Çexiyada hərbi helikopter aviabazada qəzaya uğrayıb

Çexiya Silahlı Qüvvələrinin məlumatına görə, Praqadan təxminən 180 kilometr cənub-şərqdə yerləşən Namyeşt nad Oslavou şəhərindəki 22-ci aviabazada “UH-1Y Venom” tipli hərbi helikopterin qəzaya uğraması nəticəsində bir hərbçi həlak olub, dörd nəfər isə yaralanıb.

Hadisə baş verən zaman helikopterin göyərtəsində beş hərbçi olub. Fövqəladə hallar xidmətindən bildirilib ki, orta dərəcəli xəsarətlər alan üç hərbçi Brno şəhərindəki xəstəxanaya, yüngül yaralanan daha bir hərbçi isə Yihlava xəstəxanasına aparılıb.

Xilasedicilər, həmçinin tüstüdən zəhərlənən daha üç nəfərə yerində tibbi yardım göstərildiyini və onların Tşebitş şəhər xəstəxanasına yerləşdirildiyini açıqlayıblar.

Çexiya Müdafiə Nazirliyi hazırda əsas prioritetlərinin yaralı hərbçilərə və onların ailələrinə, eləcə də həlak olan hərbçinin yaxınlarına tibbi, psixoloji və inzibati dəstək göstərmək olduğunu bildirib.

Ordu rəhbərliyi qəzanın bütün səbəblərinin hərtərəfli və obyektiv araşdırılacağını bəyan edib. Hadisədən dərhal sonra istintaq başa çatana qədər "UH-1Y Venom" da daxil olmaqla bütün "H-1" tipli helikopterlərin uçuşları müvəqqəti dayandırılıb.

Qeyd edək ki, "UH-1Y Venom" — "Bell Textron" şirkəti tərəfindən istehsal olunan və iki "General Electric T700-GE-401C" mühərriki ilə təchiz edilmiş çoxməqsədli hərbi helikopterdir.

Çexiya Silahlı Qüvvələrinin Baş Qərargah rəisi, general-leytenant Miroslav Hlavaç qəzadan dərhal sonra Hərbi Hava Qüvvələrinin komandanı, briqada generali Petr Tomaneki hadisə yerinə göndərib.

Kopyalandı