canlı ABŞ nümayəndələri Ukraynada Zelenski ilə sülh səylərini müzakirə ediblər

Merts: “Rusiyayönlü AfD-nin qələbəsi Ukraynaya dəstəyimizə təsir etməyəcək”

Almaniya kansleri Fridrix Merts bazar ertəsi bildirib ki, Rusiyayönlü AfD-nin əyalət seçkisində qələbəsi federal hökumətin Ukraynaya dəstəyini dəyişməyəcək. O, həmçinin Almaniyanın daxili təhlükəsizliyinin real və konkret təhdidlə üzləşdiyini bildirib.

“Bunu çox aydın şəkildə demək istəyirəm: Buradan 2 500 kilometr şərqdə bu seçkinin nəticəsinə xüsusilə sevinənlər var”, – deyə Merts Almaniyanın şərqindəki Saksoniya-Anhalt əyalətində keçirilən seçkinin nəticələrini şərh edərkən Rusiyanı nəzərdə tutaraq bildirib.

Almaniya kansleri və Xristian Demokrat İttifaqı (CDU) partiyasının lideri Fridrix Merts. Berlin, Almaniya, 7 sentyabr 2026-cı il.

Rusiyanın hücumu Ukraynanın Çerniqov vilayətindəki “BAT” zavodunu zədələyib

Rusiyanın hücumu nəticəsində Ukraynanın şimalındakı Çerniqov vilayətinin Priluki şəhərində yerləşən “British American Tobacco” (BAT) zavodu zədələnib. Bu barədə şirkət bazar ertəsi məlumat yayıb.

“BAT Ukraine”ın mətbuat xidməti bildirib ki, şirkət zərbənin nəticələrini araşdırır. İlkin məlumata görə, hücum nəticəsində xəsarət alan olmayıb.

Ukraynanın Rusiyanın nəzarətində olan Luqansk bölgəsinə hücumu nəticəsində bir nəfər ölüb

Ukraynanın şərqindəki Luqansk vilayətinin Rusiyanın nəzarətində olan hissəsində avtomobilə edilən hücum nəticəsində bir nəfər ölüb. Bu barədə bazar ertəsi Luqanskın Rusiya tərəfindən təyin edilmiş rəhbəri Leonid Paseçnik məlumat verib.

Zelenski: “Diplomatik səylərin davam etdirilməsi çox vacibdir”

Ukrayna Prezidenti Volodimir Zelenski bazar ertəsi ABŞ nümayəndələrinin danışıqlar üçün Kiyev və Moskvaya səfərlərindən sonra bütün tərəfləri “diplomatik səyləri davam etdirməyə” çağırıb.

“Tərəfdaşlarımız qışa qədər hansı addımların nəticə verə biləcəyini və verməli olduğunu bilirlər. Növbəti addımlarımızı əlaqələndiririk. Qarşıdakı görüşlərə və təmaslara hazırlaşırıq”, – deyə Zelenski “X” hesabında bildirib.

Kreml Ukrayna və ABŞ ilə sülh danışıqlarının yenidən başlamasını istisna etmir

Kreml bazar ertəsi bildirib ki, Rusiya, Ukrayna və ABŞ arasında sülh danışıqlarının bərpasını istisna etmir. Lakin belə danışıqların nə vaxt və harada keçirilə biləcəyini söyləmək hələ tezdir.

Kremlin sözçüsü Dmitri Peskov bu açıqlamanı ABŞ-nin xüsusi nümayəndələri Stiv Uitkoff və Cared Kuşnerin həftəsonu Moskva və Kiyevə səfərləri ilə bağlı sualı cavablandırarkən verib. ABŞ nümayəndələri Ukraynadakı müharibəyə son qoymaq məqsədi daşıyan, lakin dayandırılmış sülh danışıqlarını canlandırmağa çalışırlar.

Peskov bildirib ki, Kreml Rusiya Prezidenti Vladimir Putinlə ABŞ Prezidenti Donald Tramp arasında nümayəndələrin səfərini müzakirə etmək üçün telefon danışığının baş tutmasını istisna etmir.

Peskovun sözlərinə görə, Moskva ABŞ nümayəndələrinin sentyabrın 6-da Kiyevdə Ukrayna rəsmiləri ilə keçirdiyi görüşlər barədə hələlik heç bir məlumat almayıb.

Kremlin sözçüsü Dmitri Peskov Moskvada. Rusiya, 3 iyun 2026-cı il.

Almaniyanın daxili işlər naziri: “Rusiya dronları ölkənin azadlığını təhdid edir”

Almaniyanın daxili işlər naziri Aleksander Dobrindt bazar ertəsi bildirib ki, ölkənin azadlığı həm Rusiya dronları, həm də parlamentdə Moskvanı dəstəkləyən deputatlar tərəfindən təhdid olunur. Bu açıqlama hökumətin Rusiyaya qarşı daha sərt mövqe tutduğunu göstərir.

“Almaniyada azadlıq kənardan səmamızdakı Rusiya dronları, daxildən isə parlamentlərimizdəki Moskvanın ideoloji tərəfdarları tərəfindən təhdid olunur”, – deyə Dobrindt Bavariyada keçirilən siyasi mitinqdə bildirib.

Berlin avqustda Leypsiq-Halle hava limanına dron hücumunda Rusiyanı günahlandırıb. Dobrindtin açıqlaması Rusiya ilə əlaqələrin bərpasını müdafiə edən ifrat sağçı AfD-nin 6 sentyabrda Saksoniya-Anhaltda keçirilən əyalət seçkisində qalib gəlməsindən sonra səsləndirilib.

Almaniyanın daxili işlər naziri Aleksandr Dobrindt ənənəvi “Gillamoos” yarmarkasında. Almaniya, 7 sentyabr 2026-cı il.

Rusiyanın Tatarıstan bölgəsində sənaye obyekti dron hücumu nəticəsində zədələnib

Rusiyanın TASS xəbər agentliyi bazar ertəsi Ukrayna dronunun Tatarıstandakı sənaye obyektinə hücumu nəticəsində obyektə cüzi ziyan dəydiyini bildirib. Agentlik məlumatı bölgə rəhbərinin mətbuat xidmətinə istinadən yayıb.

TASS obyektin adını və yerini açıqlamayıb.

Zelenski Rusiyanın Perm diyarına zərbəni təsdiqləyib

Ukrayna Prezidenti Volodimir Zelenski ölkəsinin Rusiyanın Perm diyarına zərbə endirdiyini təsdiqləyib. Onun sözlərinə görə, neft emalı obyektləri vurulub.

Zelenski Tatarıstandakı obyektlərin, Ryazandakı neft emalı zavodunun, Kurskdakı dronların saxlanılması və buraxılması üçün istifadə olunan məntəqənin, həmçinin Qara dənizdə yeri açıqlanmayan hədəfin vurulduğunu bildirib.

Ukraynanın Rusiyanın Belqorod vilayətinə dron hücumu 1 nəfərin ölümünə səbəb olub

Yerli hakimiyyət orqanlarının məlumatına görə, Ukraynanın sərhəddə yerləşən Belqorod vilayətinə dron hücumu nəticəsində bir nəfər ölüb, bir nəfər isə yaralanıb.

“Reuters” məlumatı müstəqil şəkildə təsdiqləyə bilməyib. Ukrayna tərəfi isə məsələ ilə bağlı dərhal açıqlama verməyib.

Ukraynanın dron hücumu Rusiyanın Perm vilayətində 1 nəfərin ölümünə səbəb olub

Rusiyanın Perm vilayətində Ukraynaya məxsus dron hücumu nəticəsində yaşayış binasına ziyan dəyib, bir nəfər ölüb, dörd nəfər yaralanıb. Bu barədə vilayətin qubernatoru Dmitri Maxonin məlumat verib.

Onun sözlərinə görə, yerli hava hücumundan müdafiə bölmələri 27 dronu vurub.

Kiyevdə hava hücumu xəbərdarlığı zamanı körpələr dünyaya gəlir

Kiyevdə hava hücumu xəbərdarlıqlarına və Rusiyanın dron hücumları təhlükəsinə baxmayaraq, uşaqlar dünyaya gəlir. Alyona Bohatyrenko hava hücumu xəbərdarlığı zamanı doğum evində qız övladını dünyaya gətirib. O bildirib ki, təhlükə şəraitində yaşamağa müəyyən qədər alışıb.

Kiyev Şəhər 2 saylı Doğum Evində həkimlər təhlükəsizlik risklərinə baxmayaraq, doğuş prosesini davam etdirmək qərarına gəliblər. Rusiyanın artan hücumları Kiyevdə gündəlik həyata təsir göstərir. Rəsmilər qış yaxınlaşdıqca vəziyyətin daha da çətinləşə biləcəyi barədə xəbərdarlıq edirlər.

Gənc ailələr davam edən zərbələr və enerji kəsintiləri səbəbindən daha təhlükəsiz ərazilərə köçməyi nəzərdən keçirirlər. Müharibə Ukraynada doğum səviyyəsinin azalmasına səbəb olub və ölkənin demoqrafik böhranını daha da dərinləşdirib.

Rusiya Çornomorsk və İzmail limanlarında hərbi yük obyektlərinə zərbələr endirib

Rusiya ordusu Ukraynanın Çornomorsk limanında hərbi yük daşıdığı bildirilən “Mavka” quru yük gəmisinə zərbə endirib. Bu barədə sentyabrın 7-də “İnterfaks” agentliyi Rusiya Müdafiə Nazirliyinə istinadən məlumat yayıb.

Rusiya Müdafiə Nazirliyinin məlumatına görə, zərbə sentyabrın 6-sı axşam saatlarında endirilib. Sentyabrın 7-si səhər isə İzmail limanında hərbi yüklərin boşaldılması üçün istifadə edildiyi bildirilən istehsal-yükləmə kompleksi hədəfə alınıb.

Zelenski ABŞ nümayəndələri ilə danışıqlarda ölkəsinin qışa hazırlığını müzakirə edib

Ukrayna Prezidenti Volodimir Zelenski sentyabrın 6-da Kiyevdə keçirilən üç raund danışıqları “çox məzmunlu” adlandırıb.

O bildirib ki, ABŞ prezidentinin xüsusi nümayəndələri Stiv Uitkoff və Cared Kuşner, eləcə də Avropa tərəfdaşları ilə aparılan müzakirələrdə müharibənin qış aylarında da davam edə biləcəyi nəzərə alınaraq Ukraynaya dəstək məsələlərinə xüsusi diqqət yetirilib.

Zelenskinin sözlərinə görə, Ukrayna hava hücumundan müdafiə imkanlarının gücləndirilməsi və enerji sektoruna dəstək, həmçinin ABŞ-dən böyük həcmdə mayeləşdirilmiş təbii qazın (LNG) tədarükü və ondan istifadə imkanlarına ehtiyac duyur.

O, Ukraynanın qış aylarında üzləşə biləcəyi çətinliklərə göstərdikləri diqqətə görə ABŞ və Avropa tərəfdaşlarına təşəkkür edib.

ABŞ nümayəndələri Ukraynada Zelenski ilə sülh səylərini müzakirə ediblər

ABŞ prezidentinin xüsusi nümayəndələri Cared Kuşner və Stiv Uitkoff Rusiyanın Ukraynaya qarşı müharibəsinə son qoyulması istiqamətində səyləri müzakirə etmək üçün Kiyevdə Ukrayna Prezidenti Volodimir Zelenski ilə görüşüblər. Bu, Kuşner və Uitkoffun bu missiya çərçivəsində Kiyevə ilk səfəri olub. Görüş ABŞ nümayəndələrinin bir gün əvvəl Moskvada Rusiya Prezidenti Vladimir Putinlə apardığı danışıqlardan sonra baş tutub.

“Biz çox məzmunlu, əhatəli və vacib müzakirə apardıq”, – deyə Uitkoff görüşdən sonra bildirib. O əlavə edib ki, ABŞ nümayəndə heyəti danışıqları zəruri olduğu müddətdə davam etdirəcək.

Kuşner isə bildirib ki, Prezident Donald Trampın məqsədi yalnız hazırkı münaqişəyə son qoymaq deyil, həm də uzunmüddətli və dayanıqlı sülh üçün şərait yaratmaqdır. O, ABŞ nümayəndə heyətinin Moskvaya səfəri zamanı çox şey öyrəndiyini də qeyd edib.

Danışıqlara Böyük Britaniya, Fransa və Almaniyanın milli təhlükəsizlik məsələləri üzrə müşavirləri də qoşulublar. Zelenski onların iştirakını yüksək qiymətləndirib.

Ukrayna Prezidenti bildirib ki, hazırkı vəziyyət müharibənin qış aylarında da davam edə biləcəyini göstərir.