BMT: Ukraynada mülki itkilər 2022-ci ildən bəri ən yüksək həddə çatıb

BMT-nin məlumatına görə, keçən ay Ukraynada ən azı 437 mülki şəxs həlak olub, 2610 nəfər isə yaralanıb. Bu, 2022-ci ilin mart ayından bəri qeydə alınan ən yüksək aylıq mülki itki göstəricisidir.

Bildirilib ki, bu rəqəm iyun ayı ilə müqayisədə 30 faiz, 2025-ci ilin iyul ayı ilə müqayisədə isə 70 faiz artım deməkdir. Eyni zamanda, Rusiyada da mülki itkilər artıb — iyul ayında 79 mülki şəxs həlak olub, 601 nəfər xəsarət alıb.

Ukraynada müharibənin başladığı 24 fevral 2022-ci ildən bəri BMT ən azı 16874 mülki şəxsin (o cümlədən 820 uşaq) həlak olduğunu, 51173 nəfərin (o cümlədən 3126 uşaq) yaralandığını təsdiqləyib. Rusiyanın Ukraynaya genişmiqyaslı hücumu artıq beşinci ilinə daxil olub və hələlik heç bir diplomatik həll görünmür.

Ukrayna Rusiyanın enerji infrastrukturunu hədəf alır

Leninqrad vilayətinin qubernatoru Aleksandr Drozdenkonun "Telegram" kanalında verdiyi məlumata görə, cümə günü Rusiyanın Baltik dənizindəki neft və enerji ixracının əsas mərkəzlərindən olan Ust-Luqa limanında dron hücumunun törətdiyi yanğın söndürülür.

Neft və neft məhsullarının böyük həcmdə ixrac edildiyi Ust-Luqa ətrafında hücumun dəf edilməsi zamanı Leninqrad vilayəti üzərində 50-dən çox PUA-nın vurulduğu bildirilir.

Ukrayna hərbi rəsmilərinin məlumatına görə, Ukrayna dronları Rusiyanın dərinliklərində yerləşən iri neft emalı zavodunu da vurub. Bu, Kiyevin Rusiyanın energetika sektoruna qarşı kampaniyası çərçivəsində son üç gündə hədəf alınan dördüncü zavoddur. Ukrayna Baş Qərargahı zavodun Rusiyanın ən böyük NEZ-lərindən biri olduğunu bildirib. Müəssisə ildə 74 milyon barelə qədər neft emal edərək benzin, dizel və digər neft məhsulları istehsal etmək gücünə malikdir.

Ukrayna rəsmiləri bu zərbələrin Rusiyanın hərbi kampaniyasını maliyyələşdirmək imkanlarını məhdudlaşdırmaq məqsədi daşıdığını bildirirlər. Bu hücumlar Rusiyanın neft emalı gücünə təsir edib və bəzi yanacaqdoldurma məntəqələrində yanacaq qıtlığına səbəb olub, lakin bu kampaniyanın Moskvanı sülh sazişi axtarmağa sövq etdiyinə dair hələlik heç bir əlamət yoxdur.

Rusiyanın Qara dənizdəki taxıl terminalları təhlükə altındadır

Məlumata görə, bu həftənin əvvəlində Ukraynanın Rusiyanın Qara dənizdəki Novorossiysk limanına təşkil etdiyi kütləvi dron və raket hücumu nəticəsində iki böyük taxıl ixracı terminalı zədələnib və Rusiyanın Qara dənizdə qalan əsas hərbi dəniz bazası hədəf alınıb.

Ukrayna Prezidenti Volodimir Zelenski Rusiya hərbi dəniz bazasına hücumu "unikal əməliyyat" adlandırıb. O bildirib ki, əməliyyat zamanı raketlərdən, reaktiv və dəniz dronlarından istifadə edilib. O, taxıl terminallarına dəymiş ziyan barədə məlumat verməyib.

Rusiyanın Qara Dəniz Donanmasının böyük hissəsi hazırda Novorossiyskdə yerləşir. Donanma Ukraynanın kəskinləşən hücumları səbəbindən işğal altındakı Krımın Sevastopol şəhərindən bura köçürülüb.

Kiyev Qara dənizdə gəmiçilik sazişi təklif edir

"Reuters"in məlumatına görə, Ukrayna mühüm dəniz ticarət marşrutunu bərpa etmək cəhdi çərçivəsində Qara dənizdə mülki gəmilərə hücumları dayandırmaq üçün Rusiyaya saziş təklif edib. Kiyevin bu təklifi üçüncü tərəf vasitəsilə etdiyi bildirilir, lakin Moskva hələ ki buna cavab verməyib.

Qara dəniz hər iki ölkə üçün, xüsusilə taxıl və digər ərzaq məhsullarının ixracı baxımından vacib marşrutdur. Ukrayna limanları ölkənin kənd təsərrüfatı sektoru üçün həyati əhəmiyyət kəsb edir; taxıl və günəbaxan ixracının təxminən 90 faizi Odessa və qonşu Çornomorsk limanı vasitəsilə həyata keçirilir.

Ukrayna iyul ayından bəri dəniz dronları ilə Qara dəniz və Azov dənizində 220-yə yaxın Rusiya gəmisini (o cümlədən neft tankerləri, taxıldaşıyan gəmilər və sərnişin bərələrini) vuraraq bölgədə Rusiyanın kommersiya gəmiçiliyini faktiki olaraq məhdudlaşdırıb.

Bu kampaniya həmçinin Rusiyanı öz çay şəbəkəsi vasitəsilə Xəzər dənizini Azov dənizi ilə birləşdirən kanalla daşımaları dayandırmağa məcbur edib.

Rusiya isə öz növbəsində Ukraynanın cənub limanlarına hücumları intensivləşdirərək ölkənin kənd təsərrüfatı ixracına təzyiqi daha da artırıb.

İki ölkə əvvəllər 2022-ci ildə Türkiyə və BMT-nin vasitəçiliyi ilə əldə olunmuş Qara Dəniz Taxıl Təşəbbüsündə iştirak edib. Müqavilə müharibəyə baxmayaraq Ukrayna taxılının ixracını davam etdirməyə imkan verirdi, lakin Rusiya Qərb sanksiyalarının kənd təsərrüfatı ixracına təsirindən narahatlığını əsas gətirərək müqaviləni yeniləməkdən imtina etdikdən sonra 2023-cü ilin iyulunda başa çatdı.

Ukrayna daha sonra dəniz dronlarından istifadə edərək Rusiya hərbi gəmilərinə hücum etməklə və Rusiya Qara Dəniz Donanmasının böyük hissəsini Sevastopoldan Novorossiyskə doğru sıxışdırmaqla dəniz marşrutunu müstəqil şəkildə yenidən açdı.

Latviya qısamüddətli hava həyəcanı elan edib

Bu arada, Rusiya və Belarusla həmsərhəd olan Aİ və NATO üzvü Latviya cümə günü ölkənin şərq hissəsində qısamüddətli hava həyəcanı siqnalı verib.

Latviya Silahlı Qüvvələrinin məlumatına görə, müttəfiq qırıcılar Latviya hava məkanında PUA-nı vurduqdan sonra həyəcan siqnalı bir saatdan az müddətdə ləğv edilib. Latviya PUA barədə təfərrüatları dərhal açıqlamayıb və onun mənşəyini göstərməyib.

Müdafiə qüvvələrinin məlumatına görə, qonşu Finlandiya da Finlandiya körfəzinin şərq hissəsində aviasiya və dəniz hərəkətinə müvəqqəti məhdudiyyət qoyub.

Teqlər

Rusiya BMT Ukrayna Qara dəniz İnsan hüquqları Latviya Novorossiysk limanı mülki itkilər Ust-Luqa Leninqrad vilayəti