"AnewZ" səhər xülasəsi — 13 iyul 2026

Günə "AnewZ"un səhər xülasəsi ilə başlayın. Bu saata qədər bilməli olduğunuz ən son hadisələri əhatə edən əsas xəbərləri təqdim edirik.

1. ABŞ–İran münaqişəsi raket zərbələrinin intensivləşməsi fonunda kəskinləşir

ABŞ və İran qarşılıqlı olaraq yeni raket və dron hücumları həyata keçirib. Tehran Körfəz ölkələrindəki Amerika obyektlərini hədəfə alıb və Hörmüz boğazının bağlandığını elan edib.

Gərginliyin artması mühüm dəniz yolunun yenidən açılmasını və münaqişənin növbəti danışıqlar vasitəsilə başa çatdırılmasını nəzərdə tutan müvəqqəti razılaşmanın gələcəyi ilə bağlı şübhələri artırıb.

Dünya üzrə neft və qaz daşımalarının əhəmiyyətli hissəsinin keçdiyi bu strateji su yolunda vəziyyətin pisləşməsi qlobal enerji təchizatı ilə bağlı narahatlıqları daha da gücləndirib.

2. Qlobal media liderləri Azərbaycanın tarixi Şuşa şəhərində bir araya gəlir

54 ölkədən 160-a yaxın media rəhbəri, ekspert və rəsmi şəxs sülh quruculuğu, etimad və məsuliyyətli jurnalistika mövzularına həsr olunan IV Şuşa Qlobal Media Forumunda iştirak etmək üçün Azərbaycanın Şuşa şəhərində bir araya gəlir.

İki gün davam edəcək tədbirdə müasir medianın üzləşdiyi çağırışlar, o cümlədən dezinformasiya, süni intellekt və informasiya etibarlılığının gücləndirilməsi zərurəti müzakirə olunacaq.

Forum rəqəmsal transformasiya və jurnalistikanın gələcəyi ilə bağlı beynəlxalq müzakirə platforması kimi rolunu genişləndirməkdə davam edir.

3. Banqkokda pivəxanada baş verən yanğında 27 nəfər ölüb, təxliyə çıxışlarının qarşısı bağlanıb

Banqkokdakı “Rong Beer Na Lat Phrao” adlı pivəxanada baş verən güclü yanğın nəticəsində 27 nəfər ölüb, 63 nəfər yaralanıb. Zərərçəkənlərin çoxu binanı tərk etməyə çalışarkən tüstüdən zəhərləniblər.

Rəsmilər bildiriblər ki, fövqəladə çıxış yollarının qarşısının bağlanması təxliyəni çətinləşdirib. Çıxışlardan birinin qarşısında pivə yeşikləri, digərinin qarşısında isə masa olub. Bu zaman alov sürətlə bütün məkana yayılıb.

İlkin ehtimala görə, yanğına tavanda quraşdırılmış kondisionerdə yaranan qısaqapanma səbəb ola bilər. Hadisənin dəqiq səbəbinin müəyyənləşdirilməsi üçün araşdırma davam edir.

4. İyun istiləri zamanı Avropada normadan 10 min artıq ölüm qeydə alınıb

İyunun sonlarında Avropanı bürüyən isti hava dalğası zamanı 27 ölkədə normadan 10 mindən artıq çox ölüm halı qeydə alınıb. Ölənlərin 9 mindən çoxunun 65 və yuxarı yaşda olduğu bildirilir.

Səhiyyə mütəxəssislərinin fikrincə, qeyri-adi yüksək ölüm göstəricisinə, böyük ehtimalla, ekstremal istilər səbəb olub. COVID-19 dalğası kimi digər mühüm amillər müəyyən edilməyib.

Alimlər həmçinin rekord temperatur göstəricilərinin insan fəaliyyəti nəticəsində yaranan iqlim dəyişikliyi səbəbindən daha yüksək ehtimalla baş verdiyini bildiriblər.

5. İspaniyadakı meşə yanğınlarında ölənlərin sayı 13-ə çatıb

İspaniyanın Almeriya vilayətini əhatə edən dağıdıcı meşə yanğınları zamanı aldığı yanıq xəsarətləri nəticəsində 93 yaşlı britaniyalı qadın həyatını itirib. Bununla da ölənlərin sayı 13-ə çatıb.

Rəsmilərin məlumatına görə, yanğın 7 min hektardan çox ərazini əhatə edib. Daha 10 nəfər itkin düşmüş hesab olunur, qurbanların şəxsiyyətinin müəyyənləşdirilməsi üçün beynəlxalq səviyyədə iş aparılır.

Yanğın nəzarət altına alınsa da, rəsmilər İspaniyada yay boyunca meşə yanğınları riskinin yüksək qalacağını bildirərək əhalini ehtiyatlı olmağa çağırırlar.

Teqlər

Səhər səhər xülasəsi xəbərlər ABŞ–İran münaqişəsi IV Şuşa Qlobal Media Forumu yanğın anomal istilər Avropa