canlı İran Körfəz ölkələrindəki hədəflərə hücum edib Hörmüzü bağladığını açıqladıqdan sonra ABŞ ona yeni zərbələr endirib

Tramp: Hörmüz boğazı açıqdır

ABŞ Prezidenti Donald Tramp NBC telekanalına müsahibəsində Hörmüz boğazının açıq olduğunu bildirib.

İran Qətərin keçmiş əmirinin vəfatı ilə bağlı başsağlığı verib

Rəsmi Tehranın Əl-Udeyd aviabazası istiqaəmətində ballistik raketlər buraxmasından cəmi bir neçə saat sonra İran Qətərin keçmiş əmiri Şeyx Həməd bin Xəlifə Əl Taninin vəfatı ilə bağlı başsağlığı verib.

İranın xarici işlər naziri Abbas Əraqçı “X” sosial şəbəkəsində yazıb: “Şeyx Həməd bin Xəlifə Əl Taninin vəfatını dərin kədər və hüznlə qarşılayırıq”.

O əlavə edib:“Əmir Şeyx Təmim bin Həməd Əl Taniyə, hörmətli Əl Tani ailəsinə və qardaş Qətər xalqına ən səmimi başsağlığımızı çatdırırıq”.

ABŞ ordusu: Hörmüz boğazı qanuni hərəkət edən gəmilər üçün açıqdır

İran Hörmüz boğazını bağladığını açıqlasa da, boğaz beynəlxalq su yolundan qanuni şəkildə keçən bütün gəmilər üçün açıq qalır. Bu barədə ABŞ ordusu məlumat verib.

Bildirilib ki, ABŞ qüvvələri strateji əhəmiyyətli bu dəniz marşrutu üzrə sərbəst gəmiçiliyi təmin etmək üçün mövqelərini tutub və hazır vəziyyətdədir.

Oman ərazisinə hücumlarla bağlı İran səfirini XİN-ə çağırıb

Oman ərazisində həyata keçirilən hücumlarla bağlı İrana etirazını bildirib. Bu barədə ölkənin Xarici İşlər Nazirliyi məlumat yayıb. Etirazın çatdırılması üçün İranın səfiri nazirliyə çağırılıb.

Hindistana məxsus gəminin 23 ekipaj üzvü xilas edilib, bir nəfərin axtarışları davam edir

Hindistana məxsus “GFS Galaxy” gəmisinin 23 ekipaj üzvü xilas edilib. Bu barədə Oman rəsmiləri məlumat verib. İtkin düşən bir ekipaj üzvünün axtarışı isə davam etdirilir.

ABŞ-İsrail zərbələri nəticəsində İran hərbçisi həlak olub

İyulun 12-də İrana endirilən ABŞ-İsrail zərbələri nəticəsində bir ordu zabitinin öldüyü bildirilib. Bu barədə İranın dövlət mediası məlumat yayıb.

İraqın baş naziri Vaşinqtona səfər edəcək

İraqın baş naziri Əli əl-Zaidi bazar ertəsi ABŞ rəsmiləri ilə danışıqlar aparmaq üçün Vaşinqtona səfər edəcək.

Səfər zamanı ABŞ şirkətlərinin İraqa daha geniş cəlb olunması, eləcə də ölkənin neft hasilatı imkanlarının artırılması məqsədilə neft-qaz sektorunda sazişlərin imzalanacağı gözlənilir.

Qətər: Hücumların davam etməsi regional gərginliyi daha da artırır

Qətər bildirib ki, hücumların davam etməsi regionda ciddi eskalasiya yaradır. Rəsmi Dohanın fikrincə, bu, həmçinin gərginliyin qarşısının alınması istiqamətində səyləri çətinləşdirir.

Qətər gəmilərə dənizə çıxmamağı tövsiyə edib

Qətər Daxili İşlər Nazirliyi bütün dəniz nəqliyyatı vasitələrinə və balıqçı qayıqlarına dənizə çıxışı dayandırmağı tövsiyə edib. Müvafiq bildiriş ictimai təhlükəsizliklə bağlı narahatlıqları əsas gətirərək verilib.

İran Hörmüz boğazına nəzarəti ələ keçirdiyini bildirib

İran rəsmisi Körfəz regionunda gərginliyin artdığı bir vaxtda ölkənin Hörmüz boğazına “nəzarəti ələ keçirdiyini” iddia edib.

İran parlamentinin Milli Təhlükəsizlik və Xarici Siyasət Komissiyasının sözçüsü İbrahim Rzayi X sosial şəbəkəsində yazıb:

“Biz Hörmüz boğazına güc yolu ilə nəzarəti ələ keçirmişik və bu nəzarəti gücümüzlə qoruyacağıq”.

Küveyt İranın hücumunu “təhlükəli eskalasiya” adlandırıb

Küveyt İranın ölkə ərazisinə hücumlarını pisləyərək bunu “təhlükəli eskalasiya” kimi qiymətləndirib.

Küveyt Xarici İşlər Nazirliyi zərbələrin regional təhlükəsizliyə ciddi təhdid yaratdığını bildirib.

Hindistan gəmisinə edilən hücumu pisləyib, bir vətəndaşı itkin düşüb

Hindistan Oman sahilləri yaxınlığında “GFS Galaxy” ticarət gəmisinə hücumu pisləyib.

Hindistan Xarici İşlər Nazirliyinin məlumatına görə, gəmidə olan 11 Hindistan vətəndaşından 10-u xilas edilib, bir nəfər isə itkin düşmüş hesab olunur.

Hindistan gərginliyin dərhal azaldılmasına çağırışını təkrarlayıb. Nazirlik ölkənin Omandakı səfirliyinin vəziyyəti yaxından izlədiyini bildirib.

İrandan atılan üç raket İordaniya ərazisinə düşüb

İrandan buraxılan üç raket İordaniya ərazisinə düşüb.

İordaniya ordusunun dövlət xəbər agentliyinə verdiyi məlumata görə, hadisə nəticəsində ölən və ya yaralanan olmayıb.

Dronlar Omanın Musandam bölgəsində yerləşən obyektlərə hücum edib 

Omanın Musandam inzibati bölgəsində yerləşən obyektlər dron hücumlarına məruz qalıb.

Dövlət xəbər agentliyi dağıntılar və mümkün itkilərlə bağlı ilkin məlumat verməyib.

Qətərdə qəlpələrin düşməsi nəticəsində üç nəfər yaralanıb

İranın hücumlarından sonra qəlpələrin düşməsi nəticəsində biri uşaq olmaqla üç nəfər yaralanıb.

Bu barədə Qətərin Daxili İşlər Nazirliyi məlumat yayıb.

İran Omanla danışıqlarda Hörmüz boğazında gəmiçiliyi müzakirə edib

İran Omanla danışıqlarda Hörmüz boğazında gəmiçiliyi müzakirə edib

İran Xarici İşlər Nazirliyi şənbə günü Omanla keçirilən danışıqların Hörmüz boğazından dəniz nəqliyyatı və gəmilərin hərəkətinin idarə olunması ilə bağlı razılaşmalara həsr edildiyini bildirib.

Danışıqlar strateji əhəmiyyət daşıyan su yolunda gərginliyin artdığı bir vaxtda aparılıb.

ABŞ üç gecə ərzində İranda 300-dən çox hədəfə zərbə endirib

ABŞ qüvvələri İrana qarşı üçüncü zərbə dalğasını başa çatdırıb.

ABŞ Mərkəzi Komandanlığının məlumatına görə, şənbə günü təxminən 140, son üç gecə ərzində isə ümumilikdə 300-dən çox hərbi hədəf vurulub.

Son zərbələr raket və dron mövqelərini, hərbi dəniz vasitələrini, sursat anbarlarını və rabitə şəbəkələrini hədəf alıb.

Hücumlar Kipr bayrağı altında üzən “M/V GFS Galaxy” konteyner gəmisinin Hörmüz boğazında vurulmasından sonra həyata keçirilib.

İran Qətərdəki ABŞ bazasını və Hörmüz boğazında ikinci gəmini vurduğunu bildirib

SEPAH hücum nəticəsində bazadakı qırıcı təyyarələrə texniki xidmət mərkəzinin, eləcə də komanda-idarəetmə obyektinin məhv edildiyini iddia edib.

Bu iddialar müstəqil mənbələr tərəfindən təsdiqlənməyib.

İran Omandakı ABŞ hərbi-dəniz dəstək obyektlərinə zərbə endirdiyini bildirib

İran İslam İnqilabı Keşikçiləri Korpusu Aerokosmik Qüvvələrinin Omanın Duqm limanında ABŞ təyyarədaşıyan gəmilərinə xidmət və yanacaq təmin edən platformalara genişmiqyaslı zərbə endirdiyini açıqlayıb.

SEPAH hücumun ABŞ hərbi-dəniz gəmilərinin logistika mərkəzlərini hədəf aldığını bildirib.

Qurum bunu ABŞ-nin “hərbi təcavüzü” adlandırdığı addımlara cavabın üçüncü mərhələsi kimi təqdim edib.