Ukrayna: Rusiyanın Kiyevə zərbələri nəticəsində azı 37 nəfər həlak olub

Rusiya Kiyev yaxınlığındakı anbara zərbə endirib: Azı 37 nəfər həlak olub

Ukraynanın Kiyev vilayətinin Mila qəsəbəsində anbara endirilən Rusiya dron zərbəsi güclü partlayışa səbəb olub. Nəticədə azı 37 nəfər həlak olub.

Kiyev və ətraf ərazilərə hücumların üçüncü günündə baş verən bu hadisə son ayların ən çox insan tələfatına səbəb olan zərbələrindən biri hesab olunur.

Rusiyanın Kiyev vilayətinə zərbəsindən sonrakı vəziyyət

Kreml: Rusiya ilə Aİ arasında münasibətlərin yaxşılaşması gözlənilmir

Kremlin sözçüsü Dmitri Peskov bildirib ki, Avropa İttifaqının bəyanatları qurumun Rusiyanı rəqib, hətta düşmən kimi gördüyünü göstərir.

Onun sözlərinə görə, hazırda Rusiya ilə Aİ arasında münasibətlərin yaxşılaşması üçün heç bir perspektiv görünmür.

Peskov hansı bəyanatları nəzərdə tutduğunu açıqlamayıb. O bildirib ki, Aİ-nin hazırkı siyasətçiləri Rusiyaya qarşı sərt mövqelərini yalnız bəyanatlarla deyil, atdıqları addımlarla da nümayiş etdirirlər.

“Onlar Avropanın hərbi imkanlarını səfərbər edərək Rusiyaya qarşı yönəldirlər. Eyni zamanda, bizə qarşı hərbi əməliyyatlarda birbaşa iştirak edirlər”, – Peskov bildirib.

Rusiyanın hücumdan sonra təxliyə olunanlar yardım məntəqəsində gözləyirlər

Ukrayna Rusiyanın dron idarəetmə məntəqəsini vurub

Ukrayna gecə saatlarında endirdiyi zərbələr zamanı Rusiyanın dron idarəetmə məntəqəsini vurub. Bu barədə Ukrayna Baş Qərargahı “Telegram”da məlumat yayıb.

Baş Qərargahın məlumatına görə, Ukrayna ordusu Donetskdə, həmçinin Krım yarımadasında yerləşən hədəflərə zərbələr endirib.

Rusiya mümkün səfərbərlik ərəfəsində vətəndaşların şəxsi məlumatlarına çıxışı genişləndirir  

ABŞ-nin Müharibənin Öyrənilməsi İnstitutu (ISW) bildirib ki, Rusiya Müdafiə Nazirliyi vətəndaşların şəxsi və tibbi məlumatlarına çıxışını genişləndirməyi planlaşdırır. Bu addım sentyabrda keçiriləcək parlament seçkilərindən sonra məcburi səfərbərlik ehtimalı ilə bağlı xəbərlərin yayıldığı bir vaxta təsadüf edir.

Avqustun 28-də dərc olunan qanun dəyişikliyi layihəsi Müdafiə Nazirliyinə vətəndaşların müəyyən hərbi vəzifələrə uyğunluğunu qiymətləndirmək üçün dövlət qurumlarından və şirkətlərdən məlumat almaq imkanı verəcək.

Nazirlik gəlir, iş yeri, təhsil, əlillik, bank və tibbi sənədlər də daxil olmaqla şəxsi məlumatlara çıxış əldə edə biləcək.

Rusiya səfiri: “Moldovanın hava məkanının Rusiya dronları tərəfindən pozulması ilə bağlı iddialar əsassızdır”

Rusiyanın Moldovadakı səfiri Oleq Ozerov Kişinyovun Rusiya dronlarının Moldova hava məkanını dəfələrlə pozması ilə bağlı iddialarını rədd edərək onları əsassız adlandırıb.

Ozerov Rusiyanın “TASS” xəbər agentliyinə müsahibəsində bildirib ki, zəif təşkil olunmuş təxribatlara bənzəyən bu insidentlər ekspertlər və ictimaiyyət arasında istehza ilə qarşılanır.

Moldovanın Müdafiə Nazirliyi isə Ukraynaya hücumlar zamanı beş dronun icazəsiz şəkildə ölkənin hava məkanına daxil olduğunu açıqlayıb.

Moldova Prezidenti Maya Sandu bunu ölkəni qorxutmaq cəhdi kimi qiymətləndirib. Moldova ordusunun məlumatına görə, Ukraynaya qarşı müharibə başlayandan indiyədək Rusiya dronları ölkənin hava məkanına təxminən 70 dəfə daxil olub.

Ukrayna rəsmisi: “Rusiya ölkənin şimalında hücum planlaşdırır”

Ukraynanın “LIGA.net” nəşri Ukrayna Prezident aparatı rəhbərinin müavini Pavel Palisanın jurnalistlər üçün keçirdiyi qapalı brifinqə istinadən bildirib ki, Rusiya ölkənin şimalında hücum planlaşdırır. Kiyev və Çerniqov mümkün hücum hədəfləri sırasında göstərilir.

Palisanın sözlərinə görə, bir neçə mənbədən əldə olunan kəşfiyyat məlumatları göstərir ki, Rusiya hərbi rəhbərliyinə Ukraynanın şimalında mümkün əməliyyatlar üçün bir neçə variant hazırlamaq tapşırılıb.

O əlavə edib ki, hazırda həmin ərazilərdə Rusiyanın hücum qüvvələrinin cəmləşməsi müşahidə edilmir.

Kiyevə zərbələrin fəsadları

Rusiya Ukraynada üç kəndi ələ keçirdiyini açıqlayıb

Rusiyanın Müdafiə Nazirliyi Ukraynada üç kəndin ələ keçirildiyini bildirib. Bu barədə “TASS” agentliyi məlumat yayıb.

Nazirliyin açıqlamasına görə, Rusiya qüvvələri Sumı vilayətində Xrapovşina, Donetsk vilayətində isə Novoandreyevka və Rubijnye kəndlərini ələ keçirib.

Belarus Prezidenti Lukaşenko bu gün Moskvada Putinlə danışıqlar aparacaq

Belarus Prezidenti Aleksandr Lukaşenko avqustun 29-da Rusiya Prezidenti Vladimir Putinlə görüşür. Tərəflərin ikitərəfli əməkdaşlıq, təhlükəsizlik və aktual beynəlxalq məsələləri müzakirə edəcəyi bildirilir.

Görüş Lukaşenkonun bir gün əvvəl Rusiyanın Baş naziri Mixail Mişustinlə apardığı danışıqlardan və Rusiya Baş nazirinin birinci müavini Denis Manturovun Minskə səfərindən sonra baş tutur.

Görüş regionda gərginliyin artdığı bir vaxta təsadüf edir. Məlumatlara görə, avqustun 25-də ABŞ Mərkəzi Kəşfiyyat İdarəsinin direktoru Con Retkliff əvvəlcədən elan olunmayan səfərlə Moskvaya gedib. Bildirilir ki, səfər zamanı rəsmi Vaşinqton Ukraynanı Moskvaya zərbələri dayandırmağa çağırıb.

Zelenski: “Rusiyanın zərbəsi nəticəsində yaşlılar üçün sosial xidmət müəssisəsi zədələnib”

Ukrayna Prezidenti Volodimir Zelenski bildirib ki, Kiyev yaxınlığındakı Mila kəndində Rusiyanın anbara dron zərbəsindən sonra baş verən ikinci partlayış nəticəsində yaşlı və əlilliyi olan şəxslər üçün sosial xidmət müəssisəsi zədələnib.

Zelenskinin sözlərinə görə, Kiyev demək olar, fasiləsiz dron hücumlarına məruz qalır. O bildirib ki, gecə saatlarında 260-dan çox dronla Ukraynanın bir sıra digər regionlarına da hücum edilib.

 Ukrayna rəsmisi Rusiyanın Kiyev vilayətinə hücumu nəticəsində 27 nəfərin həlak olduğunu bildirib

Kiyev vilayətinə gecə saatlarında endirilən zərbə nəticəsində azı 27 nəfər həlak olub, 42 nəfər yaralanıb. Bu barədə Kiyev Vilayət Administrasiyasının rəhbəri Teymur Tkaçenko “Telegram”da məlumat verib.

Onun sözlərinə görə, zərbənin endirildiyi Buça rayonundan 381 nəfər təxliyə edilib.

Belqorodda Ukrayna zərbələri nəticəsində üç nəfər həlak olub

Ukraynanın Rusiyanın qərbindəki Belqorod vilayətinə hücumları nəticəsində üç nəfər həlak olub, 14 nəfər yaralanıb. Bu barədə vilayətin qubernator əvəzi Aleksandr Şuvayev “Telegram”da məlumat verib.

Onun sözlərinə görə, Ukrayna artilleriya, aviasiya, raket və dronlardan istifadə etməklə regiona yeddi hücum həyata keçirib.

Rusiya gecə saatlarında Ukraynaya məxsus 313 dronu vurduğunu bildirib

Rusiyanın “TASS” xəbər agentliyi Müdafiə Nazirliyinə istinadən bildirib ki, gecə saatlarında ölkə ərazisi, eləcə də Azov və Qara dəniz üzərində Ukraynaya məxsus 313 dron zərərsizləşdirilib.

Rostovda Ukrayna zərbələri nəticəsində 7 nəfər yaralanıb

Ukraynanın Rostov vilayətinə gecə saatlarında endirdiyi zərbələr nəticəsində ikisi uşaq olmaqla, yeddi nəfər yaralanıb. Bu barədə vilayətin qubernatoru Yuri Slyusar məlumat verib.

Onun sözlərinə görə, Rostov-na-Donu şəhərində dron qalıqlarının düşməsi nəticəsində iki çoxmərtəbəli yaşayış binasına ziyan dəyib.

“Anbarda pilotsuz uçuş aparatının qalıqları aşkarlanıb”, – Slyusar “Telegram”da bildirib. Qubernator anbarın kimə məxsus olduğunu açıqlamayıb.

Rusiyada pərakəndə satış şirkətinin anbarı gecə saatlarında vurulub

Rusiyanın “Ozon” pərakəndə satış şirkətinin istifadə etdiyi anbara gecə saatlarında dronla hücum edilib və nəticədə yanğın baş verib. Şirkət bu barədə “Telegram”da məlumat yayıb.

“Ozon”un məlumatına görə, Rostovda yerləşən anbara zərbə endirilməzdən əvvəl bütün əməkdaşlar təxliyə edilib, yanğın isə dərhal söndürülüb.

Həmçinin şirkətdən bildirilib ki, fövqəladə xidmətlərin əraziyə baxış keçirməsi və təhlükəsizliyi yoxlaması üçün obyektdə fəaliyyət müvəqqəti dayandırılıb.