İsrailin hava zərbəsi nəticəsində altı nəfərlik fələstinli ailənin bütün üzvləri həlak olub

Qəzza şəhərində İsrailin hava zərbəsi nəticəsində dördü uşaq olmaqla altı nəfərlik ailə həlak olub. Hadisə rəsmi olaraq qüvvədə qalan, lakin bölgədə hücumların davam etdiyi vaxtda baş verib.

 

Qəzzadakı Fələstin səhiyyə rəsmilərinin məlumatına görə, Səbra məhəlləsinə endirilən zərbə nəticəsində Firas əl-Məsri, onun həyat yoldaşı Salsabil, üç qızı və oğlu həyatını itirib.

İsrail ordusu zərbəni həyata keçirdiyini təsdiqləyib, lakin hədəfin HƏMAS döyüşçüsü olduğunu bildirib. Ordu mülki şəxslərin öldüyü barədə məlumatlardan sonra əməliyyatın nəticələrini araşdırdığını açıqlayıb.

Yanğından zərər görmüş evin qarşısında danışan Firas əl-Məsrinin atası Əbu Yusuf əl-Məsri zərbə anında ailənin yatdığını deyib.

“Biz nəvələrimizi və övladlarımızı alovlardan və dağıntılardan xilas edə bilmədik. Təxminən beş-altı nəfər, əksəriyyəti uşaqlar və qadınlar, heç bir mərhəmət göstərilmədən və əvvəlcədən xəbərdarlıq edilmədən öldürüldü”, - deyə o bildirib.

O, atəşkəsə baxmayaraq Qəzzada təhlükəsizliyin bərpa olunmamasından narazılığını ifadə edib.

“Burada nə nisbi sakitlik var, nə də ümumiyyətlə, təhlükəsiz yer”.

Atəşkəs zərbələri dayandıra bilməyib

İsrail və HƏMAS arasında atəşkəs oktyabrda qüvvəyə minsə də, bu, bölgədə hərbi əməliyyatların tam dayanmasına səbəb olmayıb.

İsrail qüvvələri İsrailə qarşı hücumlarda iştirak edən silahlıları hədəf aldıqlarını bildirərək tez-tez hava zərbələri endirməyə davam edir. Fələstin rəsmiləri isə bu hücumlar nəticəsində mülki itkilərin artdığını açıqlayır.

Qəzza Səhiyyə Nazirliyinin məlumatına görə, atəşkəs başladıqdan sonra İsrailin hücumları nəticəsində 1150-dən çox fələstinli öldürülüb.

Nazirlik itkilərlə bağlı rəqəmlərdə mülki şəxslərlə döyüşçülər arasında fərq qoymur. Lakin qurum həlak olanların əksəriyyətinin mülki şəxslər olduğunu bildirir.

İsrail ordusu cümə günündən bəri həyata keçirilən dörd ayrı zərbə nəticəsində HƏMAS və “Fələstin İslami Cihadı” qruplaşmalarının üzvlərinin öldürüldüyünü açıqlayıb. Ordu bildirib ki, hədəfə alınan şəxslərdən bəziləri 2023-cü il oktyabrın 7-də İsrailin cənubuna edilən hücumlarda iştirak edib və girovların saxlanılmasında rol oynayıb.

İsrail rəsmilərinin məlumatına görə, atəşkəs qüvvəyə mindikdən sonra Qəzzada fələstinli silahlılar tərəfindən dörd İsrail hərbçisi də öldürülüb.

Diplomatik səylər dalana dirənib

Misir, Qətər, Türkiyə və ABŞ daxil olmaqla beynəlxalq vasitəçilər münaqişənin daha uzunmüddətli həllinə nail olmaq üçün səylərini davam etdirirlər.

Danışıqlar əsasən HƏMAS-ın silahları təhvil verməsi və İsrail qüvvələrinin Qəzzadan çıxarılması ilə bağlı təkliflər üzərində qurulub. Lakin tərəflər hələlik razılığa gələ bilməyib.

Son hava zərbəsi hər iki tərəfin davamlı sülh perspektivlərinə mane olmaqda bir-birini ittiham etdiyi vaxt diplomatik səylərə əlavə təzyiq yarada bilər.

Sonu görünməyən münaqişə

Müharibə 2023-cü il oktyabrın 7-də HƏMAS-ın İsrailin cənubuna hücumu ilə başlayıb. İsrail rəsmilərinin məlumatına görə, həmin hücumda təxminən 1 200 nəfər öldürülüb, 250-yə yaxın insan girov götürülüb.

İsrail buna cavab olaraq Qəzzada genişmiqyaslı hərbi əməliyyata başlayıb. Qəzza səhiyyə rəsmilərinin məlumatına görə, münaqişə başlayandan indiyədək 73 mindən çox fələstinli öldürülüb.

İsrail Qəzzadakı vəziyyətlə bağlı bəzi rəqəmləri qəbul etmir. Ölkə rəsmiləri bildirirlər ki, həyata keçirilən hərbi əməliyyatlar mülki şəxslərə deyil, HƏMAS və digər silahlı qruplaşmalara qarşı yönəlib.

Döyüşlər Qəzzanın təxminən iki milyonluq əhalisinin böyük hissəsinin köçkün düşməsinə səbəb olub. Hazırda çox sayda insan ərzaq, su və tibbi ləvazimat çatışmazlığı fonunda müvəqqəti sığınacaqlarda və ya zədələnmiş binalarda yaşayır.

Teqlər

Qəzza İsrail hava zərbəsi yanğın təhlükəsizliyi ordu atəşkəs HƏMAS əməliyyat