Dunayda suyun səviyyəsi rekord həddə enib: Macarıstanın baş naziri xəbərdarlıq edib

Dunay çayında suyun səviyyəsinin rekord həddə enməsi ölkənin yeganə atom elektrik stansiyası olan Paks AES-in fəaliyyətini dayandırmasına səbəb olub. Bu barədə Macarıstanın baş naziri Peter Maqyar avqustun 2-də bildirib.

Bu, son 40 ildə ilk dəfə baş verib.

İki giqavat gücündə olan stansiya Rusiyada istehsal edilmiş dörd reaktorla işləyir. Paks AES tam dayanmazdan əvvəl ümumi gücünün 10 faizindən bir qədər artıq güclə fəaliyyət göstərirdi.

Stansiya reaktorların soyudulması üçün Dunayın suyundan istifadə edir. Lakin uzunmüddətli quraqlıq və ekstremal istilər çayda suyun səviyyəsini rekord həddə endirib və soyutma üçün kifayət qədər su qalmayıb.

Macarıstanın su idarəsi Dunayda suyun səviyyəsinin yaxın günlərdə daha da enəcəyini bildirib. Ölkədə havanın temperaturunun 40 dərəcə Selsiyədək yüksələcəyi gözlənilir.

Elektrik şəbəkəsinə təzyiq artır

Paks AES normal şəraitdə təxminən 2 min meqavat elektrik enerjisi istehsal edir və Macarıstanın enerji tələbatının böyük hissəsini qarşılayır. Stansiyanın fəaliyyətinin dayanması ölkəni ehtiyat elektrik stansiyalarından və idxal olunan enerjidən daha çox istifadə etməyə məcbur edib.

Dunayda suyun səviyyəsinin enməsi yük daşımalarına və turizmə də təsir göstərib. Budapeşt ətrafındakı yaşayış məntəqələri də daxil olmaqla, 100-dən çox şəhər və kənddə sudan istifadəyə məhdudiyyətlər qoyulub.

Hökumət məhdudiyyətlərə hazırlaşır

Maqyar şirkətləri, dövlət qurumlarını, yerli hakimiyyət orqanlarını və əhalini saat 17:00-dan 22:00-dək elektrik enerjisi istehlakını azaltmağa çağırıb.

Fövqəladə tədbirlərə əsasən, tələblərə riayət etməyən iri sənaye müəssisələri elektrik şəbəkəsindən ayrıla bilər. Hökumət pik saatlarda yük qatarlarının hərəkətinin dayandırılmasını və bəzi dövlət sektoru əməkdaşlarının həftənin ilk üç günü evdən işləməsini də tapşırıb.

Böhran 630 milyon dollara başa gələ bilər

“Tisza” partiyasının sədr müavini Mark Radnainin sözlərinə görə, böhran Macarıstana 100–200 milyard forint, yəni təxminən 315–630 milyon dollar məbləğində zərər vura bilər.

Xərclərin əsas hissəsi Paks AES-də dayandırılan istehsalı əvəz etmək məqsədilə idxal olunan elektrik enerjisinin bahalaşması ilə bağlıdır.

Teqlər

Macarıstan Budapeşt Peter Maqyar Dunay suyun səviyyəsi Paks AES ekstremal istilər