canlı Kreml: ABŞ nümayəndələri ilə danışıqlar faydalı keçib

Rusiya Ukraynaya hərbi texnika daşıyan gəmiyə zərbə endirdiyini bildirib

Rusiya Müdafiə Nazirliyi Qara dənizdə Qərb ölkələri tərəfindən Ukraynaya göndərilən hərbi texnikanı daşıyan gəmiyə zərbə endirildiyini bildirib. Bu barədə Rusiya dövlət xəbər agentlikləri məlumat yayıblar.
Nazirlik gəmi və onun göyərtəsində olduğu bildirilən texnika ilə bağlı əlavə məlumat verməyib.

ABŞ nümayəndələri Kiyevdəki sülh danışıqlarından ümidlidirlər

ABŞ nümayəndəsi Cared Kuşner Kiyevdə keçirilən sülh danışıqlarında daha çox irəliləyiş əldə etməyə ümid etdiklərini bildirib.
Kuşner Ukrayna rəsmiləri ilə danışıqların ilk raundundan sonra digər ABŞ nümayəndəsi Stiv Uitkoffla birgə çıxış edib. O, ABŞ komandasının növbəti addımlarda daha çox nəticə əldə etməyi gözlədiyini deyib.
Uitkoff nümayəndə heyətinin “məzmunlu və vacib” adlandırdığı müzakirələrdən sonra nikbin olduğunu bildirib.
Ukrayna Prezidenti Volodimir Zelenskinin sözlərinə görə, danışıqların ilk raundu təxminən üç saat davam edib. Avropa nümayəndələrinin iştirakı ilə əlavə müzakirələrin keçirilməsi gözlənilir.

Zelenski: “Ukrayna-ABŞ danışıqlarının ilk raundu başa çatıb”

Ukrayna Prezidenti Volodimir Zelenski bildirib ki, Ukrayna və ABŞ nümayəndələri arasında danışıqların ilk raundu başa çatıb.

ABŞ-nin xüsusi nümayəndəsi Stiv Uitkoff görüşdə məzmunlu və mühüm müzakirələrin aparıldığını, danışıqların gedişinə nikbin yanaşdığını bildirib.
ABŞ nümayəndə heyətinin üzvü Cared Kuşner isə tərəflərin növbəti mərhələdə daha çox irəliləyiş əldə edəcəyinə ümid etdiyini deyib.

ABŞ nümayəndələri Putinlə danışıqlardan sonra Kiyevə səfər ediblər

ABŞ Prezidentinin xüsusi nümayəndələri Stiv Uitkoff və Cared Kuşner Rusiya Prezidenti Vladimir Putinlə Moskvada keçirdikləri görüşdən sonra Ukrayna rəsmiləri ilə danışıqlar aparmaq üçün Kiyevə səfər ediblər. Ağ Ev bildirib ki, Rusiya ilə keçirilən danışıqlarda Ukraynadakı müharibəyə son qoymaq üçün növbəti addımlar üzrə planlar müzakirə olunub.

Görüşlər Vaşinqtonun Moskva və Kiyev arasında diplomatik səylərini davam etdirdiyi bir vaxtda keçirilir. Ukrayna Prezidenti Volodimir Zelenski komandasının müharibənin başa çatdırılması istiqamətində danışıqlara hazır olduğunu bildirib və təhlükəsizlik zəmanətlərinin vacibliyini vurğulayıb.

ABŞ Prezidenti Donald Trampın kürəkəni Cared Kuşner və ABŞ-nin xüsusi nümayəndəsi Stiv Uitkoff Ukrayna Prezidenti Volodimir Zelenski ilə görüşdən əvvəl. Kiyev, Ukrayna, 6 sentyabr 2026-cı il.

Reuters

Avropa ölkələrinin milli təhlükəsizlik müşavirləri Kiyevə gediblər

Böyük Britaniya, Fransa və Almaniyanın milli təhlükəsizlik müşavirləri Kiyevə səfər ediblər. Bu barədə məlumatlı mənbə bildirib. Səfər Ukrayna və ABŞ nümayəndələri Stiv Uitkoff və Cared Kuşner arasında keçiriləcək danışıqlar ərəfəsində baş tutub. 

Mənbə müşavirlərin hansı görüşlərdə iştirak edəcəyi barədə məlumat verməyib.

Lavrov: “Dron ittihamları “əsl müharibənin başlanğıcıdır”

Rusiyanın xarici işlər naziri Sergey Lavrov bildirib ki, Qərbin Moskvanı Almaniyanın Leypsiq-Halle hava limanında baş verən dron insidenti ilə bağlı ittiham etməsi əsl müharibənin başlanğıcıdır. Bu barədə Rusiyanın informasiya agentliyi TASS məlumat yayıb.

Rusiyanın xarici işlər naziri Sergey Lavrov. Moskva, Rusiya, 25 avqust 2026-cı il.

Ukrayna XİN: Rusiyanın cəbhədə irəliləyişi zəifləyib

Ukraynanın xarici işlər naziri Andrey Sibiqa bildirib ki, cəbhədəki vəziyyət Rusiyanın müharibədə qalib gəlmədiyini və gəlməyəcəyini göstərir.

Onun sözlərinə görə, Rusiyanın 2026-cı ildə irəliləyiş tempi əvvəlki illə müqayisədə əhəmiyyətli dərəcədə zəifləyib və Moskva Ukrayna ərazisinin 0,2 faizindən az hissəsini nəzarətə götürüb.

Sibiqa bildirib ki, avqustda təxminən 42 min Rusiya hərbçisi ölüb və ya yaralanıb. Onun sözlərinə görə, bu, müharibə başlayandan bəri Rusiyanın ən yüksək aylıq itkilərindən biridir.

Nazirin sözlərinə görə, Rusiya əsas qüvvələrini Donetsk istiqamətində cəmləşdirsə də, ciddi irəliləyişə nail ola bilməyib və sülh şərtlərini diktə etmək iqtidarında deyil.

Sibiqa bu açıqlamanı Rusiya Prezidenti Vladimir Putinin Rusiya qüvvələrinin irəliləyiş tempini artırdığını və avqust ayında Donetsk vilayətində yeni ərazilər ələ keçirdiyini bildirməsindən sonra səsləndirib.

Rusiya, ABŞ və Çin liderlərinin üçtərəfli görüşü istisna edilmir

Reuters
Rusiya xarici işlər nazirinin müavini Sergey Ryabkov sentyabrın 6-da bildirib ki, Rusiya, ABŞ və Çin liderlərinin iştirakı ilə üçtərəfli görüş istisna edilmir. Bu barədə Rusiyanın dövlət xəbər agentliyi TASS məlumat yayıb.

Rusiya xarici işlər nazirinin müavini Sergey Ryabkov mətbuat konfransında iştirak edir. Moskva, Rusiya, 26 noyabr 2025-ci il.  

Reuters

Rusiya: Ukraynanın gecə hücumu nəticəsində 1 nəfər ölüb, 4 nəfər yaralanıb

Rusiya bildirib ki, Ukraynanın gecə saatlarında Belqorod və Rostov da daxil olmaqla bir neçə bölgəyə dron hücumları nəticəsində bir nəfər ölüb, dörd nəfər yaralanıb.
Rusiya rəsmilərinin məlumatına görə, dron hücumları Rostov vilayətində yaşayış binalarına ziyan vurub, Ryazan vilayətində isə zavodda yanğına səbəb olub. Rəsmi Moskva isə qüvvələrinin 258 Ukrayna dronunu məhv etdiyini açıqlayıb. 
Ukrayna isə bildirib ki, Rusiyanın hava hücumu Rumıniya ilə sərhəddə yerləşən infrastruktur obyektlərinə ziyan vurub. Nəticədə Orlivka sərhəd-keçid məntəqəsində fəaliyyət müvəqqəti dayandırılıb.
Hadisələr ABŞ nümayəndələri Stiv Uitkoff və Cared Kuşnerin Ukraynadakı müharibəyə son qoyulması məqsədilə diplomatik səylər apardığı bir vaxtda baş verib. Onlar Moskvada görüşlər keçiriblər. ABŞ nümayəndələrinin Kiyevə səfəri də gözlənilir.

ABŞ və Rusiya rəsmiləri Ukrayna ilə bağlı danışıqlarda növbəti addımları müzakirə ediblər

Ağ Evin nümayəndəsi sentyabrın 5-də bildirib ki, ABŞ və Rusiya rəsmiləri Ukraynadakı müharibəyə son qoymaq məqsədi daşıyan danışıqlarda növbəti addımlarla bağlı planları müzakirə ediblər. Həmin addımların yaxın həftələrdə açıqlanacağı qeyd olunub.

Rusiya Prezidenti Vladimir Putinin köməkçisi Yuri Uşakov bildirib ki, görüşlər çox faydalı keçib və mümkün sülh razılaşması ilə bağlı bir sıra təkliflər müzakirə olunub. Lakin danışıqlardan sonra hər hansı konkret irəliləyiş və ya razılaşma barədə məlumat verilməyib. Putin ABŞ nümayəndələrinə Rusiyanın döyüş meydanında irəliləyiş əldə etdiyini bildirib və münaqişənin köklü səbəblərinin həll edilməsinin vacibliyini vurğulayıb.

Ağ Evin nümayəndəsi görüşləri “məzmunlu” adlandırıb və növbəti addımların yaxın həftələrdə açıqlanacağını bildirib. Putin də Ağ Ev rəhbəri Donald Trampın müharibəni bitirmək səylərini yüksək qiymətləndirib.

Bununla yanaşı, Rusiya və Ukrayna arasında əsas fikir ayrılıqları qalır. Moskva ərazi tələblərindən və NATO ilə bağlı mövqeyindən geri çəkilmir. Kiyev isə hər hansı sülh razılaşması çərçivəsində ərazi güzəştini istisna edir.