“Sərhədsiz Həkimlər” təşkilatı: Konqo Demokratik Respublikasında Ebola epidemiyası cavab tədbirlərini geridə qoyur

“Sərhədsiz Həkimlər” təşkilatı bildirib ki, Konqo Demokratik Respublikasında Ebola epidemiyası onun qarşısını almaq üçün görülən tədbirlərdən daha sürətlə yayılır. Təşkilat yoluxmanın nəzarət altına alınması və xəstələrə göstərilən tibbi yardımın təcili şəkildə sürətləndirilməsinə çağırıb.

Rəsmi məlumatlara görə təsdiqlənmiş Ebola yoluxmalarının sayı qısa müddət ərzində üç dəfə artaraq 1926-ya çatıb. Xəstəlik nəticəsində 702 nəfər həyatını itirib. “Sərhədsiz Həkimlər” təşkilatından bildirilib ki, bu epidemiya indiyədək qeydə alınmış Ebola ocaqları arasında yoluxanların sayına görə üçüncü, yayılma sürətinə görə isə ən sürətli epidemiya hesab olunur.

Ölkə üzrə 7 ebola müalicə mərkəzi və 15-dən çox karantin bölməsi fəaliyyət göstərir. Təşkilatın məlumatına görə virusun coğrafi baxımdan getdikcə daha geniş ərazilərə yayılması ciddi narahatlıq yaradır. Qurum qeyd edib ki, ucqar və şəhərdənkənar icmalar hələ də kifayət qədər tibbi dəstək ala bilmir. Bu ərazilərdə səhiyyə xidmətlərinə çıxış məhduddur. Yoluxmaların sürətlə artması isə epidemioloji nəzarət sisteminin imkanlarını ciddi şəkildə çətinləşdirir.

“Gecikən hər dəqiqə insan həyatı bahasına başa gəlir. Biz hələ də epidemiyanın qarşısını almaq əvəzinə onun arxasınca gedirik”, – deyə “Sərhədsiz Həkimlər” təşkilatının Fövqəladə Proqramlar üzrə meneceri Triş Nyuport bildirib. O, Ebola ilə mübarizənin gücləndirilməsi, xəstələrin tibbi yardımla daha effektiv təmin olunması və epidemiyanın nəzarət altına alınması üçün beynəlxalq ictimaiyyəti koordinasiyalı fəaliyyət göstərməyə çağırıb. 

Ebola çox vaxt ölümlə nəticələnir. Virus yoluxmuş insan və ya heyvan bədənindəki maye ilə birbaşa təmas zamanı yayılır. Xəstəliyin əsas əlamətləri yüksək hərarət, qusma, daxili və xarici qanaxmalardır. Hazırda  qeydə alınan epidemiya virusun “Bundibugyo” ştammı ilə əlaqədardır.

Ümumdünya Səhiyyə Təşkilatı ötən həftə bildirib ki, əhalinin intensiv hərəkəti və müalicənin gecikməsi səbəbindən epidemiya yayılmaqda davam edir. “Sərhədsiz Həkimlər” təşkilatı epidemioloji nəzarətin gücləndirilməsi, testlərin əhatəsinin artırılması və təhlükəsiz dəfn prosedurlarının təşkili üçün əlavə resursların təcili şəkildə səfərbər edilməsinin vacibliyini vurğulayıb.

Artan yoluxma səhiyyə sistemini çətin vəziyyətə salır

“Sərhədsiz Həkimlər” təşkilatının Tibbi Proqramlar üzrə meneceri Ayokunnu Raji bölgədəki vəziyyətin son dərəcə ağır olduğunu bildirərək hər gün şahidi olduqları mənzərəni təsvir edib.

“Virusun insanlar üçün ölümcül nəticələrini Monqbvaluda hər gün görürük”, – deyə o bildirib.

Rajinin sözlərinə görə xəstələr adətən ağır vəziyyətdə xəstəxanaya çatdırılır və bu da onların sağ qalmaq ehtimalını əhəmiyyətli dərəcədə azaldır.

Bununla yanaşı Ağ Ev Konqo Demokratik Respublikasında olan ABŞ vətəndaşlarının kommersiya reysləri ilə ölkəyə qayıtmasına məhdudiyyət qoyulduğunu təsdiqləyib. Bu qərar bölgəni tərk etməyə çalışan insanların üzləşdiyi çətinlikləri daha da artırır.

“Sərhədsiz Həkimlər” təşkilatından verilən məlumata görə beynəlxalq cavab tədbirləri dərhal və ciddi şəkildə gücləndirilməzsə, epidemiyanın yayılma sürəti onun qarşısını almaq üçün həyata keçirilən tədbirləri geridə qoyacaq.

Kopyalandı