Mərakeş Seutaya miqrant axınını İspaniya məhkəməsinin qərarı ilə əlaqələndirir

Mərakeş ötən həftə İspaniyanın Seuta eksklavına kütləvi miqrant keçidlərini İspaniya məhkəməsinin son qərarı ilə əlaqələndirib.

Rəsmi Rabat bildirib ki, qərar qeyri-qanuni miqrasiyanın qarşısını alan əsas tədbirlərdən birini zəiflədib və insan qaçaqmalçıları bundan istifadə ediblər.

Hadisələrdən sonra ilk dəfə açıqlama verən yüksəkvəzifəli Mərakeş rəsmisinin sözlərinə görə, İspaniya qərarın mümkün nəticələrini əvvəlcədən nəzərə almalı idi. Qərar dəniz yolu ilə İspaniyanın Şimali Afrikadakı eksklavlkarına gələn miqrantların dərhal geri qaytarılması imkanını məhdudlaşdırıb.

Minlərlə insan Seutaya keçib

İyulun 30-da minlərlə insan Seutaya keçib. Bu, son illərdə sərhəddə qeydə alınan ən böyük miqrant axınlarından biri olub.

İspaniya rəsmiləri indiyədək təxminən 69500 miqrantın Mərakeşə qaytarıldığını bildiriblər. Mərakeş rəsmilərinin məlumatına görə isə, kütləvi keçidlər zamanı 40 minə yaxın insan Seutaya daxil olub.

Hadisələr ağır humanitar nəticələrə səbəb olub. Belə ki, sərhədin İspaniya tərəfində 72, Mərakeş tərəfində isə 11 nəfər həlak olub.

Sərhədi keçənlərin bir çoxunun təhlükəsiz yerə çatmaq və ya daha yaxşı iqtisadi imkanlar əldə etmək istədiyi bildirilir. Onlar təhlükəli dəniz yollarından keçməyə və ciddi mühafizə olunan sərhəd hasarlarını aşmağa çalışıblar.

İspaniya və Aİ Mərakeşi tənqid edir

İspaniya rəsmiləri Mərakeşin açıqlamasını qəbul etməyiblər.

Seuta regional hökumətinin rəhbəri Xuan Xesus Vivas rəsmi Rabatı miqrant axınını təşviq etməkdə və buna şərait yaratmaqda ittiham edib. 

Avropa Komissiyasının Prezidenti Ursula fon der Lyayen qeyri-qanuni miqrasiyadan Aİ-yə üzv dövlətə siyasi təzyiq vasitəsi kimi istifadə olunmasına qarşı xəbərdarlıq edib.

Mərakeş rəsmisi isə kütləvi keçidlərdən əvvəl sərhəd nəzarətinin zəiflədildiyini təkzib edib. Onun sözlərinə görə, təhlükəsizlik qüvvələrinin sayı dəyişməyib.

Mərakeş bildirir ki, miqrasiya strategiyası qeyri-qanuni keçidlərin qarşısının alınmasına və İspaniya ərazisinə daxil olan miqrantların qısa müddətdə geri qaytarılmasına əsaslanır. Bu məqsədlə ölkənin şimal sahillərində təhlükəsizlik qüvvələrinin təxminən 24 min əməkdaşı yerləşdirilib.

Rəsmi məlumatlara görə, Mərakeş 2024-cü ildə 79 min, 2025-ci ildə isə 74 min qeyri-qanuni keçid cəhdinin qarşısını alıb.

Mərakeş rəsmisi iyulda məhkəmə qərarı çıxarılanadək iki ölkə arasında miqrasiya sahəsində əməkdaşlığın nümunəvi olduğunu bildirib. O əlavə edib ki, Mərakeş Avropa tərəfdaşları ilə əməkdaşlığı davam etdirəcək, lakin miqrasiyaya yalnız təhlükəsizlik məsələsi kimi yanaşan siyasətə qoşulmayacaq. 

Teqlər

Mərakeş İspaniya Seuta miqrant məhkəmə qeyri- qanuni miqrasiya Xuan Xesus Vivas Rabat