BMT Suriyadakı vəziyyətlə bağlı hesabat hazırlayır

BMT-nin Baş katibi Antoniu Quterreş təşkilatın İsrailin Suriyada törətdiyi pozuntuları sənədləşdirən ətraflı hesabatı Təhlükəsizlik Şurasına təqdim edəcəyini bildirib. Suriyanın Prezidenti Əhməd Əl-Şaraa isə İsraillə təhlükəsizlik sazişi əldə etmək üçün işlərin davam etdiyini deyib.

BMT-nin Baş katibi Antonio Quterreş Dəməşqdə keçirilən mətbuat konfransında bildirib ki, Suriyanın suverenliyinin və ərazi bütövlüyünün pozulması qəbuledilməzdir.

O, İsraili 1974-cü ildə imzalanmış Qoşunların Ayrılması haqqında sazişə əməl etməyə çağırıb.

İsrail və Suriya arasında imzalanan həmin saziş atəşkəs rejimini müəyyənləşdirib, tərəflərin qüvvələrini ayırıb və Colan təpələrində BMT-nin nəzarət etdiyi bufer zonasının yaradılmasını nəzərdə tutub.

Sərhəddə gərginlik artır

İki ölkə arasında münasibətlər 2024-cü ilin dekabrında Bəşər Əsəd hökumətinin devrilməsindən sonra gərgin olaraq qalır. Həmin dövrdə Əhməd Əl-Şaraanın rəhbərlik etdiyi silahlı qruplar Dəməşqə nəzarəti ələ keçirib.

Bundan sonra İsrail qüvvələri Suriyanın cənubundakı bəzi ərazilərdə mövcudluğunu genişləndirib. İsrail hərbçiləri hərbisizləşdirilmiş bufer zonasına daxil olub və paytaxta nəzarət imkanı verən Hermon dağı da daxil olmaqla strateji mövqeləri ələ keçirib.

İsrail bundan sonra Suriyada dəfələrlə hava zərbələri və hərbi əməliyyatlar həyata keçirib. Rəsmi açıqlamalara görə bu addımlar ölkənin təhlükəsizlik maraqlarını və druz icmasının müdafiəsini təmin etmək məqsədi daşıyır.

Suriyanın dövlət xəbər agentliyi SANA-nın məlumatına görə bazar günü İsrailin atəşə tutması nəticəsində Maariyah kəndində elektrik transformatoru dağılıb və yaxınlıqdakı evlər elektrik enerjisindən məhrum olub.

Quterreş: “Çətinliklərə baxmayaraq, suriyalılar mübarizə aparırlar”

BMT-nin Baş katibi Antonio Quterreş şənbə günü Dəməşqə üçgünlük səfər edib. O, Suriyanın Prezidenti Əhməd Əl-Şaraa və xarici işlər naziri Əsəd Əl-Şeybani ilə görüşüb.

Quterreş görüşlər zamanı BMT-nin Suriyanın suverenliyi, müstəqilliyi və ərazi bütövlüyünə dəstəyini bir daha təsdiqləyib. O, beynəlxalq ictimaiyyəti ölkənin bərpasına dəstək verməyə çağırıb.

BMT-nin Baş katibi bildirib ki, suriyalılar üzləşdikləri çətinliklərə baxmayaraq, məqsədlərinə çatmaq əzmindədirlər.

Quterreş bildirib ki, BMT-nin humanitar yardımları hazırda Suriyanın ehtiyaclarının yalnız təxminən 20 faizini qarşılayır. O, bunun ölkədəki böhranın miqyasını göstərdiyini deyib.

BMT rəhbəri Sednaya həbsxanasına səfəri zamanı məhbusların üzləşdiyi ağır vəziyyətlə bağlı məlumat əldə etdiyini bildirib. Onun sözlərinə görə burada on minlərlə insan öldürülüb və işgəncələrə məruz qalıb.

Quterreş bildirib ki, Suriyada münaqişə zamanı törədilən cinayətlərə görə məsuliyyətin təmin edilməsi istiqamətində işlər davam edir. O, həmçinin ölkədə keçid dövründə ədalətin təmin olunmasının vacibliyini vurğulayıb.

BMT-nin Baş katibi sanksiyaların yumşaldılması istiqamətində atılan son addımları alqışlayıb. O, Suriyanın bərpasına dəstək vermək üçün qalan bütün məhdudiyyətlərin dərhal aradan qaldırılmasına çağırıb.

Quterreş Suriyanın regional və qlobal iqtisadi sistemə yenidən qoşulmasının vacibliyini qeyd edib. O, beynəlxalq tərəfdaşları ölkədə infrastrukturun, dövlət xidmətlərinin, təhsil və səhiyyə sahələrinin bərpasına kömək etməyə çağırıb.

Əl-Şaraanın İsrail və "Hizbullah"la bağlı açıqlamaları

 

 

Əl-Şaraa İsraillə təhlükəsizlik sazişi üzərində işlədiklərini bildirib

Suriyanın Prezidenti Əhməd Əl-Şaraa “Al Jazeera” telekanalına müsahibəsində bildirib ki, Dəməşq beynəlxalq vasitəçiliklə İsraillə təhlükəsizlik sazişi əldə etməyə çalışır.

O, belə bir razılaşmanın daha geniş sülhə yol aça biləcəyini deyib. Əl-Şaraa Suriyanın işğal altındakı Colan təpələri ilə bağlı mövqeyindən imtina etməyəcəyini vurğulayıb.

Əl-Şaraa bildirib ki, Suriya İsraillə hərbi qarşıdurmadan yayınmağa çalışır və Livana hərbi müdaxilə etmək niyyətində deyil.

O, "Hizbullah"ın regiondakı dəyişiklikləri nəzərə aldığını deyib. Əl-Şaraa qruplaşmanın silahları ilə bağlı məsələlərin Livan dövlətinin nəzarəti altında dialoq yolu ilə müzakirə edilməli olduğunu bildirib.

Teqlər

Suriya BMT Antonio Quterreş Yaxın Şərq İsrail Colan təpələri Hizbullah