Yəməndə vəba yayılır, səhiyyə sistemi çətinliklə üzləşir

Yəməndə illərlə davam edən münaqişə səhiyyə sisteminin imkanlarını ciddi şəkildə məhdudlaşdırıb, ölkədə vəbanın yenidən yayılması isə yeni narahatlıqlar yaradıb.

Bu il Yəməndə minlərlə vəba halı qeydə alınıb. Tibb işçiləri xəbərdarlıq edirlər ki, vəziyyətin pisləşməsi xəstəliyin daha geniş yayılmasına səbəb ola bilər.

Ümumdünya Səhiyyə Təşkilatının məlumatına görə, 2026-cı ilin əvvəlindən təxminən 5 min vəba və kəskin ishala  yoluxma halı aşkarlanıb.Yeddi nəfər xəstəlikdən həyatını itirib.

Yoluxmaların böyük hissəsi aprelin sonlarından etibarən qeydə alınıb. Ən çox hal hökumətin nəzarətində olan ərazilərdə, o cümlədən Taiz vilayətində aşkarlanıb.

Artan müraciətlər xəstəxanaların yükünü artırır

Taizdəki Əl-Cümhuri xəstəxanasında su ilə yayılan xəstəliyin səbəb olduğu kəskin susuzlaşmadan əziyyət çəkərək xəstəxanaya daxil olan xəstələrin sayı artdığı üçün həkimlər və tibb bacıları gecə-gündüz çalışırlar.

Xəstələrdən biri 60 yaşlı Fatimə Qaiddir. O, xəstəliyin yaratdığı ağır vəziyyətdən danışıb:

"Əvvəl güclü ishal başladı. İki gün bu ağrıya dözdüm. Üçüncü gün şiddətli qusma başladı. İshal və qusma dayanmırdı."

“Bu, çox ağır xəstəlikdir. Hətta yata bilmirdim. Özümü ölürmüş kimi hiss edirdim. Yüksək qan təzyiqim və diabetim var. Buna görə vəziyyətimin daha da pisləşəcəyindən çox qorxurdum. Vəbaya yoluxduğumu öyrənəndə dəhşətə gəldim

Müharibə və yardım çatışmazlığı böhranı dərinləşdirir

Səhiyyə rəsmiləri bildirirlər ki, epidemiyanın yayılmasına on ildən artıq davam edən müharibənin ağır nəticələri səbəb olur. Beynəlxalq yardımın azalması və əsas xidmətlərin çökməsi də vəziyyəti daha da ağırlaşdırır.

“Ölkədə hazırda bir neçə xəstəlik yayılır. Vəba da onlardan biridir”, – Taiz vilayətinin səhiyyə rəsmisi bildirib.

“Vəbanın yayılması müharibə və son illərdə beynəlxalq maliyyə yardımının azalması ilə bağlıdır”.

Ümumdünya Səhiyyə Təşkilatının məlumatına görə, Yəmən vəbadan ən çox zərər çəkən ölkələrdən biridir. Ölkə şübhəli yoluxma hallarının sayına görə dünyada yeddinci yerdədir. Şərqi Aralıq dənizi regionunda isə Əfqanıstandan sonra ikinci yerdədir.

Zəruri xidmətlər ciddi təzyiq altındadı

BMT-nin səhiyyə qurumu bildirir ki, epidemiyanın yayılmasına su və sanitariya sistemlərinin zəifləməsi səbəb olur. Tibb işçiləri və ləvazimatların çatışmazlığı da vəziyyəti ağırlaşdırır. İllərlə davam edən münaqişə ölkənin səhiyyə sistemini böhran həddinə çatdırıb.

Bir çox ərazidə əhali təmiz içməli su ilə lazımi səviyyədə təmin olunmur. Tibb işçiləri xəbərdarlıq edirlər ki, bu şərait vəbanın yayılmasının qarşısının alınmasını çətinləşdirir. Nəticədə humanitar böhrandan əziyyət çəkən ailələrin vəziyyəti daha da ağırlaşır.

Teqlər

AnewZ Yəmən Vəba Yəməndə səhiyyə böhranı Ümumdünya Səhiyyə Təşkilatı Humanitar böhran Beynəlxalq yardım Təmiz içməli su