Rusiyanın Kiyevə raket hücumunda bir nəfər ölüb, binalar zədələnib

Rusiyanın Kiyevə raket hücumu nəticəsində bir nəfər həlak olub, azı 12 nəfər yaralanıb. Xilasedicilər dağıntılar altında qala biləcək insanların axtarışını davam etdirirlər.

Gecə yarısından az sonra şəhərdə ardıcıl partlayışlar baş verib. Ballistik raketlərin Kiyevin bir neçə rayonunu hədəfə aldığı bildirilir. Hava hücumu xəbərdarlığı bir saatdan çox davam edib.

Kiyev meri Vitali Kliçko şəhər mərkəzi yaxınlığında bir anbarın dağıldığını, iki nəfərin isə dağıntılar altından çıxarıldığını bildirib.

“Dağıntılar altında hələ də insanlar ola bilər. Axtarış-xilasetmə əməliyyatları davam edir”, – deyə Kliçko bildirib.

Yaralananlar arasında təcili tibbi yardım avtomobilinin sürücüsü də var.

Hücum nəticəsində anbarlarda və digər oxşar obyektlərdə yanğınlar baş verib. Şəhər kənarında raket qalıqlarının yaşayış binasının yaxınlığına düşməsi güclü yanğına səbəb olub.

Şəhər hərbi administrasiyası zərbələrdən sonra ammonyak sızmasının qeydə alındığını və fövqəladə hallar xidmətlərinin ərazidə iş apardığını açıqlayıb.

Ukrayna rəsmilərinin məlumatına görə, təxminən üç milyon əhalisi olan Kiyevdə yeddi ərazi hədəfə alınıb. 

Rusiya son həftələrdə Ukrayna paytaxtına raket və PUA-lar ilə hücumlarını artırıb. Kiyev son bir ayda gecə saatlarında dəfələrlə hava zərbələrinə məruz qalıb.

Kopyalandı