Nepalda daşqınlar nəticəsində ölənlərin sayı 1 003 nəfərə çatıb

Ötən həftə Nepal və Tibetdə baş verən dağıdıcı daşqınlar nəticəsində ölənlərin sayı 1 000 nəfəri keçib. 39 ölkədən 590 xarici vətəndaş da daxil olmaqla, təxminən 4 min nəfər hələ də itkin hesab olunur.

Yeni yağıntılar çaylarda suyun səviyyəsini artırıb və xilasedicilər təhlükəsizlik səbəbindən daha yüksək ərazilərə çəkilməyə məcbur olublar.

Kəskin hava şəraiti və yeni daşqın təhlükəsi səbəbindən xilasetmə əməliyyatları bir neçə dəfə dayandırılıb. Nepal-Çin sərhədində buzlaq çöküşündən sonra yaranan sürüşmələr nəticəsində əmələ gələn göllər və müvəqqəti bəndlər nəzarətdə saxlanılır.

Qırmızı Xaçın məlumatına görə, fəlakətdən 90 mindən çox insan zərər çəkə bilər. Çin hakimiyyəti hadisənin iqlim dəyişikliyinin təsirləri ilə əlaqəli ola biləcəyini bildirib.

Xilasetmə işlərinin əsas istiqamətlərindən biri su elektrik stansiyalarındakı tunellərdir. Rəsmilərin məlumatına görə, burada təxminən 639 nəfərin çıxılmaz vəziyyətdə qaldığı bildirilir. Onların xilas edilməsi üçün işlər davam etdirilir.

Axtarış-xilasetmə əməliyyatlarına 9 200 nəfər cəlb olunub. İndiyədək 11 min nəfər xilas edilib.

Çinin xarici işlər naziri Van İ nepallı həmkarı ilə telefon danışığında baş verən fəlakətin son illərdə iki ölkə arasında qeydə alınan ən ağır transsərhəd hadisələrdən biri olduğunu deyib. O, bildirib ki, xilasetmə əməliyyatları mürəkkəb və çətin şəraitdə aparılır.

Tunellərdə xilasetmə işləri davam edir

Nepalda xilasedicilər əsas diqqəti su elektrik stansiyalarının tunellərində qaldığı ehtimal edilən insanların xilas edilməsinə yönəldiblər. Güclü sel Himalay dağlarındakı çaylar boyunca yayılaraq bir sıra ərazilərə ciddi ziyan vurub.

Nepalın təbii fəlakətlərlə mübarizə qurumunun məlumatına görə, ölkədə ölənlərin sayı 734-ə çatıb. 2 498 nəfərin itkin düşdüyü, 7 514 nəfərin isə xilas edildiyi bildirilir.

Nepalda yeni yağışlar daşqın təhlükəsini artırıb

Nepal polisi bildirib ki, yeni yağıntılar nəticəsində Trisuli çayında suyun səviyyəsi yüksəlib. Bu səbəbdən sakinlər və xilasedicilər daha yüksək ərazilərə çəkiliblər.

Nepal ümumi xilasetmə əməliyyatları üçün xarici yardıma ehtiyac olmadığını bildirib. Lakin Xarici İşlər Nazirliyinin sözçüsü Lok Bahadur Çhetri tunellərdə xilasetmə işləri, DNT analizləri, meyitlərin saxlanılması və məhkəmə-tibbi identifikasiya üçün ixtisaslaşmış dəstəyə ehtiyac olduğunu qeyd edib.

Çhetri bildirib ki, Hindistan və Çin mütəxəssisləri artıq tunellərə girişin bərpası işlərinə dəstək göstərirlər.

• Nepalda daşqınlar: Ölənlərin sayı 469-a çatıb

Çin fəlakəti iqlim dəyişikliyi ilə əlaqələndirir

Çinin dövlət mediası bildirib ki, daşqınlara qlobal istiləşmənin təsirləri nəticəsində buzlaqların qeyri-sabitləşməsi səbəb olub.

Pekin Nepala maliyyə yardımı, fövqəladə hallar ləvazimatları, peyk və hidroloji məlumatlar, eləcə də tunel xilasetmə qrupları göndərir.

Sərhəd bölgəsindəki xilasedicilərə avadanlıq çatdırılması üçün helikopterlərdən və ağır yük daşıya bilən dronlardan istifadə olunur. Əsgərlər və fövqəladə hallar əməkdaşları isə itkin şəxslərin axtarışında xüsusi axtarış cihazları, dronlar və naviqasiya sistemlərindən istifadə edirlər.

Teqlər

Çin Nepal Tibet daşqın yağış təbii fəlakət