“New York Post”: FIFA Dünya Kuboku ilə bağlı 20 milyard dollarlıq pay satışı planından imtina edib

FIFA-nın nəhəng biznesinin bir hissəsini xarici investorlara satmaq planı baş tutmayıb. Bu barədə iyulun 31-də “New York Post” məlumat yayıb.

Xəbərə görə, planın reallaşmasına dünya üzrə futbol rəsmilərinin etirazı və FIFA rəhbərliyi daxilində yaranan ciddi fikir ayrılıqları maneə olub.

Mənbələr bildiriblər ki, FIFA yeni biznes bölməsinə aid paylarının 20 faizini sataraq 4,2 milyard dollaradək vəsait cəlb etməyi planlaşdırırdı. Bölmənin ümumi dəyəri 20 milyard dollar hesablanırdı. Lakin plan artıq qüvvədə deyil.

Reuters bu məlumatı təsdiqləyə bilməyib. FIFA isə müvafiq sorğuya cavab verməyib.

UEFA plana qarşı çıxıb

İyulun 28-də açıqlanan təklif UEFA-nın etirazına səbəb olub. Avropa futbolunun idarəetmə qurumu FIFA-nı futbolun “ruhunu” satışa çıxarmaqda ittiham edib.

İyulun 30-da UEFA-ya üzv 55 ölkə FIFA turnirlərini boykot etmək barədə yekdil qərar qəbul edib. Qərar İspaniya millisinin dünya çempionu olmasından iki həftədən az vaxt sonra verilib.

FIFA prezidenti Canni İnfantinonun əsas müşavirlərindən biri olan Karlos Kordeyro plana etiraz olaraq iyulun 31-də istefa verib.

FIFA-nın əməliyyatlar üzrə direktoru Kevin Lamur da təklifi tənqid edib. O, əməkdaşların aldadıldığını bildirib və bu planın yalnız bir nəfərin layihəsi olduğunu söyləyib.

FIFA təklifi müdafiə edib

FIFA Dünya Kubokunu və digər turnirləri idarə etmək üçün 20 milyard dollar dəyərində “FIFA Forward Enterprise” adlı törəmə şirkət yaratmağı planlaşdırırdı.

Təşkilat “futbolun satılmadığını” bildirib və təklifin mediada yanlış təqdim edildiyini deyib.

FIFA-nın məlumatına görə, investor qrupuna Coşua Kuşnerin təsis etdiyi “Thrive Capital”ın idarə etdiyi “Thrive Eternal” fondu rəhbərlik etməli idi.

Coşua Kuşner ABŞ Prezidenti Donald Trampın kürəkəni Cared Kuşnerin qardaşıdır.

Teqlər

FIFA Dünya Kuboku 20 milyard dollarlıq pay satışı planı UEFA Avropa futbolu Canni İnfantino inestisiya futbol