canlı Netanyahu Yaxın Şərq gərginliyi fonunda Trampla görüşəcək

Husilər Səudiyyə Ərəbistanının Qırmızı dəniz sahilindəki neft obyektlərini hədəfə alıb

İranla müttəfiq olan Yəmənin husiləri Səudiyyə Ərəbistanının Cizan və Yanbu şəhərlərində yerləşən “Saudi Aramco” obyektlərinə qarşı əməliyyatlar həyata keçirdiklərini açıqlayıblar.

Qrupun hərbi sözçüsü Yəhya Sərianın bəyanatına görə Cizandakı “Aramco” obyektləri onlarla ballistik raket və dronla, Yanbudakı obyektlər isə ballistik və qanadlı raketlər, eləcə də dronlarla hədəfə alınıb.

SEPAH Hörmüz boğazında 4 gəmini saxlayıb

İranın İslam İnqilabı Keşikçiləri Korpusunun (SEPAH) dəniz qüvvələri son 24 saat ərzində Hörmüz boğazında xəbərdarlıq atəşi açdıqdan sonra 4 gəmini saxlayıb.

İran dövlət televiziyasının məlumatına görə, gəmilər SEPAH-ın təhlükəli keçid hesab etdiyi boğazın cənub dəhlizindən keçməyə çalışıb.

SEPAH Hörmüz boğazında təsdiqlənməmiş marşrutlardan istifadə edən gəmilərin güclü cavabla üzləşə biləcəyi barədə xəbərdarlıq edib. Bu addım qlobal enerji ticarəti üçün mühüm əhəmiyyət daşıyan bu dəniz yolunda təhlükəsizliklə bağlı narahatlıqları artırıb.

Ərbildə ABŞ konsulluğu yaxınlığında dron vurulub

İraqın hava hücumundan müdafiə sistemləri Kürdüstan bölgəsinin paytaxtı Ərbildə, ABŞ konsulluğu yaxınlığında uçan dronu vurub.

Dronun mənşəyi və hadisə nəticəsində hər hansı zərərin və ya itkinin olub-olmadığı barədə açıqlama verilməyib. 

ABŞ İrana təzyiq üçün “isti və soyuq” strategiyadan istifadə edir

Avstriyanın keçmiş müdafiə attaşesi Volfqanq Pusztai bildirib ki, ABŞ İrana təzyiq göstərmək və strateji məqsədlərinə nail olmaq üçün diplomatik, iqtisadi və hərbi vasitələrin birləşməsindən istifadə edir.

Onun sözlərinə görə Vaşinqtonun əsas məqsədlərindən biri qlobal enerji təchizatı üçün mühüm əhəmiyyət daşıyan Hörmüz boğazının yenidən açılmasını təmin etməkdir.

Pusztai ABŞ-nin yanaşmasını “isti və soyuq” strategiya adlandırıb. O bildirib ki, Vaşinqton hərbi əməliyyatları müəyyən fasilələrlə növbələşdirərək İrana təzyiqi artırır və Tehranın danışıqlara qayıtmasına çalışır.

Onun fikrincə, hücumlar və fasilələr arasındakı bu model İrana psixoloji təzyiq yarada və münaqişənin dayandırılması üçün addımlar atmağa sövq edə bilər.

Pusztai əlavə edib ki, İran rəhbərliyi daxilində fikir ayrılığı mövcuddur. Bir qrup danışıqlara qayıtmağı dəstəkləyir, digər qrup isə Hörmüz boğazına hərbi nəzarəti saxlamağa çalışır.

Bu arada ABŞ Prezidenti Donald Tramp diplomatiyaya maraq göstərdiyini bildirərkən, hərbi təzyiq variantını da gündəmdə saxlayır.

Misir, Oman və İran xarici işlər nazirləri gərginliyin azaldılmasını müzakirə edib

Misirin xarici işlər naziri Bədr Əbdülatti İranlı və Omanlı həmkarları Abbas Əraqçi və Bədr əl-Busaidi ilə ayrı-ayrılıqda telefon danışığı apararaq gərginliyin azaldılması və əsas dəniz yollarında sərbəst hərəkətin təmin olunması yollarını müzakirə edib.

Danışıqlarda regionda təhlükəsizlik və sabitliyin bərpasına diqqət yetirilib. Xüsusilə qlobal ticarət və enerji təchizatı üçün mühüm əhəmiyyət daşıyan Hörmüz boğazı və Qırmızı dənizdə vəziyyət müzakirə olunub.

Misir dəniz təhlükəsizliyini təhdid edə biləcək addımlardan çəkinməyin vacibliyini vurğulayıb. Qahirə gəmiçiliyin pozulmasının həm regionun maraqlarına, həm də qlobal iqtisadiyyata zərər vura biləcəyi barədə xəbərdarlıq edib.

Əraqçi: "Yəmən münaqişəsinin hərbi həlli yoxdur"

İranın xarici işlər naziri Abbas Əraqçi Səudiyyə Ərəbistanı ilə Yəməndəki husilər arasında artan gərginliyin hərbi yolla həll edilə bilməyəcəyini bildirib.

O, İranın dövlətə məxsus “Iran Daily” qəzetinə müsahibəsində bütün tərəfləri böhranı həll etmək üçün dialoqa çağırıb.

Əraqçi İranın münaqişəyə görə məsuliyyət daşıdığı ilə bağlı iddiaları da rədd edib. O bildirib ki, Yəməndə və Bab əl-Məndəb boğazında yaranmış vəziyyət İranın müdaxiləsi ilə deyil, Yəmən, Səudiyyə Ərəbistanı və regiondakı digər ölkələr arasında uzun illər davam edən fikir ayrılıqları ilə bağlıdır.

Körfəz regionunda gərginlik davam edir, ABŞ-nin yeni zərbələri qeydə alınmayıb

İran şənbə gününə keçən gecə ABŞ tərəfindən yeni hava zərbələrinin endirilmədiyini açıqlayıb. Bu, 13 gecə ardıcıl davam edən hücumlardan sonra atəşlərin müvəqqəti dayandığına işarə edib.

İran Səhiyyə Nazirliyinin sözçüsü Hüseyn Kermanpur ölkədə sakit gecə yaşandığını bildirib. ABŞ Mərkəzi Komandanlığı da yeni hərbi əməliyyat barədə məlumat verməyib.

İran Səhiyyə Nazirliyinin məlumatına görə, münaqişə nəticəsində ölkədə 3 400-dən çox insan həyatını itirib. Bundan əlavə, ABŞ ordusunun 18 hərbçisi, İsraildə 24 mülki şəxs və regionun digər ərazilərində daha az sayda mülki şəxs həlak olub.

Livan ərazisində davam edən döyüşlər nəticəsində isə 4 mindən çox insanın öldüyü, İsrail ordusunun 38 hərbçisinin həyatını itirdiyi bildirilib.

Omman körfəzində tankerlə hərbi qüvvələr arasında insident baş verib

Böyük Britaniyanın Dəniz Ticarət Əməliyyatları İdarəsi (UKMTO) bildiriş yayaraq, 24 iyulda Omman körfəzində bir neft tankerinin hərbi qüvvələrlə üz-üzə gəldiyini bəyan edib.

UKMTO ərazidən keçən gəmilərə son dəniz təhlükəsizliyi məlumatları ilə tanış olmağı və dəyişən əməliyyat şəraitinə qarşı ehtiyatlı qalmağı tövsiyə edib.

Səudiyyə Ərəbistanının neft emalı zavodlarını hədəf alan raketlər vurulub

Səudiyyə Ərəbistanının hava hücumundan müdafiə sistemləri Yəməndən atılan və Yanbu şəhərindəki neft emalı zavodlarını hədəf alan iki balistik raketi zərərsizləşdirib. Hadisə nəticəsində hər hansı dağıntı və ya xəsarət barədə məlumat verilməyib.

Raketlərin dəf edilməsi krallığın energetika infrastrukturunu qorumaq məqsədilə 2021-ci ildən bəri ölkədə yerləşdirilən və Yunanıstan hərbçiləri tərəfindən idarə olunan ABŞ istehsalı "Patriot" HHM kompleksləri vasitəsilə həyata keçirilib.

Hücum ABŞ-nin İrana endirdiyi yeni hava zərbələrindən cəmi bir gün sonraya təsadüf edib. Bu gərginlik fonunda Prezident Donald Tramp Tehrana və onun husi müttəfiqlərinə ağır hərbi cəza veriləcəyi ilə bağlı xəbərdarlıq edib.

Husilər Səudiyyə Ərəbistanının neft tankerlərinə hücumlar etməklə və Qırmızı dənizdə dəniz blokadası tətbiq etməklə münaqişəni daha da kəskinləşdiriblər. Bu addım qlobal neft təchizatında kəsilmə riskini artıraraq "Brent" markalı xam neftin qiymətini bir barel üçün təxminən 100 dollara yüksəldib.

Regionda gərginliyin daha da dərinləşdiyi bir vaxtda, Pakistanın ABŞ və İran arasında sülh danışıqlarını bərpa etmək üçün yollar axtardığı bildirilir.

İsrail ordusu Tubas və Əl-Farə düşərgəsinə reyd keçirib

Fələstinin "Wafa" xəbər agentliyinin məlumatına görə İsrail qüvvələri İordan çayının qərb sahilindəki Tubas şəhəri və yaxınlıqdakı Əl-Farə qaçqın düşərgəsində reydlər həyata keçirib.

Səhər tezdən çoxsaylı hərbi texnika ilə Tubasa daxil olan İsrail qoşunları bir neçə məhəlləni nəzarətə götürərək sakinlərin evlərində axtarış aparıb.

İsrail hərbçiləri təxminən üç saat sonra şəhərdən geri çəkiliblər.

Daha sonra qüvvələr Tubasın cənubundakı Əl-Farə düşərgəsinə keçərək orada da evlərə qarşı genişmiqyaslı reydə başlayıblar.

İsrail ordusundan Qərb sahilində genişmiqyaslı reydlər

Gərginliyin və zorakılığın artmaqda davam etdiyi bir vaxtda İsrail qüvvələri İordan çayının qərb sahilinin müxtəlif bölgələrində gecə saatlarında reydlər həyata keçirib.

Yayılan məlumatlara görə, Beytləhm və Nablusda baş verən insidentlər zamanı fələstinli bir yeniyetmə və yaşlı bir kişi odlu silahdan açılan atəş nəticəsində yaralanıb.

İsrail qoşunları Eriha yaxınlığındakı Əqəbət Cəbr qaçqın düşərgəsi, Qalqilya, Qüds yaxınlığındakı Kəfr Əqəb, eləcə də Ramallah, Cenin və Tulkərm rayonlarının bir neçə kəndinə reyd təşkil edib.

Nablusda isə İsrail qüvvələri Təll, Qaryut və Beyt Furik yaşayış məntəqələrinə daxil olaraq evlərdə axtarışlar aparıb və saxlanılanlar olub. Məlumata görə Qaryut sakinlərinə qarşı gözyaşardıcı qazdan da istifadə edilib.

Nablusun cənubundakı Urif kəndində məskunlaşanlar tərəfindən hücumların təşkil edildiyi və evlərin hədəf alındığı bildirilir.

İran Rusiyanın ABŞ və İsrailə qarşı mövqeyini yüksək qiymətləndirib

İranın xarici işlər naziri Abbas Əraqçi Moskvanın ABŞ və İsrailin “hərbi təcavüzü” adlandırdığı addımlara qarşı mövqeyini dəstəklədiyini bildirib.

Əraqçi 24 iyulda Qırğızıstanda keçirilən Şanxay Əməkdaşlıq Təşkilatının görüşü çərçivəsində Rusiyanın xarici işlər naziri Sergey Lavrovla görüşüb.

İranın rəsmi IRNA agentliyinin məlumatına görə Əraqçi Hörmüz boğazında yaranmış vəziyyətə görə ABŞ-nin öhdəliklərini pozmasını və törətdiyi cinayətləri günahlandırıb.

O, Rusiyanın İrana qarşı ABŞ və İsrailin hərbi əməliyyatlarını pisləyən prinsipial mövqeyini alqışlayıb. Əraqçi eyni zamanda Tehranın diplomatiyaya sadiq qaldığını və milli maraqlarını, təhlükəsizliyini qorumaqda qətiyyətli olduğunu vurğulayıb.

İran xarici işlər naziri bildirib ki, Tehran ABŞ-ın Hörmüz boğazından İranın təhlükəsizliyinə təhdid vasitəsi kimi istifadə etməsinə imkan verməyəcək.

Lavrov isə Rusiyanın region ölkələrinin iştirakı əsasında regional təhlükəsizlik mexanizminin yaradılmasına dəstək verməyə hazır olduğunu deyib.

Tramp: "İranla danışıqlar gedir, nüvə silahına icazə verilməyəcək"

ABŞ Prezidenti Donald Tramp bildirib ki, İran hazırda Vaşinqtonla danışıqlar aparır. O, danışıqlara açıq olduğunu qeyd etsə də, Tehranın hələ razılaşmaya hazır olmadığını düşündüyünü deyib.

Tramp Vaşinqtonda keçirilən illik Ağ Ev Müxbirləri Şam yeməyində çıxışı zamanı bildirib ki, istənilən razılaşma İranın nüvə silahı əldə etməyəcəyinə zəmanət verməlidir.

ABŞ lideri iddia edib ki, hərbi əməliyyatlar nəticəsində İranın imkanları ciddi şəkildə zəiflədilib. Onun sözlərinə görə, İranın hərbi-dəniz və hava qüvvələri, eləcə də radar sistemləri və dron imkanları böyük zərər görüb.

Tramp vurğulayıb ki, əsas məqsəd İranın nüvə silahına sahib olmasının qarşısını almaqdır və xəbərdarlıq edib ki, Tehran belə bir silah əldə edəcəyi təqdirdə ondan istifadə edə bilər.

Tramp: "Netanyahu gələn həftə Vaşinqtona səfər edəcək"

ABŞ Prezidenti Donald Tramp bildirib ki, İsrailin Baş naziri Benyamin Netanyahu danışıqlar aparmaq üçün gələn həftə Vaşinqtona səfər edəcək.

İsrail Baş nazirinin ofisi də Netanyahunun iyulun əvvəlində vəfat edən senator Lindsi Qrehemin dəfn mərasimində iştirak edəcəyini təsdiqləyib.

Açıqlama iki liderin Yaxın Şərqdə davam edən gərginlik fonunda müzakirələri davam etdirdiyi bir vaxtda verilib.