"Meta" Avstraliyada 16 yaşdan kiçiklərə aid 750 mindən çox hesabı silib

“Meta” Avstraliyada 16 yaşdan kiçiklərə aid olduğu ehtimal edilən 750 mindən çox “Facebook” və “Instagram” hesabını silib. Addım ölkədə yeniyetmələrin sosial mediadan istifadəsinə qoyulan qadağanın sərtləşdirilməsi fonunda atılıb.

Şirkətin məlumatına görə, 16 yaşından kiçik avstraliyalılara aid olduğundan şübhələnilən 462 min "Instagram" və 294 min "Facebook" hesabı bağlanıb. Müqayisə üçün qeyd edək ki, yanvar ayınadək 331 min "Instagram" və 173 min "Facebook" hesabı silinmişdi.

"Meta" qanunun əleyhinə olmasına baxmayaraq, Avstraliyanın bu qaydalarına əməl etmək istədiyini bildirir. Ölkənin internet tənzimləyicisi isə qadağaya əməl etməyən platformalara qarşı hüquqi addımlar atmağı planlaşdırır.

Hələlik heç bir digər platforma "Meta" kimi eyni dövrü əhatə edən hesabat açıqlamayıb. Lakin Avstraliya hökumətinin məlumatları və müstəqil araşdırmalar göstərir ki, qadağanın ilk üç ayı ərzində hər 10 yeniyetmədən 8-i (16 yaşdan kiçik) hələ də sosial mediadan istifadə etməyə davam edib.

Sosial medianın uşaq və yeniyetmələrin fiziki və psixi sağlamlığına mənfi təsirlərindən narahat olan Avstraliya hökumətinin qəbul etdiyi bu tarixi qanun dekabrın 10-da qüvvəyə minib. Hazırda başqa ölkələr də oxşar qadağalar barədə düşünür. Avstraliya isə sosial media şirkətlərini bu qadağanı qəsdən pozmağa çalışmaqda günahlandırır.

Hökumət qaydaları pozanlar üçün maksimum cəriməni ikiqat artıraraq 99 milyon Avstraliya dollarına (təxminən 69,75 milyon ABŞ dolları) çatdıran və tənzimləyiciyə daha çox səlahiyyət verən yeni qanun layihəsi təqdim edib.

Parlament dinləmələri keçiriləcək

Cümə günü "Meta", "TikTok", "Google" və "Snap" şirkətlərinin nümayəndələri tənzimləyici və hökumət rəsmiləri ilə birlikdə yeni qaydalarla bağlı parlament komissiyasına ifadə verəcəklər.

"Meta"nın açıqlamasında deyilir: "Qaydaların icrası davam edir və silinən hesabların sayı daha da artacaq. Avstraliya hökumətinin gənclər üçün təhlükəsiz və yaşa uyğun internet mühiti yaratmaq məqsədini bölüşürük və qanunla müəyyən edilmiş öhdəliklərimizi yerinə yetiririk".

Yaş yoxlanışı diqqət mərkəzindədir

2025-ci ildə Avstraliyada yaşın müəyyənləşdirilməsi texnologiyaları üzrə aparılan sınaqlar göstərib ki, bazarda olan mövcud proqramlar qadağanın icrasına effektiv şəkildə dəstək ola bilər.

"Meta"nın sahib olduğu şəbəkələr də daxil olmaqla, əksər böyük platformalar fotoşəkil əsasında yaşı təxmin edən proqramlar tətbiq ediblər. Lakin şirkətlər bildirirlər ki, onlar adətən əvvəlcə istifadəçinin onlayn fəaliyyətinə (bəyənmələr, paylaşımlar və s.) əsaslanaraq onun yaşını təxmin etməyə çalışırlar.

"Meta" süni intellektdən istifadə edərək profilləri təhlil etdiyini və yaşı çatmayanlara aid olması şübhə doğuran hesablarla bağlı şikayətləri araşdırdığını açıqlayıb.

Teqlər

Meta Avstraliya sosial media yaş məhdudiyyəti onlayn təhlükəsizlik Instagram Facebook