İsrailin Qəzzaya zərbələri 18 nəfərin ölümünə səbəb olub

İsrailin Qəzzaya endirdiyi zərbələr nəticəsində azı 18 nəfər həlak olub. Hücumlar atəşkəs planının icrası ilə bağlı səylərin davam etdiyi bir vaxtda baş verib.

Zərbələr Qəzza şəhəri, Deyr əl-Bəlah və Xan Yunisə endirilib. Fələstin rəsmiləri bildiriblər ki, bu son həftələrdə qeydə alınan ən yüksək gündəlik ölüm göstəricisi olub.

Tibb işçilərinin məlumatına görə, hücumlar zamanı çadırlar, evlər və bir yaşayış binası vurulub. Həlak olanlar arasında eyni ailənin üzvləri də var.

İsrail ordusu bəzi zərbələrin HƏMAS-ın komandirlərini və silahlı üzvlərini hədəf aldığını bildirib. Ordu mülki itkilərlə bağlı məlumatları araşdırdığını açıqlayıb.

Hücumlar Donald Trampın HƏMAS və digər silahlı qrupların atəşkəs planı çərçivəsində tərksilah olunmağa razılaşdığını bildirməsindən bir neçə gün sonra baş verib.

İsrail HƏMAS-ın tərk-silahını tələb edir

İsrailin energetika naziri və təhlükəsizlik kabinetinin üzvü Eli Koen bildirib ki, HƏMAS-a tərk-silah olunmaq üçün vaxt veriləcək. Lakin o, qrupun bu tələbi yerinə yetirəcəyinə şübhə etdiyini deyib.

Koenin sözlərinə görə, Qəzzada İsrailin hərbi əməliyyatlarının dayandırılması ilə bağlı razılaşma yoxdur. O bildirib ki, növbəti addımların atılması üçün əvvəlcə HƏMAS tərk-silah edilməlidir.

Baş nazir Benyamin Netanyahunun ofisindən bildirilib ki, İsrail tərk-silah planı ilə bağlı narahatlığını rəsmi Vaşinqtona çatdırıb. Qeyd olunub ki, HƏMAS tam tərksilah edilmədən növbəti mərhələyə keçmək mümkün deyil.

HƏMAS İsraili atəşkəs səylərinə mane olmaqda ittiham edir

HƏMAS İsraili hücumları gücləndirərək bölgədə yeni reallıq yaratmağa çalışmaqda ittiham edib.

Qrup bildirib ki, silahların təhvil verilməsi məsələsinə yalnız İsrail hücumları dayandırdıqdan və qüvvələrini Qəzzadan çıxardıqdan sonra baxıla bilər.

ABŞ-nin rəhbərlik etdiyi “Sülh Şurası”nın Qəzza üzrə nümayəndəsi Nikolay Mladenov isə gərginliyin azaldılması və təklif olunan yol xəritəsinin həyata keçirilməsi üçün vasitəçilər və regional tərəfdaşlarla danışıqların davam etdiyini bildirib.

Oktyabrda əldə olunan atəşkəs razılaşmasına baxmayaraq, qarşıdurma davam edir. Qəzzanın səhiyyə qurumlarının məlumatına görə, həmin vaxtdan bəri İsrailin zərbələri nəticəsində 1 200-dən çox fələstinli həlak olub. İsrail isə eyni dövrdə dörd hərbçisinin öldürüldüyünü bildirib. 

Teqlər

İsrail Qəzza fələstinli HƏMAS atəşkəs danışıqları hava zərbələri Benyamin Netanyahu