Zelenski Ukraynanın “Patriot” raketlərinin yeni partiyasını təhvil aldığını bildirib

"OpenAI" Rusiyanın İsrail mərkəzli "beyin mərkəzi"ni təbliğ edən təsir əməliyyatını ifşa edib

"OpenA"I bildirib ki, Rusiyadan idarə olunan gizli təsir əməliyyatının qarşısı alınıb. Əməliyyat çərçivəsində İsraildə fəaliyyət göstərdiyi iddia olunan “Beynəlxalq Börk İnstitutu”nu (International Burke Institute) tanıtmaq üçün "ChatGPT"dən istifadə edilib.

Məlumata görə, Rusiyada yerləşən operatorlar institutun təbliği üçün sosial media məzmunları hazırlamaq, eləcə də Ukraynanı, Avropa İttifaqını və Qərb hökumətlərini tənqid edən paylaşımlar yaratmaq məqsədilə süni intellektdən yararlanıblar.

"OpenAI" həmçinin institutun internet səhifəsində təqdim olunan akademik materialların böyük hissəsinin köçürüldüyünü və ya müəllifliyinin yanlış göstərildiyini müəyyən edib.

Şirkət İsraildə bəzi real şəxslərin institutu təmsil etdiyinə dair əlamətlər olduğunu bildirib. Lakin onların Rusiyadakı operatorlarla əlaqəsini təsdiqləməyin mümkün olmadığını qeyd edib.

"OpenAI" kampaniyanın nisbətən məhdud auditoriyaya çatdığını bildirib.

Sikorski: "Polşa və Ukrayna bir daha heç vaxt Rusiyanın koloniyası olmayacaq”  

Polşanın xarici işlər naziri Radoslav Sikorski Moskvanı qonşu ölkələrə qarşı imperialist siyasət yürütməkdə ittiham edib. O bildirib ki, Polşa və Ukrayna bir daha heç vaxt Rusiyanın koloniyası olmamaq yolunu seçib.

Ukraynanın Müstəqillik Günü münasibətilə yerli mediaya müsahibə verən Sikorski deyib ki, Rusiyadan qorxmaq irrasional deyil, çünki Rusiya qonşuları üçün real təhlükə yaradır.

Sikorski Moskvanın beynəlxalq səviyyədə tanınmış sərhədləri qəbul etməli və ərazi iddialarından imtina etməli olduğunu vurğulayıb.

“Rusiyalılar Rusiyanın harada bitdiyinə birdəfəlik qərar verməlidirlər”, – deyə nazir bildirib.

O qeyd edib ki, Polşa və Ukraynanın ortaq marağı Rusiyanın qonşularının sərhədlərinə hörmət edən və diqqətini öz inkişafına yönəldən normal bir millətə çevrilməsidir.

Polşanın xarici işlər naziri Radoslav Sikorski parlamentdə çıxış edir. Varşava, Polşa, 26 fevral 2026-cı il.

Kreml bu həftə ABŞ elçiləri ilə danışıqların planlaşdırılmadığını bildirib

Rəsmi Kreml bildirib ki, Ukrayna müharibəsi ilə bağlı danışıqların bərpası cəhdlərinin dalana dirəndiyi bir vaxtda bu həftə ABŞ elçiləri ilə hər hansı görüş nəzərdə tutulmayıb.

Kremlin mətbuat katibi Dmitri Peskov bu açıqlamanı ABŞ-nin xüsusi elçisi Stiv Vitkoff və Prezident Donald Trampın kürəkəni Cared Kuşnerin Rusiya Prezidenti Vladimir Putinlə danışıqlar aparmaq üçün Moskvaya səfər edə biləcəyi barədə yayılan məlumatlardan sonra verib.

Peskov həmçinin Birləşmiş Krallığın Baş naziri Endi Börnhem və Finlandiya Prezidenti Aleksandr Stubb da daxil olmaqla Qərb liderlərini Rusiyaya qarşı təcavüzkar mövqe tutmaqda və Moskvanın məğlub edilə biləcəyini iddia etməklə seçicilərini aldatmaqda ittiham edib.

Kreml Ukraynada NATO qüvvələrinin yerləşdirilməsinə qarşı olduğunu bir daha bəyan edib və Donbasın şərq hissəsində azad iqtisadi zona yaradılması təkliflərini rədd edib.

Börnhem Kiyevə ilk səfərindən sonra Birləşmiş Krallığın Ukraynaya dəstəyinin davam edəcəyini bildirib

Birləşmiş Krallığın Baş naziri Endi Börnhem baş nazir kimi Kiyevə reallaşdırdığı ilk xarici səfərdən sonra ölkəsinin Ukraynaya olan güclü dəstəyinin onun rəhbərliyi altında da davam edəcəyini bildirib.

Müzakirələr hazırda qış mövsümü ərəfəsində Ukraynanın hava hücumundan müdafiə sistemlərinin gücləndirilməsinə yönəlib. Kiyev Rusiyanın enerji infrastrukturuna ehtimal olunan növbəti zərbələrinə hazırlaşdığı bir vaxtda Börnhem müttəfiqləri əlavə dəstək göstərməyə çağırıb.

ABŞ hərbi nəqliyyat təyyarəsi Moskvaya eniş edib, Kreml məlumatı olmadığını bildirir

"Flightradar24" məlumatlarına görə, ABŞ Hərbi Hava Qüvvələrinə məxsus "C-17 Globemaster III" hərbi nəqliyyat təyyarəsi çərşənbə axşamı Latviyanın Riqa şəhərindən birbaşa uçaraq Moskvanın "Vnukovo" hava limanına eniş edib.

Kreml təyyarənin gəlişi haqqında məlumatı olmadığını bildirib, təyyarənin sərnişin və ya yük daşıdığı isə hələ də qeyri-müəyyən qalır.

Təyyarə avqustun 23-də Vaşinqton yaxınlığındakı "Endryus" birgə bazasından Riqaya gəlmişdi. ABŞ qeydiyyatında olan təyyarə ilə Avropadan Rusiyaya sonuncu məlum birbaşa uçuş yanvar ayında, ABŞ elçiləri Stiv Vitkoff və Cared Kuşnerin Ukrayna üzrə danışıqlar üçün Moskvaya səfəri zamanı həyata keçirilmişdi.

Tramp administrasiyası Kiyevdən bu həftə Rusiyaya zərbələr endirməməyi istəyib

“Financial Times” qəzetinin Ukrayna üzrə baş müxbirinin məsələdən məlumatlı mənbələrə istinadən verdiyi məlumata görə, ABŞ Prezidenti Donald Trampın administrasiyasının rəsmiləri Ukraynadan bazar ertəsi, çərşənbə axşamı və çərşənbə günləri Moskva, Sankt-Peterburq və Rusiyanın şimal bölgələrinə zərbələr endirməməyi xahiş edib.

Məlumata görə, bu addım ABŞ-nin Mərkəzi Kəşfiyyat İdarəsinin (MKİ) direktoru Con Retkliffin çərşənbə axşamı keçiriləcək görüş üçün “C-17” hərbi nəqliyyat təyyarəsi ilə Moskvaya gəldiyi barədə xəbərlərin yayıldığı vaxt baş verib. 

Leypsiq hava limanına hücum cəhdi ilə bağlı üçüncü dron tapılıb

Almaniya mediasının məlumatına görə, ölkə müstəntiqləri avqustun əvvəlində Leypsiq/Halle hava limanına hücum cəhdi ilə bağlı üçüncü dronu və ehtimal olunan partlayıcı maddə qalıqlarını aşkar ediblər.

Məlumata əsasən, üçüncü dron avqustun 14-də hava limanının qərbində yerləşən Kabelsketal ərazisindəki tarlada tapılıb. Müstəntiqlər həmin ərazidə hərbi tipli partlayıcı maddə ola biləcəyi ehtimal edilən maddə də aşkar ediblər.

Avqustun 4-də isə hava limanının ərazisində, Ukraynaya məxsus və hərbi yüklərin daşınmasında istifadə olunan yük təyyarəsinin yaxınlığında partlayıcı maddə ilə təchiz edilmiş dron aşkarlanmışdı.

İstintaq orqanları hadisə ilə bağlı araşdırmaları davam etdirir. Hücum cəhdində bir neçə drondan istifadə olunduğu ehtimal edilir. 

Leypsiq/Halle hava limanında DHL yük təyyarəsi və Ukraynanın “Antonov” yük təyyarələrinin quyruq hissələri. Şkedits, Almaniya, 5 avqust 2026-cı il.

MKİ direktoru Moskvaya səfər edib

ABŞ-nin “CBS” telekanalının Ağ Ev üzrə baş müxbiri Cennifer Ceykobsun məlumatına görə, Mərkəzi Kəşfiyyat İdarəsinin (MKİ) direktoru Con Retkliff Moskvada keçiriləcək görüşlər üçün “C-17” hərbi nəqliyyat təyyarəsi ilə Rusiyaya səfər edib.

Daha əvvəl uçuş izləmə məlumatlarına əsasən, ABŞ-yə məxsus hərbi təyyarənin Latviyanın paytaxtı Riqadan birbaşa uçaraq Moskvanın “Vnukovo” hava limanına eniş etdiyi bildirilmişdi.

CBS-in məlumatına görə, ABŞ və Rusiya tərəfləri səfərin məqsədi barədə rəsmi açıqlama verməyib.

Zaporojye AES-in iki əməkdaşı dron hücumunda yaralanıb

Rusiyanın nəzarətində olan Ukraynanın cənub-şərqindəki Zaporojye Atom Elektrik Stansiyasının (AES) rəhbərliyi bildirib ki, stansiyanın iki əməkdaşı Ukraynanın dron hücumu nəticəsində yaralanıb.

Məlumata görə, zərbə stansiyanın hidrotexniki qurğuları yaxınlığında həyata keçirilib və iki texniki xidmət və tikinti işçisi xəsarət alıb.

Rusiya Xarici İşlər Nazirliyi bildirib ki, yaralılardan birinin vəziyyəti ağır, digərinin vəziyyəti isə orta dərəcədədir.

Zaporojye Atom Elektrik Stansiyası Avropanın ən böyük AES-i hesab olunur. Stansiya 2022-ci ildən Rusiyanın nəzarətindədir.

Slovakiya polisi dron zavoduna hücum cəhdinin qarşısını alıb

Slovakiya Milli Polisinin “Facebook” səhifəsində yayılan məlumata görə, hüquq-mühafizə orqanları ölkənin şərqində yerləşən dron zavoduna qarşı planlaşdırılan hücumun qarşısını alıb.

Polis bildirib ki, planlaşdırılan hücumla bağlı üç xarici vətəndaşa qarşı ittiham irəli sürülüb. Onlardan ikisi Slovakiyada, biri isə Almaniyada saxlanılıb.

Əməliyyatda mütəşəkkil cinayətkarlığa qarşı mübarizə qurumunun əməkdaşlarına Preşov şəhərinin regional polis əməkdaşları dəstək verib.

Ukraynanın dron istehsalçısı “Skyeton” şirkəti uzaqmənzilli döyüş dronlarının istehsalına başlamaq məqsədilə 2024-cü ildə Preşovdakı zavoda 3,5 milyon dollar sərmayə yatırıb.

Slovakiya polisi tərəfindən əməliyyat zamanı müsadirə edilən əşyalar.

Berlində silah anbarı yaratmaqda şübhəli bilinən kuryerin Rusiya adına fəaliyyət göstərdiyi ehtimal olunur

Almaniyanın “Der Spiegel” jurnalı adı açıqlanmayan mənbələrə istinadən yazıb ki, Berlin yaxınlığında silah anbarının yaradılmasında iştirak edən və hazırda Rumıniyada saxlanılan kuryerin Rusiyanın nəzarətində olan agent şəbəkəsi ilə əlaqəli olduğu ehtimal edilir.

Jurnalın məlumatına görə, sözügedən şəxs Polşadan avtobusla Berlinə gələn, silahları toplayaraq şəhər kənarındakı gizli anbara daşıyan 24 yaşlı Ukrayna vətəndaşıdır.

“Der Spiegel” müstəntiqlərə istinadən həmin şəxsin Rusiya adından fəaliyyət göstərdiyinin ehtimal edildiyini yazıb.

Zelenski: “Ukrayna az sayda “Patriot” raketi alıb” 

Ukrayna Prezidenti Volodimir Zelenski bildirib ki, ölkə bu yaxınlarda ABŞ istehsalı olan az sayda “Patriot” tutucu raketi alıb. Bu raketlər Rusiyanın ballistik raketlərini vurmaq üçün nəzərdə tutulub. 

 Zelenski əlavə edib ki, Fransa gələcəkdə Ukraynaya “Crotale” hava hücumundan müdafiə sistemləri verəcəyini təsdiqləyib. Bu barədə “Suspilne” məlumat yayıb.

Zelenski Ukraynanın suverenliyi ilə bağlı qəti mövqeyinə görə Azərbaycana təşəkkür edib 

Ukrayna Prezidenti Volodimir Zelenski “X” platformasında paylaşdığı açıqlamada Ukraynanın suverenliyi və ərazi bütövlüyü məsələsində Bakının sərgilədiyi qəti mövqeyə görə Azərbaycan Prezidenti İlham Əliyevə təşəkkür edib. 

“Biz zamanın sınağından çıxmış iqtisadi əməkdaşlığımızı birlikdə daha da inkişaf etdiririk. Enerji və təhlükəsizlik sahələrində yeni imkanlar yaradırıq və ehtiyac olduqda bir-birimizə kömək edirik”, – deyə Zelenski bildirib.

Moskva Qara dənizdə yük gəmisini və tankeri vurub 

“İnterfaks” agentliyi Rusiyanın Müdafiə Nazirliyinə istinadən bildirib ki, Rusiya qüvvələri Qara dənizdə yük gəmisinə və tankerə zərbələr endirib. “Reuters” bu məlumatı müstəqil şəkildə təsdiqləyə bilməyib.

Ukrayna ordusu “Afipski” neft emalı zavoduna zərbə endirdiyini təsdiqləyib

Ukrayna Silahlı Qüvvələrinin Baş Qərargahı bildirib ki, gecə saatlarında Rusiyanın cənubunda, Krasnodar vilayətində yerləşən “Afipski” neft emalı zavoduna zərbə endirib. Nəticədə zavodda yanğın baş verib.

Bundan əvvəl vilayətin qubernatoru dron hücumundan sonra zavodda yanğın başladığını açıqlamışdı.

Baş Qərargah həmçinin bildirib ki, gecə həyata keçirilən hücum zamanı Rusiyanın cənubundakı Həştərxan vilayətində yerləşən Həştərxan Qaz Emalı Zavodunun iki qazayırma qurğusu da hədəfə alınıb.

Ukrayna Rusiyaya casusluqda şübhəli bilinən şəxsi saxlayıb

Ukrayna Təhlükəsizlik Xidmətindən verilən məlumata görə, Rusiyanın Ukraynanın qərbində yerləşən Lvov şəhərində dəmir yolu infrastrukturu, hərbi və inzibati obyektlərə zərbələrin hazırlanmasına kömək etmək üçün kəşfiyyat məlumatları toplamaqda şübhəli bilinən şəxs saxlanılıb.

Ukraynanın Dnepropetrovsk vilayətindən olan həmin şəxs, Təhlükəsizlik Xidmətinin məlumatına görə, obyektlərin xarici ərazilərini telefon kamerası ilə qeydə alıb və daha sonra əldə etdiyi məlumatları Rusiya kəşfiyyatının əməkdaşına göndərib.

Zelenski Türkiyəyə vasitəçilik səylərinə görə təşəkkür edib

Ukrayna Prezidenti Volodimir Zelenski Rusiyada saxlanılan ukraynalıların azad olunmasına kömək məqsədilə diplomatik səylərinə görə Türkiyə Prezidenti Rəcəb Tayyib Ərdoğana təşəkkür edib.

Zelenski “X” sosial şəbəkəsindəki paylaşımında Ərdoğanın “şəxsi iştirakını və Türkiyənin rus əsirliyində olan ukraynalıların ölkəyə qaytarılmasında vasitəçilik səylərini” yüksək qiymətləndirdiyini bildirib.

O, həmçinin Türkiyəyə “sülhün əldə olunmasına yönəlmiş səylərinə” görə minnətdarlığını ifadə edib.

Rusiya 148 hava obyektinin zərərsizləşdirildiyini bildirib

Rusiya Müdafiə Nazirliyi bildirib ki, avqustun 24-də ölkə ərazisi, həmçinin Qara və Azov dənizləri üzərində 148 hava obyekti məhv edilib.

Nazirliyin açıqlamasına görə, hava hücumundan müdafiə sistemləri Belqorod, Bryansk, Voronej, Kursk, Lipetsk və Rostov vilayətləri, həmçinin Krasnodar diyarı üzərində hava obyektlərini məhv edib.

Gecə hücumlarında üç nəfər ölüb, iki nəfər yaralanıb

Ukraynanın Dövlət Sərhəd Xidməti bildirib ki, Rusiyanın dron hücumu Moldova ilə sərhəddə yerləşən Odessanın Vinoqradovka beynəlxalq avtomobil keçid məntəqəsinin infrastrukturuna ziyan vurub. Hadisədən sonra keçidin fəaliyyəti müvəqqəti dayandırılıb.

“Bu barədə Moldova tərəfinə məlumat verilib”, – xidmət bildirib. Qeyd olunub ki, fövqəladə hallar xidmətləri yanğını söndürüb.

Ukraynanın ikinci böyük şəhəri Xarkivdə isə Rusiya raketlərinin Osnovyanskin rayonundakı sənaye zonasına endirdiyi zərbə nəticəsində bir nəfər ölüb. Bu barədə şəhər meri İqor Terexov “Telegram” kanalında məlumat verib.

Börnhem Ukrayna məsələsini Tramp ilə müzakirə etmək üçün ABŞ-yə səfər edəcək

“Bloomberg”in məlumatına görə, Böyük Britaniyanın Baş naziri Endi Börnhem Ukraynanın hərbi ehtiyacları ilə bağlı ABŞ Prezidenti Donald Trampı razı salmaq məqsədilə gələn ay ABŞ-yə səfər etməyi planlaşdırır.

Rusiyanın “Afipski” neft emalı zavodunda dron hücumundan sonra yanğın baş verib

Rusiya rəsmilərinin məlumatına görə, Krasnodar vilayətində yerləşən “Afipski” neft emalı zavodunda dron hücumundan sonra yanğın baş verib.

Bu hadisə Prezident Vladimir Putinin Ukraynanın dron hücumları və digər təhdidlərdən kifayət qədər qorunmadığı hesab edilən kritik əhəmiyyətli infrastruktura dövlət nəzarətini ələ keçirmək səlahiyyəti verən fərman imzalamasından sonra baş verib.

Prezident fərmanı ilə müəyyən edilən xüsusi səlahiyyətlər dövlətə Ukraynanın neft emalı zavodlarına və pərakəndə ticarət anbarlarına qarşı dron hücumlarının artdığı bir dövrdə bu cür obyektlərin müvəqqəti idarəçiliyini ələ keçirməyə imkan verəcək.

Britaniya və Fransa Ukraynaya hərbi dəstəyi gücləndirəcək

Böyük Britaniya və Fransa Ukraynaya daha güclü hərbi dəstək vəd edib. Dəstək paketinə “Storm Shadow” raketlərinin istehsalı üçün məxfi texnologiyalara çıxışın təmin edilməsi və hava hücumundan müdafiə raketlərinin daha sürətli çatdırılması daxildir.

Rəsmi Kiyev bildirib ki, Rusiyanın şəhərlərə və enerji infrastrukturuna mümkün yeni hücumlarına hazırlaşmaq üçün ən azı 300 “Patriot” raketinə ehtiyac duyur.