ABŞ Çinin gəmiçilik şirkətini kəşfiyyat məlumatları toplamaqda ittiham edir

Tramp administrasiyasının yüksəkvəzifəli rəsmisinin sözlərinə görə, Çininə məxsus iri gəmiçilik şirkəti COSCO bəzi gəmilərində gizlədilmiş avadanlıqlardan istifadə edərək ABŞ da daxil olmaqla, bir sıra ölkələrin sahilləri yaxınlığında hərbi kommunikasiyalarla bağlı kəşfiyyat məlumatları toplayıb.

Rəsmilər bildiriblər ki, COSCO uzun illərdir Pekinlə kəşfiyyat məlumatlarının toplanması sahəsində əməkdaşlıq edir.

Onların sözlərinə görə, bu əməkdaşlıq Çinə Avropa, Şimali Amerika və Asiya boyunca fəaliyyət göstərən hərbi və mülki gəmilər, eləcə də təyyarələr tərəfindən yayılan siqnalları toplamaq imkanı verir.

Rəsmilər qeyd ediblər ki, sözügedən avadanlıq hərbi rabitə sistemləri və şifrələmə texnologiyaları haqqında məlumat əldə etməyə imkan verən siqnalların toplanması üçün nəzərdə tutulub.

Bu məlumatlar Pekinə həm kommersiya, həm də hərbi məqsədlər üçün istifadə olunan mühüm gəmiçilik xətlərini və dəniz marşrutlarını izləməyə də kömək edə bilər.

Rəsmilər bu sistemlərin adi rabitə avadanlığı deyil, mürəkkəb siqnal kəşfiyyatı platformaları olduğunu bildiriblər. Onların sözlərinə görə, Çin bu məlumatlardan ərazi mübahisələrində mövqeyini gücləndirmək və xarici hərbi fəaliyyətləri izləmək imkanlarını artırmaq üçün istifadə edə bilər.

COSCO şərh sorğusuna cavab verməyib. Çinin Vaşinqtondakı səfirliyi isə ittihamları rədd edərək, iddiaları tamamilə əsassız adlandırıb.

COSCO-nun Pekinlə əlaqələri

Bu ittihamlar Vaşinqtonun Çinin kommersiya gəmiçiliyi sektoru ilə ölkənin hərbi və kəşfiyyat strukturları arasındakı əlaqələri daha diqqətlə araşdırdığı bir vaxtda irəli sürülüb.

ABŞ Hərbi Dəniz Kollecinin 2025-ci il hesabatında qeyd olunurdu ki, Çin Xalq Azadlıq Ordusu böyük ehtimalla balıqçılıq və kommersiya donanmalarından kəşfiyyat və müşahidə məqsədləri üçün istifadə edir.

Pentaqon 2025-ci ilin yanvarında COSCO-nu Çin ordusu ilə əlaqəli şirkətlər siyahısına daxil edib. Bu siyahıya salınmaq rəsmi sanksiyalarla nəticələnməsə də, şirkətin nüfuzuna mənfi təsir göstərə və ABŞ hökumətinin satınalmalarında məhdudiyyətlər yarada bilər.

Çin qanunvericiliyi şirkətlərdən dövlətin kəşfiyyat fəaliyyətlərinə dəstək göstərməyi tələb edir. Bununla belə, Pekin xaricdə qanunsuz məlumat toplamaq üçün şirkətlərdən istifadə etmədiyini bildirir.

Təhlükəsizliklə bağlı narahatlıqlara baxmayaraq, COSCO qlobal ticarət sisteminə dərindən inteqrasiya olunmuş vəziyyətdə qalır və ABŞ-nin əsas limanlarına girişini davam etdirir.

Tramp administrasiyası daha əvvəl ABŞ-nin dənizçilik və gəmiqayırma sənayesini yenidən qurmaq səyləri çərçivəsində COSCO da daxil olmaqla, Çin gəmiçilik şirkətlərinə qarşı milyardlarla dollar həcmində liman rüsumlarının tətbiqini təklif etmişdi.

Lakin daha sonra Tramp və Çin Xalq Respublikasının Sədri Si Cinpin arasında əldə olunan ticarət razılaşmasından sonra bu plan dayandırıldı.

Teqlər

COSCO ABŞ Çin kəşfiyyat gəmi