canlı İsrailin Livanın cənubuna zərbələri nəticəsində azı 11 nəfər ölüb

Ərəb və İslam ölkələri İsrailin Trampın Qəzza planını rədd etməsini pisləyib

Beş ərəb ölkəsi — Misir, İordaniya, Qətər, Səudiyyə Ərəbistanı və BƏƏ, həmçinin Türkiyə, Pakistan və İndoneziya İsrailin ABŞ Prezidenti Donald Trampın Qəzza sülh planını rədd etməsini pisləyib.

Bu ölkələr bildiriblər ki, İsrailin mövqeyi münaqişənin başa çatdırılması və ABŞ-nin dəstəklədiyi planın həyata keçirilməsi səylərinə mane olur.

HƏMAS nümayəndə heyəti Qahirədə Qəzza atəşkəsi üzrə danışıqlar aparıb

Xəlil əl-Həyyənin rəhbərlik etdiyi HƏMAS-ın yüksəksəviyyəli nümayəndə heyəti avqustun 16-da Qahirədə Misirin kəşfiyyat rəhbəri Həsən Rəşadla görüşüb. Tərəflər Qəzzada atəşkəs razılaşmasının və ABŞ Prezidenti Donald Trampın bölgə ilə bağlı planının icrasını müzakirə ediblər.

HƏMAS bildirib ki, plana sadiqliyini bir daha təsdiqləyib və Qəzzanın bərpasına başlanılması istiqamətində səyləri müzakirə edib. Qrup eyni zamanda İsraili atəşkəsi pozmaqda və yol xəritəsinin bəzi bəndlərini rədd etməkdə günahlandırıb.

Misir mediasının məlumatına görə, Trampın müşaviri Cared Kuşner də diplomatik səylər çərçivəsində Qahirədə HƏMAS-ın yüksəkvəzifəli nümayəndələri ilə görüşüb.

Kuşner ayrıca Yeni Əl-Alameyndə Misir Prezidenti Əbdülfəttah əs-Sisi ilə danışıqlar aparıb. Sisi bütün tərəfləri Qəzza razılaşması üzrə öhdəliklərini yerinə yetirməyə çağırıb və regiondakı daha geniş böhranların həllinin vacibliyini vurğulayıb.

Misir Prezidenti Sisi Kuşnerlə Qəzza sülh planını müzakirə edib

Misir Prezidenti Əbdülfəttah əs-Sisi avqustun 16-da Əl-Alameyndə ABŞ nümayəndəsi Cared Kuşnerlə görüşüb. Tərəflər Qəzzada atəşkəsin icrasını və Prezident Donald Trampın sülh planını müzakirə ediblər.

Görüşdə bütün tərəflərin atəşkəs razılaşması üzrə öhdəliklərini yerinə yetirməsinin vacibliyi vurğulanıb.

Xəlil əl-Həyyənin rəhbərlik etdiyi HƏMAS nümayəndə heyəti də danışıqlar üçün Misirdədir. HƏMAS nümayəndələri, ABŞ rəsmiləri və Sülh Şurasının nümayəndəsi Nikolay Mladenov arasında görüşün keçirilməsi planlaşdırılır.

Görüşdə İsrail qüvvələrinin çıxarılması, təhlükəsizlik məsələləri və Qəzzanın müharibədən sonrakı idarəçiliyi müzakirə olunacaq.

Diplomatik səylər İsrailin Baş naziri Benyamin Netanyahunun ABŞ planının əsas bəndlərini, o cümlədən HƏMAS tam tərksilah edilməzdən əvvəl İsrail qüvvələrinin çıxarılması tələbini rədd etməsindən sonra güclənib.

İran ABŞ əsgərlərini öldürən və ya əsir götürənlərə 30 min dollar mükafat təklif edir

İran ordusunun baş komandanı Əmir Hatəmi bildirib ki, ABŞ hərbçisini öldürən və ya əsir götürüb təhvil verən İran vətəndaşına 30 min dollar mükafat ödəniləcək. 

Hatəmi bildirib ki, bu mükafat ictimai ianələr hesabına maliyyələşdirilir. Onun sözlərinə görə, belə bir addımı atan iranlı qadınlara ikiqat mükafat veriləcək. O, bu təklifin harada və hansı şəraitdə qüvvədə olacağını açıqlamayıb.

Açıqlama Tehran və Vaşinqton arasında qarşıdurmanın davam etdiyi və Hörmüz boğazı ətrafında gərginliyin artdığı  vaxta təsadüf edir.

ABŞ Hərbi Dəniz Qüvvələri “USS Boxer” gəmisində gigiyena vasitələri çatışmazlığı ilə bağlı iddiaları təkzib edib

ABŞ-nin 5-ci Donanması “USS Boxer” gəmisində xidmət edən qadın hərbçilərin gigiyena vasitələri çatışmazlığı ilə üzləşdiyinə dair xəbərləri təkzib edib.

ABŞ Hərbi Dəniz Qüvvələrinin Mərkəzi Komandanlığı bildirib ki, gəmidə kifayət qədər qadın gigiyena məhsulu var. Bu vasitələri gəminin mağazasından və tibbi bölmələrdən əldə etmək mümkündür.

Komandanlığın məlumatına görə, “USS Boxer” martda San-Dieqodan ayrıldıqdan sonra dörd dəfə limana daxil olub və avqustda iki böyük poçt göndərişi qəbul edib.

Təkzib gəmidə xidmət edən hərbçilərdən birinin ailə üzvünün açıqlamasından sonra verilib. Həmin şəxs qadın hərbçilərin gigiyena vasitələrindən məhdud istifadə etməyə məcbur qaldığını və göndərilən bağlamaların gəmiyə çatmadığını iddia edib.

“USS Boxer” iyunun sonundan Yaxın Şərqdə ABŞ-nin hərbi əməliyyatlarına dəstək verir. ABŞ Hərbi Dəniz Qüvvələri gəminin missiyalarını yerinə yetirmək üçün tam təchiz olunduğunu və hazır vəziyyətdə olduğunu bildirib.

İran Qətərdən itkin düşən pilotların taleyini araşdırmağa icazə istəyib

İran Qətərdən mart ayında təyyarələri vurulduqdan sonra itkin düşən üç iranlı pilotun taleyini araşdırmaq üçün hərbi araşdırma qrupuna ölkəyə giriş icazəsi verməsini istəyib. Bu barədə İranın IRNA dövlət xəbər agentliyi məlumat yayıb.

İranın İtkin Düşmüş Şəxslərin Axtarışı Komitəsinin rəhbəri Məhəmməd Bağırzadə bildirib ki, qrup aylardır Qətərdə araşdırma aparmaq üçün icazə gözləyir. O, Beynəlxalq Qızıl Xaç Komitəsini də məsələni izləməyə çağırıb.

Qətər isə iranlı pilotları saxlamadığını bildirib və Tehranın iddialarını rədd edib. Qeyd olunub ki, təyyarələr Qətərin hava məkanını pozub və əlaqə yaratmaq cəhdlərinə cavab verilməyib.

Qətərin  məlumatına görə, axtarış zamanı pilotlardan birinin qalıqları tapılıb.

İran digər iki pilotun taleyinin hələ də məlum olmadığını bildirir.

Səudiyyə Ərəbistanı Cizanda mümkün təhlükə ilə bağlı xəbərdarlıq edib

Səudiyyə Ərəbistanının Mülki Müdafiə xidməti  Cizan vilayətində mümkün təhlükə ilə bağlı xəbərdarlıq edib. Qurum “X” platformasında yaydığı  açıqlamada təhlükənin aradan qalxdığını bildirib.

Rəsmilər mümkün təhlükənin xarakteri barədə əlavə məlumat verməyiblər.

Yəmən ordusu Husilərə qarşı 181 əməliyyat keçirib

Yəmən ordusu bildirib ki, son 24 saat ərzində bir neçə vilayətdə Husilərin mövqelərinə və hədəflərinə qarşı 181 hərbi əməliyyat keçirib. Hücumlar nəticəsində qrupun onlarla üzvünün öldüyü və yaralandığı bildirilir.
Ordunun sözçüsü, polkovnik Məcid Abdullah ən-Nüzeyli “X” platformasında bildirib ki, zərbələr nəticəsində Husilərə məxsus onlarla hərbi texnika, nəqliyyat vasitəsi və silah anbarı məhv edilib.

Ən-Nüzeylinin sözlərinə görə, hücumlar Taiz, Marib, Abyan, əd-Dali və əl-Hudeydə vilayətlərində Husilərin hərbi obyektlərini və atəş mövqelərini hədəf alıb.

Husilərin dörd zabiti həlak olub

Husilərin “Al-Masirah” televiziyası bildirib ki, Yəmənin şimal-qərbindəki Həccə vilayətində üç, Sənanın cənubundakı İbb vilayətində isə bir zabit dəfn edilib.

Husilər onların hansı şəraitdə öldüyü barədə əlavə məlumat verməyib.

Hökumətin nəzarətində olan SABA xəbər agentliyi bildirib ki, Husilər əvvəlki 10 gün ərzində öldürülən 57 üzvünü dəfn ediblər.

ABŞ-İran gərginliyi fonunda Hörmüz boğazında gəmi hərəkəti azalıb

Hörmüz boğazında gəmi hərəkəti ciddi şəkildə pozulub. Canlı izləmə məlumatları boğaz ətrafında çox sayda gəminin toplandığını göstərsə də, müharibədən əvvəlki dövrlə müqayisədə boğazdan keçən gəmilərin sayı xeyli azalıb.

İran bildirir ki, onun icazəsi olmadan heç bir gəmi boğazdan keçə bilməz. ABŞ isə İran gəmiçiliyinə qarşı dəniz blokadası tətbiq etdiyini və bunun davamlı olacağını  açıqlayıb.

“Reuters”in məlumatına görə, müharibədən əvvəl gündə 130-dan çox gəminin keçdiyi boğazdan son vaxtlar cəmi bir neçə gəmi istifadə edir. Bu, əvvəllər qlobal neft və mayeləşdirilmiş təbii qaz (LNG) daşımalarının təxminən beşdə birinin keçdiyi mühüm marşruta ciddi təsir göstərib.

Kats: “İsrail Livana zərbələri davam etdirəcək”

Livanın Milli Xəbər Agentliyinin məlumatına görə, İsrailin ölkənin cənubuna endirdiyi zərbələr nəticəsində azı 11 nəfər həlak olub, 19 nəfər yaralanıb. İsrailin müdafiə naziri İsrael Kats isə hücumların davam edəcəyini bildirib.

“Heç bir cəbhədə hesablaşma yarımçıq qalmayacaq. Əsgərlərimizə və vətəndaşlarımıza zərər vuranlara bütün gücümüzlə zərbə endirəcəyik”, – Kats “X” platformasında yazıb.

İran parlamenti Hörmüz boğazı ilə bağlı planı nəzərdən keçirəcək

İran parlamenti xarici təsir, beynəlxalq cinayətlər və Hörmüz boğazı üçün nəzərdə tutulan “Ağıllı İdarəetmə Planı” ilə bağlı qanun layihələrini müzakirə etmək üçün onlayn iclas keçirəcək. Bu barədə İran İslam Respublikası Yayım Təşkilatı (IRIB) məlumat yayıb.

İclas İran və Oman arasında strateji su yolu üçün yeni gəmiçilik marşrutu xəritəsi ilə bağlı danışıqlardan sonra keçiriləcək.

İranlı deputat Trampın Hörmüz açıqlamasını ələ salıb

İranlı deputat İbrahim Əzizi “X” platformasında paylaşım edərək Donald Trampın Hörmüz boğazı ilə bağlı açıqlamalarını ələ salıb. O, ABŞ prezidentinə “yemək maşınında gizlənməli olmamışdan əvvəl” öz təhlükəsizliyi barədə düşünməyi tövsiyə edib.

Tramp bu yaxınlarda İranı məğlub etdikdən sonra strateji su yolunu ABŞ ərazisi elan edəcəyini bildirib.

İran Qətərdən araşdırma qrupunun ölkəyə girişinə icazə istəyib

“Tasnim” agentliyinin məlumatına görə, İran ordusunun itkin düşmüş şəxslərlə bağlı məsələlər üzrə rəhbəri Qətəri İran Hərbi Hava Qüvvələrinin faktaraşdırıcı qrupunun ölkəyə girişinə icazə verməyə çağırıb.

İsrail yüksəkrütbəli “Hizbullah” komandirini öldürdüyünü bildirib

İsrail ordusu “X” platformasında yaydığı açıqlamada Livanın cənubunda “Hizbullah”ın “Bədr bölməsi”nin yüksəkrütbəli komandiri Əbu Həsən Əlaanın öldürüldüyünü bildirib. İsrail onu hərbçilərinə qarşı, o cümlədən partlayıcı pilotsuz uçuş aparatları ilə hücumların təşkilində ittiham edib.

Bundan bir neçə saat əvvəl İsrail Ənsarda Əli Samir əl-Hac Həsəni öldürdüyünü açıqlamışdı. Həmin ərazidə azı 7 nəfər həlak olub.

İsrail ordusu hər iki zərbənin “Təhlükəsizlik zonası”nda “Hizbullah”ın fəaliyyətinə cavab olaraq endirildiyini bildirib.

Ərəb Liqası İsrailin Livanın cənubuna zərbələrini pisləyib

Ərəb Liqası İsrailin Livanın cənubuna hücumlarını pisləyib. Qurum hücumları Livanın suverenliyinin “açıq şəkildə pozulması” adlandırıb və bunun münaqişənin həlli istiqamətində səylərə mane ola biləcəyi barədə xəbərdarlıq edib.

Yəmənin Marib vilayəti husiləri altıncı raket hücumunda ittiham edir

Yəmənin Marib vilayətinin hakimiyyət orqanları İranın dəstəklədiyi husiləri Qırmızı dəniz sahilindəki Moxa limanına altıncı ballistik raket atmaqda ittiham edib. Hücum nəticəsində azı 4 mülki şəxs həlak olub.

Rəsmilər “X” platformasında bildiriblər ki, “davam edən hücumlar mülki şəxslərin, məcburi köçkün düşərgələrində yaşayanların və yaşayış məhəllələrinin təhlükəsizliyini təhdid edir”.

Limanın direktoru avqustun 15-də bildirib ki, son günlər husilərin hücumları zamanı limana 25-dən çox raket atıldıqdan sonra kommersiya və dəniz əməliyyatları dayandırılıb.

Rəsmilər raket zərbəsinin yaratdığı krateri və zədələnmiş avtomobili əks etdirən görüntülər yayıblar. Bölgədə genişmiqyaslı müharibənin yenidən başlaması ilə bağlı narahatlıq artır.

İsrailin Livanın cənubuna zərbələri nəticəsində azı 11 nəfər həlak olub

Livanın Səhiyyə Nazirliyi bildirib ki, avqustun 15-də İsrailin ölkənin cənubundakı Ənsar və Deyr əz-Zəhrani kəndlərinə endirdiyi zərbələr nəticəsində üçü uşaq, ikisi qadın olmaqla azı 11 nəfər həlak olub.

İsrail hərbçilərinə hücumlardan sonra “Hizbullah”ın infrastrukturunu hədəfə aldığını bildirib. “Hizbullah” isə bu zərbələrə cavab veriləcəyini bəyan edib.

Gərginliyin artması ABŞ-nin vasitəçiliyi ilə hazırlanan sülh çərçivəsi üzrə danışıqların davam etdiyi vaxta təsadüf edir. Saziş “Hizbullah”ın tərk-silah edilməsini və İsrail qüvvələrinin Livanın cənubundan çıxmasını nəzərdə tutur.