Fransa İranın addımına cavab olaraq iki iranlı diplomatı ölkədən çıxaracaq

Fransa ötən ay Tehranda səfirliyinin iki əməkdaşının saxlanılmasına cavab olaraq iki iranlı diplomatı ölkədən çıxarmağa hazırlaşır. Rəsmi Paris hadisəni qəsdli hücum kimi qiymətləndirib.

Fransanın Xarici İşlər naziri Jan-Noel Barro bildirib ki, diplomatlar yaxın vaxtlarda ölkədən çıxarılacaq.

 

“Bildirmişdim ki, bu qəbuledilməz hərəkət nəticəsiz qalmayacaq. Elə də oldu”, – Barro “X” sosial şəbəkəsində yazıb.

Diplomatik gərginlik artır

Fransa bildirib ki, İran təhlükəsizlik qüvvələri iyulun 19-da səfirliyin iki əməkdaşını saxlayıb və onlara fiziki təzyiq göstərilib. Bundan sonra Barro İranın Parisdəki müvəqqəti işlər vəkilini nazirliyə çağıraraq etirazını bildirib.

Tehran isə iki fransız əməkdaşın İrana qayıtmasına icazə verilməyəcəyini açıqlayıb.

İran Xarici İşlər Nazirliyinin sözçüsü İsmayıl Bəqai bildirib ki, diplomatlar İran vətəndaş cəmiyyətini dəstəkləyən fəaliyyətlər göstərməklə 1961-ci il Diplomatik Münasibətlər haqqında Vyana Konvensiyasını pozduqları iddiası ilə “persona non grata” elan ediliblər.

IRNA-nın məlumatına görə, İran Xarici İşlər Nazirliyi onları beynəlxalq hüququ pozan fəaliyyətlərdə günahlandırıb və Fransanı məsələ ilə bağlı tədbir görməməkdə tənqid edib.

Fransa Tehranın ittihamlarını qəti şəkildə rədd edib.

“İran hakimiyyəti əməkdaşlarımıza qarşı tamamilə əsassız ittihamlar irəli sürüb və öz addımlarına haqq qazandırmaq üçün müdaxilə ilə bağlı uydurma iş qurub”, – Fransanın Xarici İşlər Nazirliyinin sözçüsü Paskal Konfavrö bildirib.

Fransa və İran qarşılıqlı ittihamlar səsləndirir

Rəsmi Paris saxlanmanı diplomatik heyətə qarşı qəbuledilməz hücum kimi qiymətləndirir. Rəsmi Tehran isə fransız diplomatları xarici təsir və müdaxilə fəaliyyətində ittiham edir.

Avropa İttifaqı da insidenti pisləyib.

Teqlər

Fransa Fransa Xarici İşlər naziri İran Tehran diplomat Paris Jan-Noel Barro diplomatik gərginlik