Putin: "Rusiya gəmilərinə müdaxilə cavabsız qalmayacaq"

Rusiya Prezidenti Vladimir Putin Sakit Okean Donanmasının təlimləri zamanı Yaponiya, NATO və Qərbin Rusiya kommersiya gəmilərinə qarşı mümkün addımlarını tənqid edib. O, bu fikirləri Yaponiyanın iddia etdiyi İturup adasına ilk səfəri zamanı səsləndirib.

Putin bildirib ki, Qərb ölkələri Rusiyanın idarə etdiyi kommersiya gəmilərini ələ keçirməyə cəhd göstərərsə, Moskva buna analoji cavab verəcək və zəruri hesab etdiyi ərazilərdə müvafiq tədbirlər görəcək.

Onun sözlərinə görə, bəzi ölkələr Rusiya şirkətlərinin gəmilərinin sərbəst hərəkətini məhdudlaşdırmağa çalışır və bu, beynəlxalq dəniz hüququnun pozulmasıdır.

“Bu, açıq-aşkar piratlıq və qarətdir. Belə planlar həyata keçirilməyə başlanarsa, biz də eyni şəkildə cavab verməyə məcbur olacağıq”, – Putin bildirib.

O əlavə edib ki, Rusiya cavab tədbirlərini eyni sularda deyil, zəruri və məqsədəuyğun hesab etdiyi başqa ərazilərdə, o cümlədən Sakit Okean Donanmasının məsuliyyət zonasında həyata keçirə bilər.

Putin Yaponiyaya da toxunaraq, Ukrayna müharibəsinə görə Rusiyaya sanksiyalar tətbiq edən Tokionun mövqeyini anlamaq istədiklərini bildirib. O, Rusiyanın Yaponiyanı təhdid etmədiyini və bu ölkəyə qarşı “heç bir iddiasının olmadığını” deyib.

“Əksinə, ölkəmizə qarşı ərazi iddiaları irəli sürən tərəf Yaponiyadır”, – Putin Kuril adaları ilə bağlı mübahisəyə toxunaraq bildirib.

Yaponiya Rusiyanın idarə etdiyi və “Şimal əraziləri” adlandırdığı adalara uzun müddətdir iddia edir. Onilliklərdir davam edən bu mübahisə iki ölkənin İkinci Dünya müharibəsindən sonra rəsmi sülh müqaviləsi imzalamasına mane olub.

Putinin açıqlamaları onun Kuril adaları silsiləsindəki dörd adadan biri olan İturupa ilk səfəri zamanı səsləndirilib. Səfər Tokionun etirazına səbəb olub.

"Reuters"in məlumatına görə, Putin Avropa ölkələrinin Rusiya gəmilərini ələ keçirəcəyi təqdirdə Moskvanın cavab verəcəyini bildirib.

O, Asiya-Sakit okean regionunda qarşıdurma riskinin artdığını deyib. Putin NATO-nu regionda fəallığını genişləndirməkdə, yeni hərbi-siyasi blokları isə Rusiyaya təhlükə yaradan silah sistemlərini yerləşdirməkdə və ya yerləşdirməyi planlaşdırmaqda ittiham edib.

Putin gərginliyi Arktika və Şimal Dəniz Marşrutu ilə də əlaqələndirib. O bildirib ki, Rusiya beynəlxalq dəniz hüququ çərçivəsində bu marşrutda maraqlı olan ölkələrlə, o cümlədən Çin və Hindistanla əməkdaşlığa hazırdır.

Putin bu fikirləri “Varyaq” qvardiya raket kreyserinin göyərtəsində səsləndirib. O, burada Sakit Okean Donanmasının təlimlərinin yekun mərhələsində iştirak edib və donanmanın komandanı Viktor Liinadan məruzə dinləyib.

Teqlər

Vladimir Putin Rusiya yaponiya Nato İturup adası Moskva Sakit okean Kuril adaları