Hantavirus infeksiyası nəticəsində 3 nəfər ölüb

Venesuelanın səhiyyə qurumları hantavirus infeksiyası nəticəsində 3 nəfərin həyatını itirdiyini təsdiqləyib.

Bununla belə, rəsmilər xəstəliyin ölkə daxilində insanlar arasında yayıldığını təsdiqləyən heç bir sübutun olmadığını bildiriblər. Ölümlər Ansoateqi ştatının şərq bölgəsində qeydə alınıb.

Rəsmilərin sözlərinə görə bunlar ayrı-ayrı yoluxma hallarıdır və hazırda əhali üçün hər hansı təhlükə müşahidə olunmur.

Eyni zamanda, səhiyyə rəsmiləri Venesuelanın cənub-qərbində yerləşən Barinas ştatında hantavirus şübhəsi ilə əlaqədar iki tibb işçisinin ölümünü araşdırırlar. Bildirilib ki, bu hallar hələlik araşdırma mərhələsindədir və təxminən 655 kilometr məsafədə yerləşən Ansoateqi ştatında qeydə alınan ölümlərlə əlaqəli hesab edilmir.

Venesuela Tibb Federasiyasının məlumatına görə Ansoateqi ştatında həyatını itirən üç nəfər eyni ailənin üzvləri olub.

Səhiyyə Nazirliyi nəzarət tədbirlərinin gücləndirilməsi və ictimai sağlamlığın qorunması məqsədilə zərərçəkmiş bölgələrə tibbi qrupların göndəriləcəyini açıqlayıb. Bununla belə, görüləcək tədbirlərlə bağlı əlavə təfərrüat açıqlanmayıb.

Hantavirus dünyanın müxtəlif bölgələrində yayılıb. Virus əsasən siçan və siçovul kimi yoluxmuş gəmiricilərlə təmas nəticəsində insanlara keçir. İnsanlarda yoluxma halları nadir qeydə alınır və xəstəliyin insandan insana ötürülməsi çox az ehtimal olunur.

Ağır hallarda virus ciddi tənəffüs xəstəliklərinə və ya böyrək çatışmazlığına səbəb ola bilər.

Səhiyyə qurumları vəziyyəti yaxından izləməyə davam edir. Venesuela rəsmiləri bildirirlər ki, son ölüm halları genişmiqyaslı epidemiyanın əlaməti deyil. Onların sözlərinə görə ölkə daxilində virusun insandan insana yayıldığını təsdiqləyən heç bir sübut yoxdur.

Kopyalandı