Netanyahu: "HƏMAS tərk-silah olunmadan Qəzzadan çəkilməyəcəyik"

İsrailin Baş naziri Benyamin Netanyahu bildirib ki, HƏMAS tam tərk-silah olunmayınca İsrail qüvvələri Qəzzadakı mövqelərindən geri çəkilməyəcək. Bu açıqlama müharibəni dayandırmaq məqsədi daşıyan və Amerika Birləşmiş Ştatlarının (ABŞ) dəstəklədiyi təkliflə bağlı şübhələri artırıb.

Netanyahu avqustun 5-də yayımlanan videomüraciətində İsrailin təhlükəsizlik maraqlarını qorumaqda qətiyyətli olduğunu bildirib. O, ABŞ Prezidenti Donald Trampın komandasının təqdim etdiyi son təklif layihəsinin qəbul edilmədiyini deyib.

“HƏMAS tam tərk-silah olunmayınca mövcud mövqelərimizdən geri çəkilməyəcəyik”, – deyə Netanyahu bildirib.

İsrail təklifə düzəlişlər verib

Netanyahunun sözlərinə görə, Tramp administrasiyası HƏMAS-ın tərk-silahına və Qəzzanın demilitarizasiyasına nail ola biləcəyinə inanır. Lakin İsrail təkliflə bağlı öz qeydlərini təqdim edib.

“Bizə layihə göndərdilər. Biz onunla razılaşmadıq. Bu, bizim layihəmiz deyildi. Öz qeydlərimizi onlara göndərdik”, – deyə Netanyahu bildirib.

O əlavə edib ki, İsrail danışıqlar barədə məlumatlar mediada yayılmazdan əvvəl mövqeyini qarşı tərəfə çatdırıb.

Netanyahu İsrail hərbçilərinə özlərini, ölkə ərazisini və vətəndaşları qorumaq üçün “zəruri olan hər şeyi etmək” göstərişi verildiyini də bildirib.

Oktyabrda əldə olunan atəşkəs razılaşmasına əsaslanan və ABŞ-nin dəstəklədiyi yol xəritəsi HƏMAS-ın tərk-silahını və İsrail qüvvələrinin mərhələli şəkildə geri çəkilməsini nəzərdə tutur. Təklifə, həmçinin beynəlxalq sabitləşdirmə qüvvələrinin yerləşdirilməsi və Qəzzanı idarə edəcək Fələstin texnokrat hökumətinin yaradılması daxildir.

Danışıqlar davam edir

Netanyahunun açıqlaması Trampın Sülh Şurasının Qəzza üzrə xüsusi nümayəndəsi Nikolay Mladenovun İsrailin Baş naziri və digər rəsmilərlə görüşündən bir gün sonra verilib. Şura görüşü “konstruktiv və ətraflı” adlandırıb.

Tramp ötən həftə təklifi münaqişənin sona çatması istiqamətində “mühüm mərhələ” kimi qiymətləndirib. Lakin İsrail qüvvələrinin geri çəkilməsi və HƏMAS-ın tərk-silahının hansı ardıcıllıqla həyata keçirilməsi ilə bağlı tərəflər arasındakı fikir ayrılıqları hələ də həllini tapmayıb.

Bir ailənin 112 üzvü dəfn edilib

Netanyahunun açıqlaması fonunda Qəzza şəhərində eyni böyük ailənin 112 üzvünün qalıqları avqustun 4-də dəfn edilib. Onlar təxminən üç il əvvəl İsrailin hava hücumları nəticəsində həlak olublar.

Əsasən çürümüş cəsədlər Fələstin bayraqlarına bükülərək Qəzza şəhərinin Sabra məhəlləsində, əvvəllər evlərin yerləşdiyi açıq ərazidə yan-yana düzülüb. Bəzi bayraqların üzərinə həlak olanların fotoları vurulub.

Qəzza Mülki Müdafiə Xidmətinin sözçüsü Mahmud Basal bildirib ki, Əbu Şəriə və əl-Həsayinə ailələrinin 112 üzvünün qalıqlarını məhdud avadanlıqla dağıntılar altından çıxarmaq 17 gün çəkib. Onlar 2023-cü il noyabrın 22-də İsrailin hava hücumları nəticəsində həlak olublar.

Basalın sözlərinə görə, qurbanların kimliyi adları yazılmış qızıl boyunbağılar, əvvəlki əməliyyatlardan qalan implantlar və yaxınlarının tanıdığı geyimlər əsasında müəyyən edilib. O əlavə edib ki, Qəzzada 8 mindən çox insanın cəsədi hələ də dağıntılar altındadır.

Fələstinlilər 2023-cü ildə İsrail hücumunda həlak olan 112 nəfəri Qəzzada dəfn edirlər, 4 avqust 2026. Reuters / Davud Əbu Əlqas

Qurbanların qohumu Taysir əl-Həsayinə həmin gün ailənin kədərini yenidən yaşadığını bildirib.

“Bu müharibəni dayandırın. Bu məzlum insanlara qarşı qırğınlara son qoyun. Qəzza xalqı həyatı və sülhü sevir. Onlar da dünyanın digər xalqları kimi sülh içində yaşamaq istəyirlər”, – deyə o, dəfn mərasimi zamanı bildirib.

Kopyalandı