Kolumbiyada zəlzələnin vurduğu zərər 9,6 milyard dollar məbləğində qiymətləndirilir

Kolumbiya Prezidenti Abelardo de la Espriella ötən həftə ölkədə baş verən güclü zəlzələnin vurduğu iqtisadi ziyanın təxminən 30 trilyon pesoya (9,6 milyard dollar) çatacağını açıqlayıb. O qeyd edib ki, bu, ilkin rəqəmdir və bölgələr üzrə dəyən ziyan tam hesablandıqdan sonra dəyişə bilər.

Avqustun 10-da San-Xose-del-Palmar yaxınlığında baş verən 7,4 bal gücündə zəlzələ minlərlə evi, xəstəxana və məktəbləri dağıdıb. Təbii fəlakət Buenaventura limanından tutmuş qəhvə yetişdirilən bölgələrə, Kali və Pereyra kimi böyük şəhərlərə qədər geniş ərazidə ciddi fəsadlar törədib.

"Reuters"in məlumatına görə, zəlzələ nəticəsində təxminən 290 nəfər həlak olub, 140 nəfər itkin düşüb, 4 minə yaxın insan isə yaralanıb. Ölüm hallarının böyük hissəsi Kali və Pereyrada qeydə alınıb.

Kali şəhərində xilasedicilər artıq diqqəti sağ qalanların deyil, cəsədlərin axtarışına yönəldiblər. Mer Alexandro Eder axtarışların fasiləsiz davam edəcəyini desə də, kolumbiyalı politoloq David Rosenthal "AnewZ"a açıqlamasında dağıntılar altından sağ insanların çıxarılması ümidlərinin demək olar ki, tükəndiyini bildirib.

Binalar qəzalı vəziyyətdə olduğundan Pereyrada yüzlərlə insan sığınacaqlarda və çadırlarda gecələyir. Bölgədə çadır, ərzaq və gigiyena vasitələrinin qıtlığı yaşanır.

Zəlzələdən cəmi bir neçə gün əvvəl vəzifəyə başlayan Prezident Espriella üçün dağılmış infrastrukturun bərpası böyük sınaqdır. Hazırda Boqota və Medellin sakinləri zərərçəkənlərə humanitar yardım göndərsələr də, evsiz qalanlar üçün ən təcili məsələ təhlükəsiz sığınacaq tapmaqdır.

Teqlər

Kolumbiya zəlzələ zərər David Rosenthal Pereyra Kali Boqota Medellin