G20 maliyyə toplantısından beş əsas məqam

G20 maliyyə toplantısından beş əsas məqam
ABŞ-nin maliyyə naziri Skott Bessent və FED sədrinin müavini Filip Cefferson G20 plenar iclasında ekranda nümayiş olunub. ABŞ, 1 sentyabr 2026-cı il.
Reuters
EN

Müəllif

Chigozie Ohaka, Agentliklər

ABŞ-nin Şimali Karolina ştatının Aşvil şəhərində keçirilən G20 maliyyə nazirləri və mərkəzi bank rəhbərlərinin görüşündə qlobal iqtisadi artım, artan borc yükü, ticarət balanssızlığı və enerji təhlükəsizliyi əsas müzakirə mövzuları olub.

ABŞ-nin maliyyə naziri Skott Bessent görüşün əsas diqqətinin iqtisadi artımın sürətləndirilməsinə yönəldiyini bildirib. Onun sözlərinə görə, artan borc səviyyələri və qlobal qeyri-müəyyənlik fonunda ölkələr üçün əsas məqsəd daha güclü və dayanıqlı iqtisadiyyat qurmaqdır.

1) Borc və iqtisadi artım məsələsi

İştirakçılar qlobal borcun artması, yüksək faiz dərəcələri və iqtisadi artıma mane olan amilləri müzakirə ediblər. Bessent bildirib ki, uzunmüddətli perspektivdə borc yükünün öhdəsindən gəlməyin əsas yolu daha sürətli iqtisadi artımdır.

ABŞ nümayəndələri daha az tənzimləmə və özəl sektorun rolunun artırılmasının iqtisadi inkişafı dəstəkləyə biləcəyini vurğulayıblar.

2) Çin və ticarət balanssızlığı
ABŞ-nin maliyyə naziri Skott Bessent G20 ölkələrinin maliyyə nazirlərinin görüşü zamanı mediaya açıqlama verib. ABŞ, 1 sentyabr 2026-cı il.
Reuters

Görüşdə Çinin böyük ticarət profisiti və ixracyönümlü iqtisadi modeli də diqqət mərkəzində olub. ABŞ və bəzi digər ölkələr Pekinin sənaye siyasətinin qlobal bazarlarda balanssızlıq yaratdığını bildiriblər.

Bessent bildirib ki, G20 üzvlərinin əksəriyyəti bazar prinsiplərinə əsaslanmayan ucuz ixrac axınlarının davamlı olmadığını qəbul edib. Çin isə bu mövqeyə qarşı çıxıb.

3) İran və enerji təhlükəsizliyi
Rusiyanın maliyyə naziri Anton Siluanov G20 ölkələrinin maliyyə nazirləri və mərkəzi bank rəhbərlərinin plenar iclasında. ABŞ, 1 sentyabr 2026-cı il.
Reuters

İranla bağlı vəziyyət də görüşün əsas mövzularından biri olub. ABŞ digər ölkələri Tehrana qarşı iqtisadi təzyiqləri artırmağa çağırıb və İranla əlaqəli maliyyə əməliyyatlarına qarşı yeni sanksiyalar tətbiq edə biləcəyini bildirib.

İran münaqişəsi və Hörmüz boğazındakı gərginlik enerji qiymətlərinə və qlobal iqtisadi sabitliyə təsir edən əsas amillərdən biri kimi qiymətləndirilib.

4) Rusiyanın iştirakı narazılıq yaradıb

Rusiyanın maliyyə naziri Anton Siluanovun görüşdə iştirakı bəzi Avropa ölkələri tərəfindən tənqidlə qarşılanıb. Bununla belə, ABŞ rəsmiləri dialoqun münaqişələrin həlli üçün vacib olduğunu bildiriblər.

5) Süni intellekt və gələcək artım

Görüşdə süni intellekt və yeni texnologiyaların iqtisadi artıma təsiri də müzakirə olunub. Rəsmilər innovasiya və rəqəmsal inkişafın gələcək iqtisadi imkanlar üçün mühüm rol oynayacağını qeyd ediblər.

Teqlər

G20 ABŞ Çin İran Rusiya İqtisadi artım Anton Siluanov Skott Bessent
comments
share