Şri-Lanka son onilliyin ən ağır denq epidemiyası ilə mübarizə aparır

Şri-Lanka təxminən son on ilin ən ağır denq epidemiyası ilə mübarizə aparır. Yoluxma halları artmaqda davam edir. Hakimiyyət orqanları ağcaqanadlar vasitəsilə yayılan bu xəstəliyin qarşısını almaq üçün ordu qüvvələrini cəlb edib.

Səhiyyə orqanlarının məlumatına görə, yanvar ayından etibarən ölkədə 76044 nəfər denq qızdırmasına yoluxub, 53 nəfər isə həyatını itirib. Hazırkı vəziyyət 2017-ci ildəki, 100 mindən çox yoluxmanın qeydə alındığı  epidemiyaya yaxınlaşır.

Şri-Lanka Hərbi Hava Qüvvələri ağcaqanadların çoxaldığı əraziləri müəyyən etmək üçün dronlardan istifadə edir. Dronlar, xüsusilə dam örtüklərində və digər yerlərdə durğun su mənbələrinin aşkarlanmasına kömək edir.

Hərbçilər və polis əməkdaşları isə səhiyyə işçilərinə evlərin, məktəblərin və tikinti sahələrinin yoxlanılmasında kömək göstərir.

Yoluxmaların artması səbəbilə xəstəxanalar iyulun ilk iki həftəsində əlavə tədbirlər görərək imkanlarını genişləndirib: əlavə çarpayılar yerləşdirilib, şöbələrin fəaliyyəti yenidən təşkil olunub və tibbi personalın iş saatları artırılıb.

Xəstəxanalar təzyiq altındadır

Səhiyyə rəsmiləri bildirib ki, iyun ayında 21537 yoluxma halı qeydə alınıb. Bu, may ayı ilə müqayisədə iki dəfədən çoxdur.

Denq qızdırmasının əsas simptomlarına adətən yüksək hərarət, güclü bədən ağrıları və iştahsızlıq daxildir.

Paytaxt Kolombonun şimalında yerləşən Neqombo şəhəri denqdən ən çox zərər çəkən ərazilərdən biridir. Həkim Lalindra Dias bildirib ki, xəstəxanalar xəstələrin sayının sürətlə artması ilə bağlı çətinliklərlə üzləşir.

“Xəstələrin sayının sürətlə artması həkimlər üçün ciddi çətinlik yaradır”, - deyə o bildirib.

Onun çalışdığı xəstəxanada iyun ayından bəri 1 800-ə yaxın denq xəstəsi müalicə alıb. 2025-ci ilin eyni dövründə bu rəqəm təxminən 1 050 nəfər olub.

Təmizləmə kampaniyası və peyvənd məsələsi müzakirə olunur

Hakimiyyət orqanları iyulun 16-da ölkə üzrə təmizlik kampaniyasına başlayıb. Kampaniya ağcaqanadların çoxaldığı evlər, məktəblər, dini müəssisələr və digər əraziləri əhatə edib.

Səhiyyə Nazirliyi bildirib ki, bu ay ərzində 11 minə yaxın ağcaqanad ocağı aradan qaldırılıb. Bundan əlavə, çoxalma mənbələri aşkar edilən 4 mindən çox obyektə qarşı cərimə tətbiq olunub.

Rəsmilər hazırkı musson mövsümünün avqust ayında zəifləməsi ilə yoluxma hallarının azalacağını gözləyir. Lakin ilin sonlarında mövsümi yağışların qayıtması ilə yoluxmaların yenidən arta biləcəyi barədə xəbərdarlıq edirlər.

Şri-Lanka hələlik denq qızdırmasına qarşı peyvəndindən istifadə etmir. Peyvəndin müxtəlif virus ştamlarına qarşı effektivliyi hələ də araşdırılır. 

Teqlər

Şri-Lanka Denq epidemiyası vaksin peyvənd hakimiyyət yoluxma