Banqkok yaxınlığında hökumət idarəsində atəş açan şəxs saxlanılıb

Avqustun 10-da Banqkok yaxınlığında yerli hökumət idarəsində atəş açan şəxs saxlanılıb. Keçmiş deputat olduğu bildirilən şübhəli yüksəkvəzifəli əyalət rəsmisinə atəş açıb. Hadisə nəticəsində iki nəfər yaralanıb. Xəsarət alanlar xəstəxanaya çatdırılıblar.

İnsident Debsirin Nonthaburi məktəbində baş verən silahlı hücumdan bir neçə gün sonraya təsadüf edib. Həmin hücumda 14 yaşlı şübhəli də daxil olmaqla, 9 nəfər ölüb, 20-dən çox insan yaralanıb.

Hadisələrdən sonra Baş nazir Anutin Çarnvirakul silahlara nəzarətin gücləndiriləcəyini bildirib. Məktəbdə metal detektorlar quraşdırılıb və təhlükəsizlik tədbirləri artırılıb.

Tailandın Təhsil Nazirliyi növbəti üç ay ərzində məktəblər üçün yeni təhlükəsizlik qaydaları hazırlamağı planlaşdırır. Onlar psixoloji vəziyyətin qiymətləndirilməsi, fövqəladə hallara hazırlıq təlimləri, məktəbdə zorakılığın qarşısının alınması və qadağan olunmuş əşyaların aşkarlanması tədbirlərinin təkmilləşdirilməsini əhatə edəcək.

Hökumət ictimai yerlərdə odlu silah gəzdirilməsinə nəzarətin daha da gücləndirilməsini tapşırıb. Polisin yoxlama məntəqələri yaratması və silahların saxlanması, daşınması və istifadəsinə nəzarəti gücləndirməsi gözlənilir.

“Heç kimin, xüsusilə də ictimai yerdə, odlu silah gəzdirmək hüququ yoxdur”, – Anutin bildirib.

Tailand Cənub-Şərqi Asiyada mülki silah sahibliyinin yüksək olduğu ölkələrdən biridir. “Small Arms Survey” təşkilatının 2017-ci il hesablamasına görə, ölkədə mülki əhalinin əlində təxminən 10,3 milyon odlu silah olub.

Mövcud qaydalara əsasən, silah lisenziyası üçün müraciət edən şəxslərdən psixoloji müayinə tələb olunmur. İyirmi yaşdan yuxarı şəxslər odlu silah sahibi ola bilər, lisenziya sahiblərinin isə mütəmadi olaraq yenidən qiymətləndirilməsi nəzərdə tutulmur.

Son silahlı insidentlər Tailandda silah qanunlarının sərtləşdirilməsi ilə bağlı çağırışları yenidən gücləndirib.

Kopyalandı