Yaponiya zəlzələsində ölənlərin sayı 30-a çatıb

Yaponiyanın cənub-qərbində yerləşən Kumamoto prefekturasında baş verən güclü zəlzələ nəticəsində ölənlərin sayı 30-a yüksəlib.

Baş nazir Sanae Takaiçi hökumətin fövqəladə hallar üzrə qərargahının iclasında bildirib ki, ölənlərin sayı yerli vaxtla saat 12:30-a (Azərbaycan vaxtı ilə 07:30) olan məlumata əsasən açıqlanıb.

Yaponiya Meteorologiya Agentliyinin məlumatına görə, 7,1 bal gücündə zəlzələ iyulun 28-də yerli vaxtla saat 16:27-də (Azərbaycan vaxtı ilə 11:27) Kumamoto prefekturasında, təxminən 10 kilometr dərinlikdə baş verib.

Zəlzələ nəticəsində evlər dağılıb, zavodlara, yollara, körpülərə və digər infrastruktur obyektlərinə ciddi ziyan dəyib.

Zavod və ticarət mərkəzində ölənlərin sayı çoxdur

Kumamoto rəsmiləri zəlzələ nəticəsində birbaşa ölən 17 nəfəri təsdiqləyib. Bildirilir ki, qurbanların əksəriyyəti ciddi zərər görən “Nippon Paper Industries” zavodunda və ehtimal olunan qaz partlayışının baş verdiyi “Aeon” ticarət mərkəzində həlak olub.

Hadisə yerlərindən yayılan görüntülərdə Hikava şəhərində dağıntılar, Yatsuhiro şəhərində sənaye obyektlərinə dəyən ciddi ziyan, eləcə də Kaşima şəhərində yerləşən “Aeon Mall Kumamoto” kompleksində yanğın izləri əks olunub.

Xilasetmə qrupları iyulun 30-da zədələnmiş binalarda axtarış-xilasetmə işlərini davam etdirib. Rəsmilər dağıntıların miqyasını qiymətləndirir.

Minlərlə evdə su və elektrik yoxdur

Zəlzələdən 2 gün sonra Yatsuhiro şəhərindəki bir çox evdə su və elektrik təchizatı hələ də bərpa olunmayıb.

Təxminən 58 min ev təsərrüfatının yerləşdiyi şəhərdə yerli hakimiyyət orqanları zədələnmiş su xətlərinin təmirinin uzun çəkə biləcəyini açıqlayıb.

Şəhər rəsmisi Akio Matsuşita su təchizatının nə vaxt tam bərpa olunacağı ilə bağlı dəqiq vaxtın müəyyən edilmədiyini bildirib.

Günvurma riski artır

Rəsmilər həftəsonu temperaturun 40 dərəcəyə yaxınlaşa biləcəyini bildirərək, günvurma riski ilə bağlı xəbərdarlıq edib.

Yaponiyanın Özünümüdafiə Qüvvələri Kumamoto prefekturasında təxliyə mərkəzləri və digər vacib məkanlarda təxminən 300 kondisioner quraşdırır.

Hərbçilər, həmçinin Yatsuhiro şəhərindəki icma mərkəzləri və məktəblərə su çənləri çatdırıb.

Rəsmilər bildirib ki, fövqəladə xidmətlər su təchizatının bərpası, elektrik enerjisinin yenidən təmin edilməsi və insanların yüksək temperaturdan qorunması istiqamətində tədbirləri davam etdirəcək.

Böyük şirkətlər istehsalı dayandırıb

Zəlzələ Yaponiyanın avtomobil və yarımkeçirici sənayesi üçün mühüm istehsal mərkəzi olan Kyuşu bölgəsində sənaye fəaliyyətinə də təsir edib. Bu, tədarük zəncirləri üçün narahatlıq yaradıb. Lakin iqtisadi nəticələrin tam miqyası hələ məlum deyil.

Yaponiya seysmik aktivliyi yüksək olan Sakit okean “Od halqası” üzərində yerləşir və burada tez-tez zəlzələlər baş verir.

Sərt tikinti qaydalarının, erkən xəbərdarlıq sistemlərinin və təlimlərin itkilərin azalmasına kömək etməsinə baxmayaraq, güclü zəlzələlər yenə də ciddi dağıntılara səbəb ola bilər.

Kumamoto 2016-cı ilin aprelində 2 güclü zəlzələ ilə üzləşib. Həmin fəlakət nəticəsində 260-dan çox insan həlak olub, minlərlə ev dağılıb.

Teqlər

Kumamoto zəlzələ təbii fəlakət Yatsuhiro şəhəri yaponiya Elektrik kəsintisi günvurma