Məşhur müğənni "D4vd" 14 yaşlı qızın qətlində təqsirləndirilir

Los-Anceles məhkəməsi "D4vd" ləqəbi ilə tanınan müğənni Devid Entoni Börkün 14 yaşlı Selest Rivas Hernandesi qətlə yetirməkdə və meyitini təhqir etməkdə ittiham olunaraq mühakimə edilməsinə qərar verib.

Hakim Şarlen Olmedo beşgünlük ilkin dinləmələrdən sonra prokurorların kifayət qədər sübut təqdim etdiyini bildirib. 21 yaşlı müğənni məhkəmə zalında zəncirlənmiş halda əyləşdirilib, dinləmələr zamanı hadisə yerindən qorxunc fotolar nümayiş olunub.

İttihama görə, müğənni 14 yaşlı qızla cinsi əlaqədə olub. Qız bu münasibəti ifşa edəcəyi ilə hədələdikdən sonra sənətçi "TikTok"da qazandığı məşhurluğu və musiqi karyerasını qorumaq üçün onu bıçaqlayaraq öldürüb.

Hernandesin 2025-ci ilin aprelində, müğənninin debüt albomunun çıxdığı həftədə itkin düşdüyü bildirilir. Onun çürümüş meyiti beş ay sonra müğənniyə məxsus "Tesla" avtomobilinin baqajında tapılıb.

Bu ilin aprelində həbs olunan ifaçı qətl, meyitin təhqir edilməsi və uşaqlara qarşı cinsi zorakılıqda ittiham olunur. Müğənni aprelin 20-də keçirilən məhkəmədə özünü təqsirli bilməyib, vəkili isə onun bu qətldə əli olmadığını iddia edib.

Dinləmələr zamanı prokurorlar müğənninin qətldən sonra saxta adla zəncirli mişar, bel və hava ilə doldurulan hovuz aldığını bildiriblər. Şahidlərin sözlərinə görə, qızın bədən hissələri "Tesla"nın baqajındakı torbalarda tapılıb, müğənninin qarajındakı qan ləkələrindən götürülən nümunələr isə zərərçəkənin DNT-si ilə üst-üstə düşüb.

İttiham tərəfi müğənniyə qarşı ölüm hökmünün tələb edilib-edilməyəcəyi barədə hələ son qərar vermədiyini bildirib.

Kopyalandı