Alkatras adası yaxınlığında qayıq aşıb: 1 nəfər ölüb, 2 nəfər isə itkin düşüb

San-Fransisko körfəzində, Alkatras adası yaxınlığında 19 nəfəri daşıyan üçmərtəbəli  qayığın aşması nəticəsində 1 nəfər ölüb, daha 2 nəfər isə itkin düşüb.

Qəza baş verdikdən sonra genişmiqyaslı axtarış-xilasetmə əməliyyatı başladılıb. Əməliyyata ABŞ Sahil Mühafizəsi ilə yanaşı yerli qurumlar da cəlb olunub. İtkin düşən 2 sərnişinin axtarışı üçün 11 qayıq saatlarla ərazidə fəaliyyət göstərib.

San-Fransisko Yanğınsöndürmə Xidmətinin rəisi Din Krispen bildirib ki, hadisə yerinə ilk çatan polis qayığı ağır yaralı bir şəxsi aşkarlayıb.

Zərərçəkəni xilas etmək mümkün olmayıb.

Qayıqda olan 19 nəfərdən 13-ü sahilə çıxıb, üç nəfər xəstəxanaya aparılıb, 2 nəfər isə hələ də itkin sayılır.

Rəsmilər bildiriblər ki, qəzanın başvermə səbəbi hələ də araşdırılır. Krispen, həmçinin qayığın göyərtəsində yanğın baş verdiyi ilə bağlı ilkin məlumatları təkzib edərək belə bir hadisəyə dair heç bir sübutun olmadığını söyləyib.

Alkatras adası 1934-1963-cü illərdə fəaliyyət göstərən məşhur federal həbsxanaya ev sahibliyi edib. Güclü dalğalarla əhatə olunan Alkatras uzun illər dünyanın qaçılması ən çətin həbsxanalarından biri kimi tanınıb. Hazırda ada ABŞ Milli Park Xidməti tərəfindən tarixi abidə kimi idarə olunur.

Kopyalandı