Vyetnamın şimalında qəfil daşqınlar nəticəsində dörd nəfər ölüb, güclü yağışlar davam edir

Vyetnamın şimalındakı dağlıq kəndi qəfil daşqın vurub. Nəticədə azı dörd nəfər ölüb, daha dörd nəfər isə itkin düşüb. Bölgədə bir neçə gündür davam edən güclü yağışlar vəziyyəti daha da çətinləşdirir.

Daşqın iyulun 17-də səhər saatlarında Laytəu əyalətinin Muonq Than kəndində baş verib. Təbii fəlakət kənddə böyük dağıntılara səbəb olub. Vyetnamın dövlət xəbər agentliyinin məlumatına görə, daha yeddi nəfər yaralanıb.

Agentliyin yaydığı görüntülərdə evlərin və yolların qalın qırmızı palçıq və sel suları altında qaldığı görünür. İri qayalar və aşmış ağaclar yolları bağladığı üçün kəndə giriş çətinləşib.

Xilasetmə qrupları itkin düşənlərin axtarışını davam etdirirlər. Yerli hakimiyyət orqanları isə dağıntıları təmizləmək və kəndə gediş-gəlişi bərpa etmək üçün çalışırlar.

İyulun 15-dən başlayan güclü yağışlar Vyetnamın şimalında torpaq sürüşmələrinə və qəfil daşqınlara səbəb olub. Nəticədə yollar, elektrik xətləri və yüzlərlə ev zərər görüb.

Hökumətin təbii fəlakətlərin idarə olunması agentliyinin məlumatına görə, təxminən 238 hektar əkin sahəsi də su altında qalıb.

Sinoptiklər iyulun 18-də Vyetnamın şimalındakı bəzi bölgələrdə yağıntının 250 millimetrədək arta biləcəyi barədə xəbərdarlıq ediblər. Bu isə yeni daşqın və torpaq sürüşməsi riskini artırır.

Vyetnam hər il daşqınlarla üzləşir

Vyetnamda adətən iyuldan sentyabradək davam edən yağışlı mövsümdə güclü fırtına və daşqınlar baş verir.

Hökumətin məlumatına görə, 2025-ci ildə ölkədə təbii fəlakətlər nəticəsində 439 nəfər ölüb. Bu hadisələrin əksəriyyəti daşqınlarla bağlı olub.

Kopyalandı