Myanma sahillərində 2 qayıq batıb, 500-dən çox insan itkin düşüb

Birləşmiş Millətlər Təşkilatının məlumatına görə, əsasən Rohinca qaçqınlarını daşıyan qayıqların Myanma sahillərində batması nəticəsində 500-dən çox insanın həlak olduğu ehtimal edilir.

Məlumata əsasən, iyunun sonlarında Myanmanın qərbində yerləşən Rakhayn ştatından yola düşən qayıqlarda münaqişədən, təqiblərdən və ağırlaşan humanitar şəraitdən qaçan ailələr olub.

Qayıqlardakı bəzi şəxslərin Andaman dənizi üzərindən təhlükəli səfərə başlamazdan əvvəl Banqladeşin Koks-Bazar bölgəsindəki qaçqın düşərgələrindən gəldiyi qeyd edilir.

BMT-nin Qaçqınlar üzrə Ali Komissarlığı (UNHCR) və Beynəlxalq Miqrasiya Təşkilatı (IOM) yaydıqları birgə bəyanatda faciənin miqyasının hələ də dəqiqləşdirildiyini bildiriblər. 

Qurumların məlumatına görə, ilkin məlumatlar iki qayığın iyunun sonlarında Myanmanın Rakhayn ştatından yola düşdüyünü göstərir. Sərnişinlərin əksəriyyətini Rohincalar təşkil edib. Onların arasında Banqladeşin Koks-Bazar bölgəsindəki qaçqın düşərgələrindən gələnlərin də olduğu bildirilir.

Qurumlar 500-dən çox insanın həlak olduğunu ehtimal edirlər.

Axtarışlar davam edir

BMT-nin məlumatına görə, təxminən 250 nəfəri daşıyan ilk qayıq Myanmadan yola düşdükdən qısa müddət sonra əlaqəni itirib.

Təxminən 280 nəfərin olduğu güman edilən ikinci qayığın isə iyulun 8-də Myanmanın Ayeyarvadi bölgəsi sahillərində batdığı ehtimal olunur.

Hadisələr və bildirilən ölüm sayı hələ rəsmi şəkildə təsdiqlənməyib.

BMT-nin Qaçqınlar üzrə Ali Komissarlığı və Beynəlxalq Miqrasiya Təşkilatı bəyan ediblər ki, hadisələr və itkilərlə bağlı rəqəmlər hələ təsdiqlənməsə də, mümkün böyük insan tələfatı ciddi narahatlıq doğurur.

Rohincaların təhlükəli dəniz səfərləri davam edir

Myanmanın müsəlman Rohinca azlığının nümayəndələri illərdir zorakılıq, təqib və ağır yaşayış şəraitindən xilas olmaq üçün həddən artıq yüklənmiş taxta qayıqlarla təhlükəli dəniz səfərlərinə çıxırlar.

Onların bir qismi Myanmadakı münaqişədən, digərləri isə qonşu Banqladeşdəki qaçqın düşərgələrində hökm sürən ağır şəraitdən qaçır. Rohincalar daha təhlükəsiz həyat ümidi ilə əsasən Malayziya, İndoneziya və Tailanda çatmağa çalışırlar.

BMT-dən verilən məlumata görə son səfərlər dənizdə hava şəraitinin daha təhlükəli olduğu mövsümdən kənar dövrdə həyata keçirilib.

Qayıqların batması ilə bağlı məlumatlar Andaman dənizi və Benqal körfəzində dərinləşən humanitar böhrana dair narahatlığı artırıb.

BMT qurumlarının məlumatına görə bu il regionda Rohinca qaçqınları və Banqladeş vətəndaşları da daxil olmaqla, təxminən 300 nəfərin itkin düşdüyü və ya həlak olduğu bildirilib.

Son hadisə təsdiqlənərsə, bu, Rohinca qaçqınlarının iştirakı ilə son illərdə baş vermiş ən ağır dəniz faciələrindən biri olacaq.

Teqlər

Rohinca qaçqınları Myanma qayıq qəzası Andaman dənizi BMT