Tokayev müharibənin dondurulmasını təklif edir, Putin isə döyüşlərin dayandırılmasını istisna edir

Qazaxıstan Prezidenti Kasım-Jomart Tokayev iyulun 26-da Kreml başçısı Vladimir Putinlə görüşündə Rusiya-Ukrayna müharibəsinin dondurulmasını təklif edib.

Tokayev tərəfləri sülh danışıqlarına qayıtmağa çağırıb. O bildirib ki, hər iki tərəfin mövqeləri sərtləşsə də, danışıqlar yolu ilə razılaşmanın əldə olunması hələ də mümkündür.

Tokayevin sözlərinə görə, “2.0 İstanbul formulu” adlandırdığı təşəbbüsü yenidən gündəmə gətirməyin vaxtı çatıb.

Tərəflər Rusiyanın 2022-ci ildə genişmiqyaslı işğalının ilk həftələrində İstanbulda danışıqlar aparıb. Onlar 2025-ci ildə də burada yenidən görüşüblər, lakin heç bir danışıqlar mərhələsində əsaslı irəliləyiş əldə olunmayıb.

Rəsmi Moskva müharibənin dondurulmasını rədd edir

Vladimir Putin görüş zamanı Tokayevin təklifinə açıq şəkildə münasibət bildirməyib. O, yalnız Ukrayna məsələsini qapalı görüşdə daha ətraflı müzakirə edəcəyini deyib.

Kremlin sözçüsü Dmitri Peskov bildirib ki, Putin Tokayevə Rusiyanın hərbi əməliyyatları barədə məlumat verib və rəsmi Moskvanın mövqeyini təkrarlayıb.

Peskov Putinə istinadən söyləyib ki, rəsmi Kiyev Rusiyanın zəruri hesab etdiyi qərarları qəbul edərsə, hərbi əməliyyatlar dayandırıla bilər.

Rusiyanın sülh şərtləri dəyişməyib

Rusiya Prezidenti ötən ay bildirib ki, ölkəsinin sülh razılaşması üçün irəli sürdüyü şərtlər dəyişməz olaraq qalır. Bu şərtlərə Ukraynanın rəsmi Moskvanın öz ərazisi hesab etdiyi dörd bölgədən qoşunlarını çıxarması və NATO-ya üzvlük istəyindən imtina etməsi daxildir.

Rəsmi Kiyev bu tələbləri dəfələrlə rədd edib. Bildirilib ki, istənilən sülh razılaşması Ukraynanın suverenliyinə və ərazi bütövlüyünə hörmət etməlidir.

Teqlər

Kasım-Jomart Tokayev Qazaxıstan Vladimir Putin Rusiya Ukrayna müharibə