"AnewZ" səhər xülasəsi – 1 avqust 2026

Günə “AnewZ”un səhər xülasəsi ilə məlumatlı başlayın.

Avqustun 1-i üçün hazırladığımız xülasədə gündəmin əsas xəbərləri və son diqqətçəkən hadisələr yer alır.

Rusiyanın gecə hücumları Kiyevdə insan tələfatına səbəb olub

Rusiya avqustun 1-də Ukrayna paytaxtına genişmiqyaslı ballistik raket hücumu həyata keçirib. Kiyevin meri Vitali Kliçkonun sözlərinə görə, hücum nəticəsində azı 9 nəfər həlak olub, 28 nəfər yaralanıb. Xəsarət alanlardan dördü uşaqdır.

Rusiya Kiyevə hücumlarını gücləndirib. Şəhərin müxtəlif yerlərində 10-dan çox partlayış səsi eşidilib.

Rəsmi Moskva hücumla bağlı hələlik açıqlama verməyib.

İspaniyaya keçid zamanı azı 57 nəfərin ölümündən sonra miqrantlar Mərakeşə qayıdır

İspaniya Şimali Afrikadakı Seuta eksklavına quru və dəniz yolu ilə daxil olan 50 mindən çox insanın əksəriyyətinin könüllü olaraq Mərakeşə qayıtdığını bildirib.

Rəsmil məlumata görə, sərhədin İspaniya tərəfində 57 nəfərin cəsədi tapılıb. Mərakeş ərazisində də ölənlərin ola biləcəyi istisna edilmir.

Mərakeşin təhlükəsizlik qüvvələri ölkə ilə həmsərhəd olan İspaniya ərazisinə keçməyə çalışan insanları geri qaytarmaq üçün dəyənəklərdən və gözyaşardıcı qazdan istifadə edib.

Ərəb ölkələri Qəzza üzrə yol xəritəsini alqışlayıb və tam icraya çağırıblar

Səudiyyə Ərəbistanı, Qətər, İordaniya və Küveyt Qəzza zolağı üzrə hərtərəfli sülh planının növbəti mərhələsinin həyata keçirilməsinə dair razılaşmanı alqışlayıb.

Ölkələr İsraili razılaşmanın şərtlərinə tam əməl etməyə, qüvvələrini geri çəkməyə və humanitar yardımların fasiləsiz çatdırılmasını təmin etməyə çağırıb.

ABŞ Prezidenti Donald Tramp və “Sülh Şurası” atəşkəs planının növbəti mərhələsinə keçidlə bağlı razılıq əldə edildiyini bildirib. Ərəb ölkələrinin açıqlamaları bundan sonra verilib.

Husilər Qırmızı dənizdə ödəniş planını təkzib edib və Səudiyyəyə məxsus tankerlərin marşrutlarını dəyişməyə məcbur qaldığını iddia ediblər  

Yəməndə husilərin nəzarətində olan dənizçilik üzrə koordinasiya qurumu Bab əl-Məndəb boğazından keçən kommersiya gəmilərindən ödəniş tutulmasının planlaşdırıldığına dair xəbərləri təkzib edib. Qurum bu strateji su yolundan keçidin ödənişsiz qaldığını bildirib.

Açıqlama “Reuters”in regional mənbələrə istinadən yaydığı xəbərdən sonra verilib. Bildirilirdi ki, qrup Səudiyyə Ərəbistanına məxsus gəmilərə qarşı blokada elan etdikdən sonra Qırmızı dənizin cənubundan keçən gəmilərdən ödəniş alınmasını müzakirə edib.

Husilərin hərbi sözçüsü Yəhya Səri bu barədə açıqlama verib. O iddia edib ki, blokada səbəbindən Səudiyyə Ərəbistanına məxsus səkkiz neft tankeri marşrutunu dəyişməyə məcbur qalıb. Tankerlər Ümid burnu istiqamətinə yönəlib.

FIFA etirazlardan sonra Dünya Kuboku üzrə pay satışı planından imtina edib

FIFA prezidenti Canni İnfantino Dünya Kuboku üçün yaradılacaq 20 milyard dollarlıq şirkətin paylarının bir hissinin satılması planından imtina etdiyini bildirib.

Onun sözlərinə görə, təklif fikir ayrılıqlarına səbəb olub və artıq nəzərdə tutulan məqsədə xidmət etmir.

İnfantino “FIFA Forward Enterprise” bölməsinin paylarının 20 faizədək hissəsinin özəl investorlara təklif olunması planının həyata keçirilməyəcəyini deyib.

O bildirib ki, futbolun davamlı inkişafı üçün maraqlı tərəfləri yenidən bir araya gətirmək niyyətindədir. Məqsəd xüsusilə dəstəyə daha çox ehtiyacı olan ölkələrdə futbolu inkişaf etdirməkdir. 

Teqlər

Kiyev Rusiya- Ukrayna müharibəsi raket hücumu Qəzza Husilər