26 avqust 2026, 07:44
Moskvanın İnsan Hüquqları üzrə Müvəkkili Yana Lantratova Rusiya və Ukraynanın Belarus ərazisində hər tərəfdən 10 olmaqla ümumilikdə 20 hərbi əsiri dəyişdirdiyini bildirib.
Rusiyanın Müdafiə Nazirliyi bildirib ki, Rusiya qüvvələri Ukrayna ordusunun təchizatında istifadə olunan yük gəmisini İzmail limanında vurub.
Nazirliyin məlumatına görə, dron hücumu zamanı yanacaq anbarları və liman infrastrukturu da hədəfə alınıb.
“Reuters” bu iddiaları müstəqil şəkildə təsdiqləyə bilməyib.
Sülh danışıqlarının dalana dirənməsi fonunda Rusiya Prezidenti Vladimir Putinin Ukraynadakı müharibəni gərginləşdirmək istiqamətində addımlar atdığı bildirilir.
Məlumata görə, bu, münaqişəyə son qoymaq üçün aparılan diplomatik səylərin artan çətinliklərlə üzləşdiyi və danışıqlarda aydın irəliləyişin əldə olunmadığı bir vaxta təsadüf edir.
“MSC” (“Mediterranean Shipping Company”) Qara dənizdə artan təhlükəsizlik narahatlıqları fonunda Rusiyanın Qara dəniz limanlarına xidmətlərini dayandırdığını bildirib.
Şirkət qərarın dron hücumlarından sonra verildiyini açıqlayıb. MSC müştərilərinə göndərdiyi bildirişdə Rusiya limanı Novorossiyskə gedən “MSC ULSAN III” konteyner gəmisinin dron hücumuna məruz qalmasından sonra yeni sifarişlərin qəbulunu dayandırdığını bildirib.
Şirkət vəziyyəti izlədiyini və xidmətlər bərpa olunana qədər müştərilərə alternativ daşınma imkanlarını nəzərdən keçirməyi tövsiyə etdiyini qeyd edib.
ABŞ Rusiyaya qarşı sanksiyalara baxmayaraq, müəyyən kateqoriyalı almazların idxalı ilə bağlı əməliyyatlara icazə verən baş lisenziyanın müddətini daha bir il uzadıb.
Sentyabrın 1-də başa çatmalı olan lisenziyanın qüvvədə olma müddəti 2027-ci il sentyabrın 1-dək uzadılıb.
ABŞ Prezidenti Donald Tramp radio müsahibəsində Mərkəzi Kəşfiyyat İdarəsinin (MKİ) direktoru Con Ratkliffin çərşənbə axşamı Moskvaya səfərinin nəticə verə biləcəyini bildirib.
Ukraynadakı müharibəyə toxunan Tramp “Glenn Beck Program”ına müsahibəsində deyib: “İndi bundan nəsə nəticə çıxa bilər. Biz bu müharibəyə son qoymaq üçün çox ciddi çalışırıq”.
MKİ rəhbərinin Moskva səfərinin Rusiyanın NATO-ya qarşı mümkün addımlarını və ya İrana qarşı sanksiyaları müzakirə etmək məqsədi daşıyıb-daşımadığı ilə bağlı suala Tramp belə cavab verib: “Bunların heç biri. Bilirsiniz, onun səfəri bir növ adi xarakter daşıyır”.
Kreml bildirib ki, Ratkliff Moskvada Rusiya kəşfiyyat rəsmiləri ilə görüşüb, lakin Prezident Vladimir Putinlə görüş keçirməyib.
MKİ direktorunun Rusiya paytaxtına məlum olan son səfəri Ratkliffin sələfi Uilyam Bernsin 2021-ci ilin noyabrında, Ukraynada müharibə başlamazdan üç ay əvvəl Putinlə görüş keçirdiyi vaxt baş tutmuşdu.
Rusiyanın mərkəzində yerləşən Tambov vilayətinin qubernatoru Yevgeni Pervışov bildirib ki, Ukraynanın dron zərbəsi nəticəsində Rusiyanın elektron ticarət nəhəngi “Wildberries” şirkətinin istifadə etdiyi anbar tamamilə məhv edilib.Onun sözlərinə görə, gecə saatlarında baş verən hücum nəticəsində iki nəfər xəsarət alıb.
Ukrayna iyulun ortalarından etibarən “Wildberries” obyektlərini hədəf alır. Son günlərdə isə strategiyasını genişləndirərək şirkətin əsas rəqibi olan “Ozon”un anbarlarına da zərbələr endirib.
“Reuters”in peyk görüntülərinin təhlilinə əsasən, “Wildberries” və “Ozon” şirkətlərinə məxsus 20-dən çox anbar hücuma məruz qalıb. Nəticədə ən azı 1,9 milyon kvadratmetr anbar sahəsinə yanğın səbəbindən ciddi ziyan dəyib.
Rusiyanın nəzarətində olan Ukraynanın şərqindəki Luqansk vilayətində avtobusa endirilən zərbə nəticəsində 9 nəfər həlak olub. Bu barədə regionun Rusiya tərəfindən təyin edilmiş qubernatoru Leonid Paseçnik bildirib.
Paseçnikin sözlərinə görə, zərbə zamanı avtobus Lisiçansk şəhərindən Kadiyevka şəhərinə doğru hərəkət edib. O, hadisənin detalları ilə bağlı əlavə məlumat verməyib.
Slovakiya Prokurorluğunun bildirdiyinə görə, çərşənbə axşamı ölkənin şərqindəki dron zavodunu yandırmaq qəsdi ilə bağlı həbs edilən şübhəlilərdən ikisi Latviya, üçüncüsü isə Ukrayna vətəndaşıdır.
Buna qədər "The Kyiv Independent" qəzeti anonimlik şərti ilə danışan şirkət nümayəndəsinə istinadən hədəf alınan obyektin Preşov şəhərində Ukraynanın "Skyeton" firmasına məxsus zavod olduğunu xəbər vermişdi.
Ukrayna Rusiyanın əsas təzyiq zonası olan şərqdəki Donetsk cəbhəsini tanınmış komandirlərin rəhbərlik etdiyi iki bölmə ilə gücləndirəcək. Bu barədə Prezident Volodimir Zelenski çərşənbə günü bildirib.
"Azov" Korpusunun komandiri Denis Prokopenko və Üçüncü Ordu Korpusuna komandanlıq edən Andriy Biletski yeni yaradılmış bölmələrə rəhbərlik edəcəklər. Zelenski bu barədə "Telegram"da məlumat verib.
35 yaşlı briqada generalı Prokopenko Ukrayna Silahlı Qüvvələrinə 2014-cü ildə mülki könüllü kimi qoşulub. O, 2022-ci ildə Mariupol liman şəhərinin müdafiəsinə rəhbərlik etdikdən sonra məşhurlaşıb. Prokopenko 2022-ci il mayın 20-də Rusiya hərbçilərinə təslim olub və Rusiyada əsirlikdə saxlanılıb.
2022-ci ilin sentyabrında Prokopenko əsir mübadiləsi çərçivəsində azad edilərək razılaşmaya əsasən Türkiyəyə göndərilib. O, 2023-cü ilin iyulunda Ukraynaya qayıdıb.
Kreml Prokopenkonu və onun xidmət etdiyi "Azov" briqadasını neo-nasist baxışlarına malik olmaqda ittiham edib. Prokopenko bu iddiaları təkzib edib.
Ukrayna Prezidenti Volodimir Zelenski Denis Prokopenko ilə əl sıxır. İstanbul, Türkiyə, 8 iyul 2023-cü il.
Çərşənbə axşamı Slovakiyanın şərqində yerləşən dron zavoduna hücum planlaşdırdıqları şübhəsi ilə saxlanılan üç xarici vətəndaş Ukraynaya məxsus “Skyeton” şirkətinin Preşov şəhərindəki müəssisəsini hədəf alıb. Bu barədə şirkət nümayəndəsi Ukraynanın “The Kyiv Independent” nəşrinə açıqlama verib.
Təhlükəsizlik səbəbindən adının açıqlanmasını istəməyən nümayəndə bildirib: “Ruslar müntəzəm olaraq həm Ukraynadakı istehsal obyektlərimizə, həm də nüfuzumuza hücum etməyə çalışırlar”.
Ukraynanın “Skyeton” dron istehsalçısı uzaqmənzilli döyüş dronlarının istehsalına başlamaq məqsədilə 2024-cü ildə Preşovdakı zavoda 3,5 milyon dollar sərmayə yatırıb.
Treyderlər və analitiklərin çərşənbə günü bildirdiyinə görə, Ukrayna limanlarına daxil olaraq ixrac üçün taxıl yükləmək məqsədilə Dunayın Sulina kanalı yaxınlığında 70-ə qədər gəmi gözləyir. Loçman çatışmazlığı və digər yüklərə üstünlük verilməsi uzunmüddətli ləngimələrə səbəb olur.
Rusiyanın hücumları Ukraynanın taxıl ixracının 90 faizini həyata keçirən Qara dəniz limanlarını faktiki olaraq blokladıqdan sonra bəzi daşımalar ötürücülük qabiliyyəti daha aşağı olan Dunay çayı limanlarına yönəldilib.
Taxıl yükləri yanacaq kimi daha yüksək prioritetli daşımalarla limanlara giriş uğrunda rəqabət aparır və bu, ixrac prosesini ləngidir. Bütün liman əməliyyatlarının dayandırılmasına səbəb olan tez-tez hava həyəcanı siqnalları da vəziyyəti çətinləşdirir.
Ukrayna dünyanın ən böyük taxıl ixracatçılarından biridir və onun tədarüklərindəki fasilələr qlobal bazarlarda qiymətlərin artmasına səbəb ola bilər.
Ermənistan Təhlükəsizlik Şurasının katibi Alen Simonyan ölkəsinin ehtimal olunan səfərbərlikdən yayınan rusiyalıların Ermənistana daxil olmasına mane olmayacağını bildirib.
Rusiyanın “Dojd” telekanalına müsahibəsi zamanı Simonyandan cəbhəyə göndərilməkdən yayınmağa çalışan rusiyalıların Ermənistana qəbul edilib-edilməyəcəyi soruşulub.
“Sərhəddə heç kim heç kimdən bura niyə gəldiyini soruşmayacaq”, — Simonyan cavab verib.
“Ermənistan onların gəlişinə heç bir halda mane olmayacaq və ehtiyac yaranarsa, biz kömək göstərəcəyik”, — o əlavə edib.
Dünyanın ən varlı şəxsi İlon Maska Ukrayna Prezidenti Volodimir Zelenski tərəfindən ölkənin ali dövlət təltiflərindən biri olan “Azadlıq” ordeni təqdim edilib.
Ukrayna Silahlı Qüvvələri 2022-ci ildə müharibənin başlanmasından bəri döyüş meydanında rabitənin təmin edilməsi və dronların idarə olunması üçün Maskın “Starlink” peyk internet xidmətindən istifadə edir.
Trilyonçuya bu təltifin verilməsi qərarı Ukraynanın “Starlink” xidmətindən istifadəsini genişləndirməyə çalışdığı bir vaxtda açıqlanıb. Çərşənbə günü yayımlanan prezident fərmanında Mask insan həyatının və azadlığının qorunmasına verdiyi mühüm şəxsi töhfələrə, eləcə də Ukrayna və ABŞ xalqları arasında münasibətlərin inkişafına verdiyi dəstəyə görə təqdir olunub.
Mask 2022-ci ildə Rusiyanın genişmiqyaslı işğalından qısa müddət sonra Ukrayna ərazisində “Starlink” peyk internet xidmətini aktivləşdirib.
Keçmiş müdafiə naziri Mixaylo Fedorovun müraciətindən sonra Mask bu il Rusiyanın “boz bazar” vasitəsilə əldə etdiyi minlərlə “Starlink” terminalını söndürməyə razılaşıb. Bu addımın Moskvanın qüvvələri üçün çətinliklər yaratdığı bildirilib.
Macarıstanın yeni hökuməti Rusiyanı rəsmi olaraq ölkəsi, Avropa və qlobal nizam üçün təhdid kimi qiymətləndirib.
Bu mövqe keçmiş Baş nazir Viktor Orbanın dövründə Moskva ilə daha yaxın münasibətlərə əsaslanan xarici siyasətdən kəskin dönüş kimi qiymətləndirilir.
Hökumətin BMT Baş Assambleyasına hazırladığı sənəddə Rusiyanın hərbi təcavüzü pislənib və Ukraynanın suverenliyi ilə ərazi bütövlüyünə dəstək ifadə olunub.
Kremlin mətbuat katibi Dmitri Peskov Ukraynanın vəzifəsindən kənarlaşdırılmış müdafiə naziri Mixaylo Fedorovun Kiyevin Rusiya ilə müharibədə tədricən uduzduğu barədə açıqlamasına münasibət bildirərək deyib ki, Ukrayna bu müharibədə “şübhəsiz ki, uduzur”.
Kiyevin rəsmi mövqeyindən fərqli açıqlama verən Fedorov çərşənbə axşamı bildirib: “Düşünürəm ki, hazırda gələcək istiqamətimizi müəyyən edəcək dönüş nöqtəsindəyik, lakin görünür, biz tədricən, yavaş-yavaş uduzuruq”.
Kreml həmçinin bildirib ki, ABŞ-Rusiya münasibətlərindəki dərin böhranın aradan qaldırılacağını demək hələ tezdir.
Ukrayna Baş Qərargahının məlumatına görə, Kiyev qüvvələri gecə saatlarında Rusiyanın Nijni Novqorod vilayətində yerləşən “Lukoyl” şirkətinə məxsus NORSI neft emalı zavoduna zərbə endirib.
Baş Qərargah “Telegram” messencerində bildirib ki, zərbə nəticəsində obyekt ərazisində yanğın baş verib. Hazırda dəymiş ziyanın miqyası qiymətləndirilir.
Rusiyanın İnsan Hüquqları üzrə Müvəkkili Yana Lantratova Rusiya və Ukraynanın hər tərəfdən 10 hərbi əsiri dəyişdirdiyini bildirib.
O, Rusiyanın “Zvezda” telekanalına açıqlamasında mübadilənin Belarus ərazisində baş tutduğunu deyib. Lantratova əlavə edib ki, azad edilən rusiyalı hərbçilər çərşənbə günü daha sonra ölkəyə qayıdacaqlar.
2022-ci ilin fevralında münaqişənin genişmiqyaslı mərhələsi başlayandan bəri Moskva və Kiyev arasında minlərlə hərbi əsirin mübadiləsi həyata keçirilib.
Ukraynanın cənubundakı Xerson şəhərində yerləşən istilik-elektrik stansiyası Rusiyanın idarəolunan aviasiya bombası ilə endirdiyi zərbə nəticəsində ciddi zədələnib. Bu barədə stansiyanın sahibi olan Ukraynanın “Naftoqaz” enerji şirkəti məlumat yayıb.
Rusiyanın Novorossiysk limanındakı NKHP taxıl terminalının bərpası bir aydan dörd aya qədər davam edə bilər. Bu barədə şirkət maliyyə hesabatında bildirib.
Dron hücumu nəticəsində zərər görən terminalda fəaliyyət avqustun 12-dən dayandırılıb. Şirkətin məlumatına görə, zədələnmiş infrastrukturun texniki qiymətləndirilməsi və bərpa işlərinin həcminin müəyyənləşdirilməsi davam edir.
“Financial Times”ın (FT) məlumatına görə, Avropada fəaliyyət göstərən son böyük Rusiya bankının rəhbərləri Aİ sanksiyaları səbəbindən Avropada ilişib qalan ucuz qiymətli “Gazprom” istiqrazlarını alaraq və Rusiyada onları tam dəyərində dəyişdirərək 10,5 milyon dollardan (9 milyon avro) çox qazanc əldə edə bilərdilər.
Nəşrin əldə etdiyi sənədlərə görə, “Gazprombank”ın Lüksemburqdakı bölməsinin dörd yüksək vəzifəli əməkdaşı 50-dən çox əməliyyatı maliyyələşdirmək üçün bankdan milyonlarla avro məbləğində şəxsi kreditlər alıb.
FT yazır ki, əməliyyatlar Rusiyanın 2022-ci ildə Ukraynaya qarşı genişmiqyaslı hücumundan sonra tətbiq edilən sanksiyalar fonunda yaranmış bazar vəziyyətindən istifadə etməyə imkan verib.
Rusiya Prezidenti Vladimir Putin Mərkəzi Kəşfiyyat İdarəsinin (MKİ) direktoru Con Retkliffin Moskvaya səfəri zamanı onunla görüşməyib. Bunu Kremlin sözçüsü Dmitri Peskov Rusiyanın dövlət xəbər agentliyi TASS-a bildirib.
“Putinlə heç bir görüş planlaşdırılmayıb”, – Peskov deyib.
Peskov “The Washington Post” qəzetinə ayrıca bildirib ki, Retkliffin səfəri xüsusi xidmət orqanları arasında təmaslarla bağlı olub, lakin əlavə məlumat verməyib.
Ukrayna Silahlı Qüvvələrinin Baş Qərargahı Rusiyanın müharibə başlayandan bəri verdiyini iddia etdiyi itkilərlə bağlı yeni məlumat yayıb.
Ukrayna Silahlı Qüvvələrinin Baş Qərargahı bildirib ki, gecə ərzində ölkəyə hücum edən 162 drondan 134-ü vurulub və ya zərərsizləşdirilib.
Rusiya Müdafiə Nazirliyi bildirib ki, gecə ərzində 426 dron vurulub. Rusiya xəbər agentliklərinin məlumatına görə, bu rəqəmə Rusiyanın nəzarət etdiyi Ukrayna əraziləri də daxildir.
Ukrayna Prezidenti Volodimir Zelenski bildirib ki, Kiyev Rusiya ilə müharibənin başa çatdırılmasında Çinin köməyinə ümid edir.
Zelenski bu açıqlamanı Çin Prezidenti Si Cinpinin Ukraynanı Müstəqillik Günü münasibətilə təbrik etməsindən sonra verib. Bu tarix ölkənin Sovet İttifaqından müstəqilliyini elan etməsinin 35-ci ildönümünə təsadüf edir.
“Ən mühüm milli bayramımız münasibətilə Ukraynanı təbrik etdiyi üçün Çin lideri Si Cinpinə təşəkkür edirəm”, – Zelenski bildirib.
O əlavə edib ki, Kiyev Pekinlə münasibətlərə yüksək qiymət verir və bu əlaqələr 35 ildən artıq müddətdə xalqların dəyərlərinə qarşılıqlı hörmət və tanınma əsasında formalaşıb.
Tambov vilayətinin qubernatoru Yevgeni Pervışov bildirib ki, Rusiyanın Tambov vilayətində yerləşən “Wildberries” anbarında dron hücumundan sonra yanğın baş verib. Hadisə nəticəsində bir nəfər xəsarət alıb.
Rusiya və Ukrayna yeni, “kifayət qədər böyük” hərbi əsir mübadiləsi ilə bağlı müzakirələr aparır. Rusiyanın TASS xəbər agentliyi bu barədə Rusiyanın İnsan Hüquqları üzrə müvəkkili Yana Lantratovaya istinadən məlumat yayıb.
Rusiyanın 2022-ci ilin fevral ayında Ukraynaya qarşı genişmiqyaslı hücumundan sonra minlərlə hərbi əsir dəyişdirilib.
May ayında əldə olunan razılaşmaya əsasən, daha 1000 nəfərin qarşılıqlı mübadiləsi Rusiya və Ukrayna arasında ABŞ-nin vasitəçiliyi ilə aparılan sülh danışıqlarının əsas nəticələrindən biri olub.
Rusiyanın həftəsonu Ukraynaya endirdiyi zərbələr beynəlxalq reaksiyalara səbəb olub. Hücumlar zamanı Ukrayna–Polşa sərhədi yaxınlığında sərnişin...
İsveçdə mərkəz-sol blok müxalifət gərgin keçən seçkidə cüzi fərqlə önə keçib. Seçkinin nəticəsi ölkənin miqrasiya siyasətinə və ifrat sağ qüvvələrə...
Hörmüz boğazının bu il faktiki bağlanması enerji bazarlarında ciddi çətinliklər yaratdı. Çin isə təxminən on il idi ki, belə bir böhrana hazırlaşırdı.
“Ukrayna Dəmir Yolları” bildirib ki, sentyabrın 13-də Kiyev–Varşava qatarı Polşa sərhədi yaxınlığında vurulub. Xəsarət alan olmayıb. Dəmir yolu şəbəkəsinə hücumlar ikinci gündür davam edir.
Böyük Britaniyanın Dəniz Ticarəti Əməliyyatları İdarəsinin məlumatına görə, sentyabrın 13-də Hörmüz boğazında gəmiyə hücum edilib. Hadisə Səudiyyə Ərəbistanının bir gün əvvəl mühüm neft kəmərini dayandırmasından sonra enerji təchizatı ilə bağlı narahatlıqları artırıb.
ABŞ Prezidenti Donald Tramp Şimali İrlandiyanın İrlandiya ilə birləşməsini görmək istədiyini bildirib. Onun Dublində səsləndirdiyi fikirlər Şimali İrlandiyadakı unionistlərin sərt reaksiyasına səbəb olub.
ABŞ Mərkəzi Komandanlığı bildirib ki, Hörmüz boğazında 101 ticarət gəmisinin marşrutu dəyişdirilib. Regionda yeni hücumlar və tədarüklə bağlı narahatlıqlar fonunda neft qiymətləri 2 faizdən çox artıb.
Səudiyyə Ərəbistanı dini turizmlə yanaşı, istirahət məqsədilə ölkəyə gələn xarici turistlər üçün də imkanlarını genişləndirir. Ər-Riyad, Əl-Ula və Dəriyyə tarixi məkanları və yeni turizm layihələri ilə getdikcə daha çox ziyarətçi cəlb edir.
İsveçdə mərkəz-sol blok müxalifət gərgin keçən seçkidə cüzi fərqlə önə keçib. Seçkinin nəticəsi ölkənin miqrasiya siyasətinə və ifrat sağ qüvvələrə münasibətinə təsir göstərə bilər.
Rusiyanın həftəsonu Ukraynaya endirdiyi zərbələr beynəlxalq reaksiyalara səbəb olub. Hücumlar zamanı Ukrayna–Polşa sərhədi yaxınlığında sərnişin qatarının lokomotivi pilotsuz uçuş aparatı (PUA) ilə vurulub. Ukrayna mülki və mühüm infrastruktura ziyan dəydiyini bildirib.
ABŞ Mərkəzi Komandanlığı bildirib ki, Hörmüz boğazında 101 ticarət gəmisinin marşrutu dəyişdirilib. Regionda yeni hücumlar və tədarüklə bağlı narahatlıqlar fonunda neft qiymətləri 2 faizdən çox artıb.
İndoneziyalı xilasedicilər pis hava şəraitinə baxmayaraq, Yava dənizində batan gəmidə olan 130 nəfərin axtarışını davam etdirirlər. Ölkənin axtarış-xilasetmə agentliyinin məlumatına görə, gəmidə ümumilikdə 243 nəfər olub.
Çin Xalq Respublikasının Sədri Si Cinpin bildirib ki, Çin BRICS ölkələri arasında iri dil modellərinin hazırlanması və tətbiqi sahəsində əməkdaşlığı gücləndirmək üçün açıq mənbə platformasının yaradılmasına rəhbərlik edəcək.
AnewZ tətbiqini “Play Store” və “App Store”dan yükləyə bilərsiniz.
Bu mövzu haqqında fikriniz nədir?
İlk şərhi siz yazın