Səhər xülasəsi – 26 avqust 2026

Günə AnewZ-un səhər xülasəsi ilə məlumatlı başlayın. Avqustun 26-sı üçün hazırladığımız icmalda gündəmin əsas xəbərləri və diqqətçəkən son hadisələr yer alır.

ABŞ hələlik İrana yeni zərbələr endirməyəcək

ABŞ hələlik İrana qarşı yeni zərbələr endirmək əvəzinə, iqtisadi və diplomatik təzyiq vasitələrinə üstünlük verəcək. Bunu ABŞ-nin dövlət katibi Marko Rubio bildirib. “Axios”un məlumatına görə, Rubio bu açıqlamanı müttəfiq ölkələrin xarici işlər nazirlərinə çatdırıb. İran və Oman Hörmüz boğazından keçən müvəqqəti dəniz dəhlizi ilə bağlı danışıqları bərpa edib. “Kpler” şirkətinin son məlumatlarına görə, avqustun 25-də boğazdan beş yük gəmisi keçib. Bu göstərici son 10 gün üzrə gündəlik orta hesabla 15 gəmidən xeyli aşağıdır.

Tramp ABŞ-Səudiyyə nüvə sazişini Konqresə göndərib

ABŞ Prezidenti Donald Tramp Səudiyyə Ərəbistanı ilə 30 illik nüvə əməkdaşlığı sazişini nəzərdən keçirmək üçün rəsmi olaraq Konqresə təqdim edib. Razılaşma ABŞ şirkətlərinin krallığın nüvə infrastrukturunun inkişafında əsas rol oynamasını nəzərdə tutur. Uran zənginləşdirilməsi isə nüvə silahı hazırlamaq ehtimalına görə əsas narahatlıq doğuran məsələlərdən biri olaraq qalır. Saziş həmçinin ABŞ-nin Səudiyyə Ərəbistanı ilə İsrail arasında diplomatik münasibətlərin normallaşdırılması səyləri ilə də əlaqələndirilir.

Rusiya və Ukrayna yeni böyük əsir mübadiləsinə hazırlaşır

Rusiya İnsan Hüquqları üzrə müvəkkili Yana Lantratovanın sözlərinə görə, Moskva və Kiyev rəsmiləri azad edilə biləcək şəxslərin siyahılarını dəqiqləşdirir. Son böyük əsir mübadiləsi avqustun 19-da baş tutub. Hər iki tərəf 103 hərbçini azad edib. Mübadiləyə Birləşmiş Ərəb Əmirlikləri vasitəçilik edib. Əsir mübadiləsi 2022-ci ildə müharibənin başlamasından sonra Moskva və Kiyev arasında praktiki əməkdaşlığın davam etdiyi nadir sahələrdən biri olaraq qalır.

İslamabadda xəstəxanada yanğın nəticəsində azı 15 körpə ölüb

Pakistanın paytaxtı İslamabadda dövlət xəstəxanasında baş verən yanğın nəticəsində azı 15 körpə ölüb. Yerli “Geo TV” telekanalının məlumatına görə, yanğın Pakistan Tibbi Elmlər İnstitutunda baş verib. İlkin məlumata görə, yanğına xəstəxananın kondisioner sistemində yaranan nasazlıq səbəb olub. Yanğın başlayan zaman ginekologiya şöbəsində 16 yeni doğulmuş körpə olub, onlardan yalnız biri xilas edilib.

“Narra” və “Saudel” tayfunları Çində güclü yağışlara səbəb ola bilər

Çinin sahilyanı və cənub bölgələri “Narra” tayfununun ölkə daxilinə irəliləməsi, “Saudel” tayfununun isə şərq sahillərinə yaxınlaşması fonunda günlərlə davam edəcək güclü yağışlara hazırlaşır. “Narra” bir neçə gün Beibu körfəzində qaldıqdan sonra avqustun 25-də Haynan adasında quruya çıxıb. Quansi və Haynan bölgələrində on minlərlə insan təxliyə edilib, bəzi müəssisələr və turizm obyektləri fəaliyyətini dayandırıb. “Saudel” tayfununun isə avqustun 27-si və ya 28-də Çjetszyan və Futszyan əyalətləri arasında quruya çıxacağı gözlənilir.

Teqlər

ABŞ İran Donald Tramp İslamabad Rusiya Ukrayna Rusiya-Ukrayna müharibəsi Hörmüz boğazı Oman Çin