BMT rəsmisi: HƏMAS Qəzzaya humanitar yardımın çatdırılmasını əngəlləyir

Birləşmiş Millətlər Təşkilatının rəsmisi HƏMAS-ı Qəzza zolağında humanitar yardımın paylanmasına mane olmaqda ittiham edib.

Onun sözlərinə görə bu vəziyyət ciddi ərzaq və zəruri ləvazimat çatışmazlığı, eləcə də getdikcə ağırlaşan həyat şəraiti ilə üzləşən mülki əhalinin vəziyyətini daha da pisləşdirir.

BMT-nin Fələstin əraziləri üzrə humanitar koordinatorunun bəyanatında bildirilib ki, şənbə günü yardım əməliyyatları dayandırılıb. Qərarın silahlı şəxslərin Qəzzanın şimalındakı ərzaq paylama məntəqəsinə daxil olması və Ümumdünya Ərzaq Proqramının anbarındakı iki yük maşınının sürücüsünə hücum etməsindən sonra verildiyi qeyd olunub.

BMT-nin Yaxın Şərq sülh prosesi üzrə xüsusi koordinatorunun müavini Ramiz Ələkbərov bildirib ki, bu hadisələr humanitar əməliyyatlara qarşı yönəlmiş hədə-qorxu, zorakılıq və maneəçilik tendensiyasının tərkib hissəsidir.

“Bu hadisələr tək-tək baş verən təsadüfi hallar deyil. Bunlar tamamilə qəbuledilməzdir və getdikcə daha təhlükəli hal alan hədə-qorxu, zorakılıq və maneələrin göstəricisidir. Bura qaçaqmalçılıq cəhdləri, humanitar əməliyyatların hədəf seçilməsi və onlardan sui-istifadə edilməsi də daxildir”, — deyə Ələkbərov bildirib.

BMT humanitar yardımla bağlı xəbərdarlıq edib 

“Bu cür hallar humanitar yardım işçilərinin həyatını təhlükəyə atır, həyati əhəmiyyətli yardımların çatdırılmasını əngəlləyir və Qəzza zolağında mülki əhalinin ağır humanitar böhranla üz-üzə qaldığı bir vaxtda humanitar təşkilatların fəaliyyət imkanlarını daha da məhdudlaşdırır”, — deyə Ələkbərov əlavə edib.
Onun sözlərinə görə yardım əməliyyatlarına müdaxilə münaqişədən zərər çəkənlərin ərzaq, tibbi ləvazimat və digər həyati əhəmiyyətli yardımlara çıxışını daha da məhdudlaşdıra bilər.

HƏMAS ittihamları rədd edir

HƏMAS bazar ertəsi ittihamları rədd edərək, Ümumdünya Ərzaq Proqramının yardım paylama mərkəzində baş verən hadisənin hücum və ya humanitar fəaliyyətə mane olmaq cəhdi olmadığını açıqlayıb.
Qrupun media ofisinin açıqlamasına görə təhlükəsizlik qüvvələri yardım bağlamalarının içərisində qaçaqmalçılıq yolu ilə gətirilmiş siqaret və mobil telefon hissələrinin gizlədildiyi barədə xəbər aldıqdan sonra hüquq-mühafizə əməliyyatı həyata keçiriblər.

Cəbəliyə qaçqın düşərgəsinin Əbu Rəşid ərazisində yerləşən Ümumdünya Ərzaq Proqramının ərzaq paylama mərkəzində baş verən hadisə iddia edildiyi kimi basqın, hücum və ya humanitar fəaliyyətə əngəl olmayıb.

Qəzza dağıdıcı müharibənin məngənəsində qalır

Bu mübahisə HƏMAS-ın 7 oktyabr 2023-cü ildə İsrailə hücumu ilə başlayan və Qəzzaya ciddi ziyan vuran müharibədən iki il yarımdan çox vaxt keçdiyi bir dönəmə təsadüf edir. 

İsrailin hava və quru əməliyyatları nəticəsində təxminən iki milyon insan yaşadığı ərazidən didərgin salınıb. Əhalinin böyük hissəsi hazırda HƏMAS-ın nəzarətindəki dar sahil zolağında, çadırlarda və ya zərər çəkmiş binalarda yaşayır.

Atəşkəs danışıqları ləng gedir

Rəsmilərin məlumatına görə, İsrail qüvvələri Qəzzanın sərhəd-keçid məntəqələri və giriş yolları da daxil olmaqla, ərazinin 60 faizindən çoxuna nəzarəti davam etdirir.

Atəşkəsin əldə olunması, HƏMAS-ın tərksilah edilməsi və İsrail qoşunlarının Qəzza zolağından çıxarılması məqsədilə aylardır davam edən danışıqlarda yalnız məhdud irəliləyiş əldə olunub.
Döyüşlər və siyasi fikir ayrılıqları fonunda humanitar təşkilatlar mülki əhalinin getdikcə dərinləşən böhranla üz-üzə qaldığını bildirirlər. Humanitar yardıma çıxış və yardım işçilərinin təhlükəsizliyi əsas narahatlıq doğuran məsələlər olaraq qalır.

Teqlər

BMT HƏMAS Qəzza humanitar yardım Ramiz Ələkbərov Ümumdünya Ərzaq Proqramı İsrail