Rumıniya nüvə reaktorunu qorumaq üçün qayaları partladıb

Rumıniya quraqlıq səbəbindən suyun səviyyəsi azalan Dunay çayından soyutma suyunu ölkədə fəaliyyətdə olan yeganə nüvə reaktoruna yönəltmək üçün qayalıq ərazidə partlayış həyata keçirib. İlk dəfə atılan bu addım quraqlığın təsirinin artdığını və regionda enerji vəziyyətinin ağırlaşdığını göstərir.

Qonşu Macarıstanda isə rəsmilər Dunaydan soyutma məqsədilə istifadə edən ölkənin yeganə atom elektrik stansiyasının avqustun 4-dək işləyə biləcəyini bildiriblər. Çayda suyun səviyyəsinin aşağı düşməsi stansiyanın fəaliyyətinə ciddi təsir edib.

İsti hava və quraqlıq Avropanın böyük hissəsində çayların səviyyəsini aşağı salıb. Bu vəziyyət su təchizatı, çay nəqliyyatı və elektrik enerjisi istehsalı ilə bağlı narahatlığı artırıb.

Hər iki ölkənin hökuməti əhalini və şirkətləri elektrik enerjisinə qənaət etməyə çağırıb.

Avtomobil zavodları istehsalı dayandırıb

Rumıniyanın Baş naziri İlie Bolocan bildirib ki, "Renault" şirkətinə məxsus "Dacia" və "Ford" avtomobil zavodları avqustun 19-dək istehsalı dayandırmağa razılaşıb. Bu addım elektrik enerjisi istehlakını təxminən 200 meqavat azaldacaq.

“Quraqlığın yaratdığı çətinliklər Mərkəzi və Qərbi Avropa ilə elektrik bağlantılarının məhdud olması səbəbindən daha da artır. Elektrik enerjisi idxal etmək imkanlarımız məhduddur”, – Bolocan bildirib.

"Ford"un Rumıniya bölməsi isə istehsalın yay tətili ilə əlaqədar dayandırılmasının əvvəlcədən planlaşdırıldığını açıqlayıb.

Rumıniyanın elektrik enerjisinə olan tələbatının təxminən beşdəbirini ödəyən dövlətə məxsus "Nuclearelectrica" şirkəti Dunayda suyun səviyyəsi azaldığı üçün ötən həftənin əvvəlində iki reaktorundan birini dayandırıb.

Keçirilən nəzarətli partlayış zamanı su və qaya parçaları havaya qalxıb. Rəsmilər bildiriblər ki, bu, müvəqqəti bəndin tikintisinə imkan yaradacaq. Bənd vasitəsilə daha çox su fəaliyyətdə olan Çernavoda reaktorunun yerləşdiyi çay qoluna yönəldiləcək.

Rumıniya Hərbi Dəniz Qüvvələrinin məlumatına görə, işlər avqustun 5-i başa çatacaq.

AES-nin fəaliyyəti müvəqqəti uzadılıb

Dunayın yuxarı axarında yerləşən Macarıstan daha əvvəl Paks Atom Elektrik Stansiyasının (AES) fəaliyyətini avqustun 3-də dayandırmalı ola biləcəyini bildirmişdi. Lakin rəsmilər stansiyanın azaldılmış güclə avqustun 4-dək işləyə biləcəyini açıqlayıblar.

Adətən Macarıstanın elektrik enerjisinin təxminən yarısını istehsal edən iki giqavat gücündəki Paks Atom Elektrik Stansiyası Dunayda suyun səviyyəsi rekord həddə endikdən sonra avqustun 3-də gücünün 10 faizindən bir qədər çoxu ilə işləyib.

“Bu gün və bəlkə də sabah 240 meqavat enerji istehsal edən sonuncu turbin işləməyə davam edə bilər”, – Macarıstanın Baş naziri Peter Magyar avqustun 3-də bildirib.

Baş nazirin sözlərinə görə, hökumətin çağırışından sonra əhali və şirkətlər elektrik enerjisi istehlakını könüllü şəkildə azaldıblar. Nəticədə tələbat 700 meqavat aşağı düşüb və elektrik şəbəkəsinə təzyiq xeyli azalıb.

Əczaçılıq şirkəti Richter isə növbəti üç həftə ərzində elektrik enerjisi istehlakını 50 faizdən çox azaldacağını bildirib. Şirkət, həmçinin günəş enerjisi parkında istehsal etdiyi gündəlik dörd meqavat elektrik enerjisini şəbəkəyə verməyi təklif edib.

Teqlər

Rumıniya Dunay Macarıstan su sərfiyyatı quraqlıq isti hava Atom Elektrik Stansiyası partlayış