Sudan məhkəməsi Çevik Dəstək Qüvvələrinin liderini müharibə cinayətlərinə görə qiyabi ölüm cəzasına məhkum edib

Sudan məhkəməsi Çevik Dəstək Qüvvələrinin komandanı, Hemedti kimi tanınan Məhəmməd Həmdan Daqalonu və daha 15 nəfəri Qərbi Darfurda törədilmiş cinayətlərə görə qiyabi şəkildə ölüm cəzasına məhkum edib.

Port-Sudanda terrorizm və dövlət əleyhinə cinayətlərə baxan məhkəmə təqsirləndirilən şəxsləri Qərbi Darfurun qubernatoru Xamis Abdullah Abakarın qətlə yetirilməsi, insanlığa qarşı cinayətlər, müharibə cinayətləri, eləcə də Əl-Cüneynədə törədilmiş zorakılıq aktları ilə bağlı soyqırımı da daxil olmaqla bir sıra ağır cinayətlərdə təqsirli bilib.

Bu qərar 2023-cü ilin aprelində Sudanda müharibənin başlanmasından sonra Çevik Dəstək Qüvvələrinin rəhbərliyinə qarşı çıxarılan ilk məhkəmə hökmü hesab olunur.
Məhkəmə işi 2023-cü ilin iyununda Abakarın qətlə yetirilməsi ilə bağlı olub. Abakar Çevik Dəstək Qüvvələrini Əl-Cüneynədə mülki yaşayış məntəqələrini atəşə tutmaqda ittiham etdikdən cəmi bir gün sonra oğurlanaraq öldürülüb.

İnsan hüquqları təşkilatları Əl-Cüneynədə baş verən zorakılığı etnik təmizləmə kimi qiymətləndirib. Təşkilatlar bu əməllərin Masalit icmasına qarşı soyqırımı kimi qiymətləndirilə biləcəyini bildiriblər. 
Ölüm hökmü çıxarılanlar arasında Hemedtinin qardaşı və müavini Əbdürrəhim Həmdan Dağalo, digər qardaşı Əlqoney Həmdan Dağalo Musa, Çevik Dəstək Qüvvələrinin Qərbi Darfur üzrə komandanı Əbdürrəhman Cümə Barkallah, eləcə də Qərbi Darfurun keçmiş qubernator müavini əl-Ticani əl-Tahir Karşum da yer alır.

Çevik Dəstək Qüvvələri daha əvvəl Abakarın qətlə yetirilməsində məsuliyyəti öz üzərindən atıb və Sudan Silahlı Qüvvələrini günahlandırıb.

Kopyalandı