ABŞ-nin Men ştatındakı atışma immiqrasiya reydlərini yenidən gündəmə gətirib

ABŞ İmmiqrasiya və Gömrük Mühafizəsi Xidmətinin əməkdaşları Men ştatının sahilyanı şəhərlərindən birində sürücünü güllələyərək öldürüblər.

Hadisə Texas ştatının Hyuston şəhərində ABŞ İmmiqrasiya və Gömrük Mühafizəsi Xidmətinin əməkdaşının deportasiya əməliyyatları çərçivəsində nəqliyyat vasitəsini saxlayarkən bir kişini güllələyərək öldürməsindən sonra baş verib.

ABŞ Daxili Təhlükəsizlik Departamenti  hadisədən təxminən 12 saat sonra açıqlama verib. Nazirliyin məlumatına görə, sürücü avtomobilini saxlamağa çalışan əməkdaşlardan qaçmağa cəhd etdikdə ABŞ İmmiqrasiya və Gömrük Mühafizəsi Xidmətinin əməkdaşı ictimai təhlükəsizliyin pozulacağından narahat olduğuna görə ona atəş açıb.

Daxili Təhlükəsizlik Departamentinin açıqlamasında sürücünün hansı şəkildə təhlükə yaratdığı barədə məlumat verilməyib. Hadisə Men ştatının ən böyük şəhəri Portlenddən təxminən 24 kilometr cənubda yerləşən Biddeford şəhərində baş verib.

İmmiqrasiya və Gömrük Mühafizəsi Xidmətinin  tabe olduğu Daxili Təhlükəsizlik Departamenti hadisə ilə bağlı başqa təfərrüatlar açıqlamayıb. Yalnız bildirilib ki, barəsində yekun deportasiya qərarı çıxarılmış qanunsuz miqrantın son məlum ünvanında məqsədli müşahidə aparılıb.

Qurum əməkdaşların barəsində yekun deportasiya qərarı olan sənədsiz miqrantın son məlum ünvanında məqsədli müşahidə apardıqlarını bildirib. Daxili Təhlükəsizlik Departamentinin evdən çıxan şəxsin müşahidə altında olan həmin şəxs olub-olmadığını açıqlamayıb.

Hadisə suallar doğurub

Biddeford şəhərində baş verən ölümcül hadisə İmmiqrasiya və Gömrük Mühafizəsi Xidmətinin əməkdaşlarının avtomobilləri saxlama taktikalarına diqqəti artırıb. Miqrantların hüquqlarını müdafiə edən şəxslər ABŞ-də immiqrasiya reydlərinin necə həyata keçirildiyini sual altına alırlar.

Miqrant hüquqları müdafiəçilərinin bildirdiyinə görə, öldürülən şəxs ABŞ-də işləmək icazəsi və Sosial Təminat nömrəsi olan 26 yaşlı kolumbiyalı kişi idi. Men Miqrantların Hüquqları Koalisiyası və “Presente” təşkilatı atışmanı sarsıdıcı, qəzəb doğuran və qəbuledilməz adlandırıb.

Şahid Deniel Buşe bildirib ki, əvvəlcə fişəng səsinə bənzər səslər eşidib, daha sonra isə ağ rəngli yolsuzluq avtomobilinin daha kiçik ağ avtomobilə çırpıldığını görüb. Onun sözlərinə görə, əməkdaşlardan biri yaralı sürücünü avtomobildən çıxarıb. Buşe həmin şəxsin “Mən dayanmağa çalışdım” dediyini eşitdiyini bildirib.

Buşe hadisə yerindəki əməkdaşlardan birinin çox sarsılmış, demək olar ki, şok vəziyyətində göründüyünü deyib.

Men ştatındakı hadisə və ötən çərşənbə axşamı Hyustonda Lorenzo Salqado Arauxonun İmmiqrasiya və Gömrük Mühafizəsi Xidmətinin  əməkdaşı tərəfindən güllələnərək öldürülməsi ilə birlikdə ABŞ-də immiqrasiya qanunlarının icrası zamanı öldürülənlərin sayı azı yeddiyə çatıb. Bu hallar Prezident Donald Trampın 2025-ci ilin yanvarında yenidən hakimiyyətə qayıtmasından və kütləvi deportasiya kampaniyasına başlamasından sonra qeydə alınıb.

Etiraz aksiyaları başlayıb

Həmin gün daha sonra onlarla nümayişçi plakatlar qaldırıb şüarlar səsləndirərək Biddeford parkından bu il yenidən seçilmək üçün namizədliyini irəli sürən respublikaçı senator Syuzan Kollinsin ofisinədək təxminən 400 metr yürüş edib.

On etirazçı binanın foyesinə daxil olaraq “Rədd olsun İmmiqrasiya və Gömrük Mühafizəsi Xidməti!” və “Ona səs verməyin!” şüarları səsləndirib, həmçinin nalayiq ifadələr işlədib. Hadisə zamanı zorakılıq baş verməyib və heç kim saxlanılmayıb.

Təxminən 200 etirazçı plakatlarla şəhər boyunca yürüş edərək “İmmiqrasiya və Gömrük Mühafizəsi Xidməti Mendən çıxsın!” şüarını səsləndirib. Aksiya “Mechanics Park”da başa çatıb. Burada iştirakçılar şamlar yandırıb və miqrantlara dəstək ifadə edən yazılı mesajlar nümayiş etdiriblər.

Teqlər

qanunsuz miqrasiya ABŞ atışma Men immiqrasiya miqrant ölüm