"AnewZ" səhər xülasəsi – 2 avqust 2026

Günə “AnewZ” səhər xülasəsi ilə məlumatlı başlayın. 2 avqust üçün hazırladığımız icmalda gündəmin əsas xəbərləri və diqqətçəkən son hadisələr yer alır.

Tramp İrana planlaşdırılan yeni zərbələri dayandırıb

ABŞ Prezidenti Donald Tramp bildirib ki, Tehranın nüvə təhdidinə son qoyulması və Hörmüz boğazının yenidən açılması ilə bağlı qısa müddətdə razılaşma əldə edilərsə, İrana yeni hücum həyata keçirilməyəcək.

Trampın sözlərinə görə İran və Yaxın Şərqin digər ölkələri razılaşmanın tamamlanması üçün əlavə vaxt istəyiblər. O, İsrailin də bu öhdəliyə qoşulduğunu bildirib. Lakin İsrail tərəfi məsələ ilə bağlı açıqlama verməyib.

İran isə ABŞ-yə vəziyyəti daha da gərginləşdirə biləcək hər hansı addımdan çəkinmək barədə xəbərdarlıq edib və mümkün hücumlara qətiyyətlə cavab veriləcəyini bildirib.

İsrailin Qəzzaya zərbələri nəticəsində 4 nəfər ölüb

Fələstin səhiyyə rəsmilərinin məlumatına görə Qəzza şəhəri və Deyr əl-Bəlah İsrail zərbələrinə məruz qalıb.

Hücumlardan biri nəticəsində 1 kişi və həyat yoldaşı həlak olub, daha 4 nəfər isə yaralanıb. Digər zərbə zamanı isə 1-i uşaq olmaqla  2 nəfər ölüb.

İsrail Müdafiə Qüvvələri məsələ ilə bağlı açıqlama verməyib.

Tramp HƏMAS-ın ABŞ-nin dəstəklədiyi təşəbbüs çərçivəsində tərk-silah olunmağa razılıq verdiyini bildirib. Onun “Sülh Şurası” isə razılaşmanın həyata keçirilməsi üçün nəzərdə tutulan addımları əks etdirən 15 bəndlik yol xəritəsi yayımlayıb.

Moskvada qadının üzərindəki bomba partlayıb: 3 ölü, 21 yaralı

Rəsmilərin məlumatına görə 1 avqust tarixində Moskvanın mərkəzində yerləşən lüks İtaliya restoranının yaxınlığında qadının üzərində olan əldəqayırma bombanın partlaması nəticəsində 3 nəfər həlak olub, azı 21 nəfər yaralanıb.

Polis bildirib ki, partlayış yerli vaxtla saat 20:00-dan bir qədər əvvəl Kudrinskaya meydanındakı “Balzi Rossi” restoranının yaxınlığında baş verib.

Rusiyanın Milli Antiterror Komitəsinin məlumatına görə, qadın restorana daxil olmağa cəhd göstərib, lakin mühafizəçi tərəfindən saxlanılıb. Bundan sonra baş verən partlayış nəticəsində qadın, mühafizəçi və restoranın müştərilərindən biri həlak olub.

İspaniyaya keçə bilməyən miqrantlar Seutadan geri qayıdırlar

Bu həftə üzərək və ya hasarları aşaraq İspaniyanın Afrikadakı Seuta eksklavına daxil olan miqrantlar Mərakeşə qayıtmağa başlayıblar.

Onlar aclıq, yorğunluq və ağır şəraitin Avropada yeni həyat qurmaq ümidlərinə son qoyduğunu bildiriblər.

Bir neçə miqrant yerli sakinlərin düşmən münasibəti ilə üzləşdiklərini də iddia edib. Onların sözlərinə görə, bəziləri hücuma məruz qalıb, digərləri isə müəyyən əraziləri tərk etməyə məcbur edilib.

Yunanıstan, Fransa və İspaniyada meşə yanğınları ilə mübarizə davam edir

Güclü küləklərin təsiri ilə yayılan meşə yanğınları Yunanıstanın bir sıra bölgələrini əhatə edib. İnsanlar təhlükəli ərazilərdən təxliyə olunub, rəsmilər isə İspaniya və Fransada vəziyyətin daha da ağırlaşa biləcəyi barədə xəbərdarlıq ediblər.

Yunanıstanda Agia Paraskevi, Krio Pigadi və Agios Nektarios da daxil olmaqla bir neçə ərazinin boşaldılması barədə göstəriş verilib. Yanğının yayılmasının qarşısını almaq üçün helikopterlər vasitəsilə alovların üzərinə su və yanğınsöndürən maddələr atılıb.

Fransanın cənub-şərqində yerləşən Var departamentində nəzarət altına alınan meşə yanğını yenidən alovlanıb. Nəticədə 2 500-ə yaxın insan təhlükəsiz ərazilərə təxliyə edilib.

Fransanın Baş naziri Sebastyen Lekornü isə müsahibəsində yanğınlardan ən çox zərər çəkən Jirond departamentində vəziyyətin yenidən sabitləşdiyini bildirib.

Teqlər

səhər xülasəsi ABŞ İran meşə yanğınları Moskva İspaniya Yunanıstan xəbərlər İsrail Qəzza