. Barselonada indiyədək qeydə alınmış ən yüksək temperatur müşahidə olunub.
Ekstremal istilər və quraq hava şəraiti Cənubi Avropada meşə yanğınları riskini artırıb. Bu səbəbdən İspaniya hökuməti hadisə bölgəsinə əlavə qüvvələr göndərib.

Kopyalandı