Yaponiyada 7,1 ballıq dəhşətli zəlzələdə ölənlərin sayı 13-ə çatıb

Yaponiyanın cənubundakı Kumamoto şəhəri yaxınlığında baş verən 7,1 bal gücündə güclü zəlzələ nəticəsində həlak olanların sayı ən azı 13 nəfərə çatıb. Baş nazir Sanae Takaiçi bildirib ki, dağıntılar altında qalanların xilas edilməsi üçün zamanla yarış gedir.

İlkin məlumatlarda ölüm sayının 3 olduğu bildirilsə də, fəlakətin miqyası dəqiqləşdikcə bu rəqəm artıb. Zəlzələ regionda kütləvi dağıntılara səbəb olub, minlərlə evi işıqsız qoyub və yollara ciddi ziyan vurub.

Xilasedicilər qismən uçmuş ticarət mərkəzinin dağıntıları altından 8 nəfəri çıxara biliblər. Lakin zəlzələdən təxminən bir saat sonra binada baş verən mənşəyi məlum olmayan partlayış nəticəsində iki qadın həyatını itirib. Yerli medianın məlumatına görə, hüquq-mühafizə orqanları ehtimal olunan qaz sızması variantını araşdırır.

Prefekturanın ən böyük alış-veriş obyekti olan və 200-ə yaxın mağazanı birləşdirən "Aeon" ticarət mərkəzinə ciddi ziyan dəyib. Binanın bir tərəfi tamamilə dağılıb, dəmir konstruksiyalar və tikinti qalıqları avtodayanacağa səpələnib.

Yaponiya İctimai Televiziyasının (NHK) məlumatına görə, ticarət mərkəzinin 20-30 əməkdaşından xəbər almaq mümkün olmur. "Nippon Paper Industries" fabrikində isə tüstü borusunun uçması nəticəsində 7 nəfər itkin düşüb, 4 nəfər ağır yaralanıb.

Sarsıntının episentri 700 minə yaxın əhalisi olan Kyuşu adasının mərkəzi Kumamoto şəhərindən 20 kilometr cənubda yerləşib. Fəlakət bölgəsində 260 minə yaxın sakinə təxliyə məntəqələrinə köçmək tövsiyə olunub.

Yaponiya Meteorologiya Agentliyi sakinləri növbəti həftə ərzində güclü təkrar zəlzələlər və torpaq sürüşmələri barədə xəbərdar edib. Regionda 36 mindən çox evin elektrik enerjisiz qalması və havanın temperaturunun 34 dərəcəyə çatması istivurma riskini artırıb.

Episentrin yaxınlığında yerləşən Uki şəhər xəstəxanası işığın kəsilməsi səbəbindən hərbi səhra hospitalı rejimində işləyir. Şəhərdəki başqa bir xəstəxana isə 86 yaralını qəbul etdikdən sonra yeni xəstə qəbulunu dayandırıb.

Təbii fəlakət regiondakı iri istehsal müəssisələrinə də təsir edib. "Tokyo Electron" yarımkeçirici avadanlıq istehsalçısı və "Honda" avtomobil konserni zavodlarının fəaliyyətini dayandırdığını elan edib. Dünyanın en böyük çip istehsalçısı TSMC isə ehtiyat tədbiri olaraq işçilərini təxliyə etsə də, işi qismən bərpa edib.

Teqlər

yaponiya zəlzələ dağıntı ölüm Kumamoto