Mamdani Netanyahunu müharibə cinayətkarı adlandırıb

Nyu-York meri Zöhran Mamdani ABŞ hökumətini İsrailin Baş naziri Benyamin Netanyahunu həbs etməyə çağırıb və İsrail lideri barəsində müharibə cinayətkarı ifadəsini işlədib.

Haaqada yerləşən Beynəlxalq Cinayət Məhkəməsi 2024-cü ildə Qəzzada hərbi cinayətlər törətməkdə ittiham olunan İsrail Baş naziri Benyamin Netanyahu barəsində həbs qərarı çıxarıb. İsrail isə məhkəmənin səlahiyyətini tanımır və ona qarşı irəli sürülən ittihamları rədd edir.

Mamdani bildirib ki, Netanyahu Nyu-Yorka səfər edərsə, onun administrasiyasının bu qərarı icra etmək və ya baş naziri həbs etmək üçün hüquqi səlahiyyəti yoxdur.

“Bu səlahiyyət federal hökumətə məxsusdur və mən onları Beynəlxalq Cinayət Məhkəməsinin həbs qərarını icra etməyə çağırıram”, - deyə Mamdani bildirib.

Daha əvvəl ABŞ Prezidenti Donald Tramp “Truth Social” platformasından Netanyahunun ABŞ ərazisində olduğu müddətdə heç bir halda və heç bir formada həbs edilməyəcəyini yazıb.

Netanyahu ənənəvi olaraq hər ilin sentyabrında Birləşmiş Millətlər Təşkilatının Baş Assambleyasının iclasında iştirak etmək üçün Nyu-Yorka səfər edir.

Tramp administrasiyası hazırda Beynəlxalq Cinayət Məhkəməsi  ilə mübahisə yaşayır. Administrasiya məhkəmə hakimləri və prokurorlarına qarşı sanksiyalar tətbiq edib.

Vaşinqtondan bildirilir ki, Beynəlxalq Cinayət Məhkəməsinin ABŞ ilə İsrail üzərində səlahiyyəti yoxdur və onun apardığı araşdırmalara etiraz edir.

ABŞ administrasiyası hesab edir ki, məhkəmə ABŞ və  İsrail vətəndaşlarını əsassız şəkildə hədəfə alır, onların suverenliyinə müdaxilə edir.

Şəhər rəhbərliyi həbs qərarının icrası ilə bağlı səlahiyyətləri araşdırıb

Mamdani həftəsonu yayımlanan müsahibəsində bildirib ki, Nyu-York şəhərinin hüquq şöbəsi məhkəmənin həbs qərarı ilə bağlı şəhərin hansı səlahiyyətlərə malik ola biləcəyini araşdırıb. Lakin nəticədə belə bir həbsi həyata keçirmək üçün hüquqi imkanların olmadığını müəyyən edib.

Mamdaninin açıqlamalarına cavab olaraq İsrail həbs qərarını və məhkəməni saxta məhkəmə kimi təqdim edib. İsrail rəsmiləri “X” platformasındakı paylaşımında Nyu-York merini yəhudi dövlətinin liderini və Yaxın Şərqdəki yeganə demokratiyanın rəhbərini hədəfə almaqda ittiham edib.

Netanyahu da qərarı rədd edib və Mamdaninin açıqlamalarından narahat olmadığını bildirib.

2002-ci ildə yaradılan Beynəlxalq Cinayət Məhkəməsi soyqırımı, insanlıq əleyhinə cinayətlər və hərbi cinayətlər üzrə yurisdiksiyaya malikdir. Nə ABŞ, nə də İsrail bu məhkəmənin üzvüdür.

Kopyalandı