8 sentyabr 2026, 08:07
Rusiya və Ukrayna gecə saatlarında qarşılıqlı hücumlar həyata keçirib. Şəhər meri Vitali Kliçko Kiyevə endirilən zərbələr nəticəsində altı nəfərin yaralandığını bildirib. Vilayət qubernatoru Roman Busargin Rusiyanın Saratov vilayətinə dron hücumları barədə məlumat verib.
Avropa Komissiyasının Prezidenti Ursula fon der Lyayen bildirib ki, Ukrayna Avropa İttifaqının növbəti 3,2 milyard avro (3,72 milyard dollar) məbləğində dəstək krediti çərçivəsində “Patriot” hava hücumundan müdafiə sistemləri üçün vacib hissələr ala biləcək.
Onun sözlərinə görə, Aİ-yə üzv ölkələr Ukraynaya bu avadanlıqları almağa imkan verən istisnanı təsdiqləyiblər. Bu qərar Kiyevin Rusiya raket və dron hücumlarına qarşı hava hücumundan müdafiə imkanlarını gücləndirməyə çalışdığı bir vaxtda qəbul edilib.
Rumıniyanın kəşfiyyat xidməti bildirib ki, Rusiya tərəfindən koordinasiya edildiyi iddia olunan təxribat əməliyyatının ölkə ərazisində həyata keçirilməsinin qarşısını alıb.
Buxarest Rusiyanın hibrid fəaliyyətləri kimi qiymətləndirdiyi hallara qarşı mübarizəni gücləndirdiyi bir vaxtda bu açıqlamanı verib.
Ukraynanın şərqində yerləşən Donetsk vilayətinin qubernatoru Vadim Filaşkin “Telegram” hesabında bildirib ki, Rusiyanın hücumları nəticəsində 2 nəfər ölüb.
Onun sözlərinə görə, zərbələr nəticəsində daha azı 10 nəfər yaralanıb.
Kiyev meri Vitali Kliçko “Telegram” hesabında bildirib ki, sentyabrın 7-də gecə saatlarından etibarən Rusiya zərbələri nəticəsində Ukrayna paytaxtında ölənlərin sayı 3 nəfərə çatıb.
Almaniya polisi ölkənin qərbində yerləşən Gevelsberq şəhərində 48 yaşlı kişini saxlayıb. O, elektrik şəbəkəsinə qarşı bir neçə dəfə təxribat törətməkdə şübhəli bilinir. Bu barədə “Frankfurter Allgemeine Zeitung” qəzeti məlumat yayıb. Polis sözçüsü bir şəxsin saxlanıldığını təsdiqləsə də, əlavə məlumat verməyib.
Son həftələrdə Almaniyada elektrik yarımstansiyalarına bir neçə hücum həyata keçirilib. Hücumlar zamanı hava elektrik xətlərinə müxtəlif əşyalar atan qurğulardan və fişəngə bənzər vasitələrdən istifadə olunub. Nəticədə qısaqapanmalar baş verib.
Rəsmilərin məlumatına görə, Ukrayna dronunun Rusiyanın qərbində yerləşən Kursk vilayətinə hücumu nəticəsində bir mülki şəxs həlak olub.
Bundan əvvəl Bryansk vilayətinin qubernator vəzifəsini icra edən Yeqor Kovalçuk bildirib ki, Starodub şəhərində yanacaqdoldurma məntəqəsinə endirilən digər zərbə nəticəsində 39 yaşlı kişi ölüb.
“Reuters” məlumatları təsdiqləyə bilməyib. Ukrayna tərəfi isə açıqlama verməyib.
Ukrayna Prezidenti Volodimir Zelenski bildirib ki, Kiyevdə “Biz Ukraynayıq” telekanalının yerləşdiyi binaya canlı yayım zamanı dronla zərbə endirilib.
Onun sözlərinə görə, zərbə nəticəsində binanın bir hissəsi dağılıb, 5 nəfər yaralanıb.
Ukrayna Dövlət Fövqəladə Hallar Xidməti hücumdan sonra başlayan yanğını söndürüb.
Rusiya xarici işlər naziri Sergey Lavrov bildirib ki, həftəsonu Moskvada ABŞ nümayəndələri ilə keçirilən danışıqlarda Ukraynanın NATO-ya üzvlüyü və cəbhədəki vəziyyət əsas müzakirə mövzuları olub.
TASS-ın məlumatına görə, Lavrov bunu amerikalı analitik Endryu Napolitanonun sualını cavablandırarkən deyib. Müsahibə sentyabrın 8-də Rusiyanın “Böyük oyun” televiziya proqramında yayımlanacaq.
“Əminliklə deyə bilərəm ki, müzakirələr Prezident Trampın vəzifəyə qayıtdıqdan sonra Ukrayna ilə bağlı açıqladığı mövqeyə əsaslanıb.
O, ilk növbədə Ukraynanın Şimali Atlantika Alyansına cəlb olunması cəhdlərindən imtina edilməsinin vacibliyini bildirib.
Vladimir Putin bu məsələnin bağlandığını açıqlamazdan xeyli əvvəl bunun aydın olduğu görünürdü. ABŞ mövqeyinin ikinci hissəsi isə cəbhədəki reallıqların qəbul edilməsidir”, – deyə Lavrov bildirib.
Kremlin sözçüsü Dmitri Peskov hindistanlı jurnalistlərə bildirib ki, Rusiya dollardan imtina etmək niyyətində deyil və bütün məqbul ödəniş üsullarına açıqdır.
O əlavə edib ki, bəzi ölkələr öz valyutalarından siyasi vasitə kimi istifadə edirlər. Peskov həmin ölkələrin adını açıqlamayıb.
Macarıstanın xarici işlər naziri Anita Orban bildirib ki, ölkəsi 10 Rusiya diplomatını ölkədən çıxarıb.
Onun sözlərinə görə, diplomatlar Vyana Konvensiyasına zidd fəaliyyətlə məşğul olublar.
“Bu qərar Macarıstanın təhlükəsizliyinin və suverenliyinin qorunmasına xidmət edir. Bu, Rusiya ilə diplomatik münasibətlərin kəsilməsi demək deyil. Macarıstan qarşılıqlı hörmət və qaydalara riayət əsasında zəruri dialoqu davam etdirmək niyyətindədir”, – deyə Orban bildirib.
Ukrayna Prezidenti Volodimir Zelenski bildirib ki, üçtərəfli danışıqlar Türkiyə, Birləşmiş Ərəb Əmirlikləri, İsveçrə və ya digər ölkələrdən birində keçirilə bilər.
Onun sözlərinə görə, danışıqlar zamanı taxıl daşımalarına və enerji infrastrukturuna zərbələrin dayandırılması imkanları müzakirə oluna bilər.
Ukrayna Prezidenti Volodimir Zelenski bildirib ki, Kiyev taxıl daşımalarına və enerji infrastrukturuna zərbələrlə bağlı güzəştə getməyə hazırdır.
Onun sözlərinə görə, Rusiya da eyni addımı atmalıdır.
Kremlin sözçüsü Dmitri Peskov onlayn mətbuat brifinqində bildirib ki, Rusiya istənilən vaxt sülh prosesinə keçməyə hazırdır, lakin bunun Ukrayna hökumətindən asılı olduğunu deyib.
O, Moskvanın Ukraynadakı hərbi məqsədlərinə nail olmalı olduğunu da qeyd edib.
Peskovun sözlərinə görə, Rusiya Prezidenti Vladimir Putin sentyabrın 11-də Hindistanın Baş naziri Narendra Modi ilə görüşəcək. Görüş zamanı ticarət və iqtisadi məsələlərin müzakirə olunacağı gözlənilir.
Ukrayna Prezidenti Volodimir Zelenski bildirib ki, ABŞ nümayəndələri Stiv Uitkoff və Cared Kuşner ötən həftəsonu Kiyevə səfərləri zamanı sülhlə bağlı bir neçə yeni və məqbul təklif irəli sürüblər.
Zelenski sentyabrın sonunadək ABŞ Prezidenti Donald Trampla görüşməyə ümid etdiyini deyib. Onun sözlərinə görə, görüşdə Ukraynanın qış ayları üçün hava hücumundan müdafiə paketinin müzakirəsi planlaşdırılır.
Böyük Britaniya qış aylarında Ukraynanın hava hücumundan müdafiəsini gücləndirmək üçün 135 milyon dollar ayıracaq.
Yardım paketinə “Patriot” raketləri, iriçaplı artilleriya mərmiləri və pilotsuz uçuş aparatları daxil olacaq.
Böyük Britaniyanın müdafiə naziri Ues Stritinq bildirib ki, bu yardım Ukraynanın qış aylarında müdafiə imkanlarını gücləndirəcək.
“Ukrayna qalib gələnədək onun yanında olacağıq. Ukraynadakı cəbhə bütün dünyada azadlığın cəbhəsidir. Dəstəyimiz davam edəcək”, – deyə nazir bildirib.
Böyük Britaniyanın müdafiə naziri Ues Stritinq hökumət iclasına gəlir. 8 sentyabr 2026-cı il.
Moskvanın təyin etdiyi Krım rəhbəri Sergey Aksyonov bildirib ki, Ukraynanın hücumu nəticəsində 2 nəfər ölüb, 1 nəfər yaralanıb.
Hücumun baş verdiyi yer və necə həyata keçirildiyi barədə əlavə məlumat açıqlanmayıb.
Ukrayna tərəfi isə bu iddia ilə bağlı hələlik açıqlama verməyib.
Polşa Silahlı Qüvvələri Rusiyanın gecə saatlarında Ukraynaya endirdiyi zərbələrlə əlaqədar başlatdığı qabaqlayıcı əməliyyatı başa çatdırıb. Ordu bildirib ki, Polşa hava məkanının pozulması qeydə alınmayıb.
Hücumlar zamanı hərbi təyyarələr havaya qaldırılıb, hava hücumundan müdafiə sistemləri isə yüksək hazırlıq vəziyyətinə gətirilib.
Ukraynanın Rusiyanın qərbində yerləşən Bryansk vilayətinin Starodub şəhərində yanacaqdoldurma məntəqəsinə hücumu nəticəsində 39 yaşlı kişi ölüb. Bu barədə vilayətin müvəqqəti qubernatoru Yeqor Kovalçuk məlumat verib.
O bildirib ki, daha üç nəfər yaralanıb.
Ukrayna Prezidenti Volodimir Zelenski “X” platformasında yazıb ki, Rusiyanın gecə saatlarında Ukraynaya hücumları nəticəsində kritik infrastruktura ziyan dəyib.
O bildirib ki, ölkənin cənubundakı Odessa vilayətində bazar hədəfə alınıb, Xarkov şəhərinə endirilən zərbə nəticəsində isə iki nəfər yaralanıb.
Zelenski Ukrayna Silahlı Qüvvələrinin gecə ərzində 175 hava hədəfini məhv etdiyini bildirib. O, ballistik raketlərin vurulmasının hələ də çətin olduğunu vurğulayaraq, Ukraynanın daha çox raket əleyhinə müdafiə vasitəsinə ehtiyac duyduğunu qeyd edib.
Ukrayna Hərbi Hava Qüvvələrindən bildirilib ki, Rusiya gecə saatlarında Ukraynaya raketlər və 166 pilotsuz uçuş aparatı (PUA) ilə hücum edib. Hücumların əsasən Kiyev ətrafındakı bölgələrə və ölkənin cənubundakı Odessa vilayətinə yönəldiyi qeyd olunub.
Qurum “Telegram” kanalında bildirib ki, hücum zamanı 142 PUA, 32 qanadlı raketdən 31-i və iki ballistik raket məhv edilib.
Ukrayna Hərbi Hava Qüvvələri hücum zamanı buraxılan ballistik raketlərin ümumi sayını açıqlamayıb.
Polşanın şərqində yerləşən Lublin hava limanı Rusiyanın Ukraynaya zərbələri ilə əlaqədar Polşa ordusunun keçirdiyi qabaqlayıcı əməliyyatlar səbəbindən dayandırılan uçuşları bərpa edib.
Polşa Hava Naviqasiya Xidməti (PANSA) bildirib ki, hava limanında uçuşlar bərpa olunub.
Polşa ordusu bildirib ki, Rusiyanın Ukraynaya endirdiyi zərbələrlə əlaqədar ölkənin hava məkanında qabaqlayıcı əməliyyatlar həyata keçirilib. Bu barədə Polşa ordusu “X” platformasında məlumat yayıb.
“Bu tədbirlər qabaqlayıcı xarakter daşıyır və hava məkanının təhlükəsizliyini təmin etməyə xidmət edir. Xüsusilə təhlükə altında olan bölgələrə yaxın ərazilər diqqət mərkəzində saxlanılır”, – açıqlamada bildirilib.
Polşa Hava Naviqasiya Xidmətinin məlumatına görə, Lublin hava limanında uçuşlar müvəqqəti dayandırılıb.
Rusiya Müdafiə Nazirliyi ölkə daxilində cinayət törədən hərbçilərə verilən birdəfəlik ödənişin bir hissəsinin geri alınmasını nəzərdə tutan təklif üzərində işləyir. Bu addım Ukraynaya qarşı müharibədə iştirak edən hərbçilər arasında məişət zorakılığı hallarının artması fonunda atılır.
Rusiya Ukraynada döyüşmək üçün ən azı bir illik müqavilə imzalayan hərbçilərə minimum 4 640 dollar məbləğində birdəfəlik ödəniş verir. Praktikada isə regiondan asılı olaraq bu məbləğ aylıq maaşla yanaşı, hər bir hərbçi üçün bir neçə milyon rubla çata bilər.
Sentyabrın 7-də dərc olunan qanun layihəsində bildirilir ki, təklif hərbçiləri qanunlara əməl etməyə təşviq etmək məqsədi daşıyır. Həbs cəzası nəzərdə tutmayan cinayətə görə təqsirli bilinən müqaviləli hərbçilər birdəfəlik ödənişin xidmət müddətinin qalan aylarına uyğun hesablanan hissəsini geri qaytarmalı olacaqlar.
Rusiya hərbçilərinin törətdiyi məişət zorakılığı ilə bağlı rəsmi statistikanı açıqlamır. Lakin müstəqil media qurumları hərbi məhkəmələrin məlumatlarına istinadən bildiriblər ki, 2022-ci ildə Ukraynaya qarşı müharibə başlayandan sonra qətllər də daxil olmaqla, yüzlərlə belə hal qeydə alınıb.
Ukraynanın Fövqəladə Hallar üzrə Dövlət Xidmətinin məlumatına görə, Rusiyanın gecə saatlarında Kiyevə endirdiyi zərbələr nəticəsində yaralananların sayı 10-a çatıb.
Qurum hücumun fəsadlarını əks etdirən fotolar da yayımlayıb.
Rusiya hücumundan sonra Kiyevdə baş verən yanğın. Kiyev, Ukrayna, 8 sentyabr 2026-cı il.
Rusiya hücumundan sonra Kiyevdə baş verən yanğın. Kiyev, Ukrayna, 8 sentyabr 2026-cı il.
Rusiya hücumundan sonra Kiyevdə baş verən yanğın. Kiyev, Ukrayna, 8 sentyabr 2026-cı il.
Rusiya ABŞ-nin Norveçdə raket sistemi yerləşdirməsini “sabitliyi pozan addım” adlandıraraq pisləyib.
Rusiya Xarici İşlər Nazirliyinin sözçüsü Mariya Zaxarova NATO-nu Rusiyanın daxili ərazilərinə zərbə endirmək imkanlarını artırmağa çalışmaqda ittiham edib.
Zaxarovanın sözlərinə görə, bu sistemlər uzaqmənzilli “Tomahawk” qanadlı raketlərinin buraxılması üçün istifadə oluna bilər. O bildirib ki, sistemlərin Norveçdə yerləşdirilməsi Rusiyanın Avropa hissəsinin, o cümlədən Moskvanın bu raketlərin zərbə məsafəsində qalması deməkdir.
“Vaşinqton və Osloda bu sistemlərin Norveçdə yerləşdirilməsi barədə qərar verənlər təəccüblənməməlidirlər ki, Rusiyanın cavab tədbirləri çərçivəsində ABŞ sistemlərinin yerləşdiyi məntəqələr, onların idarəetmə və nəzarət obyektləri, eləcə də bu sistemlərə xidmət edən infrastruktur Rusiyanın strateji çəkindirmə qüvvələrinin xüsusi diqqət mərkəzində olacaq”, – Zaxarova bildirib.
Rusiya Xarici İşlər Nazirliyinin sözçüsü Mariya Zaxarova. Moskva, Rusiya, 3 aprel 2026-cı il.
Rusiya qüvvələrinin Ukraynanın paytaxtı Kiyevə endirdiyi zərbələr nəticəsində iki nəfər ölüb, yeddi nəfər yaralanıb.
Bundan əvvəl Kiyev meri Vitali Kliçko altı nəfərin yaralandığını bildirmişdi.
Ukraynanın paytaxtı Kiyevin meri Vitali Kliçko “Telegram” kanalında bildirib ki, Rusiya qüvvələrinin gecə saatlarında Kiyevə endirdiyi zərbələr nəticəsində azı altı nəfər xəsarət alıb. Onlardan üçü xəstəxanaya yerləşdirilib.
Kliçkonun sözlərinə görə, hücum zamanı paytaxtın cənub-qərbindəki Holosiivski rayonunda yerləşən təhsil müəssisələrindən birində yanğın baş verib. Kiyevin digər ərazilərində də yanğınlar qeydə alınıb.
Bu arada Saratov vilayətinin qubernatoru Roman Busargin “Max” sosial şəbəkəsində bildirib ki, Ukrayna dronlarının Rusiyanın cənub-qərbində yerləşən vilayətə hücumu nəticəsində mülki infrastruktura ziyan dəyib və itkilər var.
Hindistan polisi Yeni Dehlidə seçici siyahılarındakı mübahisəli dəyişikliklərə görə baş seçki komissarı Qyaneş Kumarın istefasını tələb edən 2 mindən...
ABŞ Prezidenti Donald Trampın Rusiya dizelinə tətbiq olunan sanksiyaları yumşaltmaq qərarından bir gün sonra Rusiyanın Zaporojye şəhərinə endirdiyi...
“Anthropic” şirkəti süni intellekt sistemlərindən istifadə qaydalarını yeniləyib. Yeni qaydalara əsasən, “Claude” modeli davamlı təhqir və qəddar...
MDB ölkələrinin liderləri əhalinin siyahıyaalınması ilə bağlı qərar qəbul ediblər. BELTA-nın məlumatına görə, sənəddə siyahıyaalınmanın 2030-cu ilə mümkün qədər yaxın tarixlərdə keçirilməsi təklif olunur. Qərar oktyabrın 9-da Türkmənistanda keçirilən iclasda qəbul edilib.
Səudiyyə Ərəbistanının paytaxtı Ər-Riyaddakı Kral Xalid Beynəlxalq Hava Limanı oktyabrın 10-da hücuma məruz qalıb. Səudiyyə Ərəbistanının mülki aviasiya qurumu hadisə nəticəsində bir neçə nəfərin yaralandığını və hava limanının fəaliyyətinin müvəqqəti dayandırıldığını təsdiqləyib.
Turizm ənənəvi olaraq iqtisadiyyatın qeyri-sabitliyə ən həssas sahələrindən biridir.
ABŞ İranın xam neftinin, neft məhsullarının və neft-kimya məhsullarının xarici bazarlara daşınması ilə əlaqəli 17 gəmiyə və bir sıra şirkətə qarşı yeni sanksiyalar tətbiq edib.
Ukrayna Prezidenti Volodimir Zelenski Rusiyanın hücumları nəticəsində iki gün ərzində 70-dən çox insanın həlak olmasından sonra ABŞ-ni sərt tənqid edib. O bildirib ki, Vaşinqton Rusiyanın hücumlarının qarşısını almaq üçün Ukraynaya kifayət qədər yardım göstərmir.
Hindistan polisi Yeni Dehlidə seçici siyahılarındakı mübahisəli dəyişikliklərə görə baş seçki komissarı Qyaneş Kumarın istefasını tələb edən 2 mindən çox aksiya iştirakçısını saxlayıb.
ABŞ Prezidenti Donald Trampın Rusiya dizelinə tətbiq olunan sanksiyaları yumşaltmaq qərarından bir gün sonra Rusiyanın Zaporojye şəhərinə endirdiyi hava zərbəsi nəticəsində 3-ü uşaq olmaqla ən azı 17 nəfər həlak olub.
Ukrayna Prezidenti Volodimir Zelenski ABŞ Prezidenti Donald Trampın Rusiyanın dizel yanacağı ixracına tətbiq olunan sanksiyaları yumşaltmaq qərarını tənqid edib.
Oktyabrın 9-da Sinqapurda hava keyfiyyəti kəskin pisləşib. IQAir platformasının məlumatına görə, yerli vaxtla saat 08:00-da havanın keyfiyyəti indeksi 205-ə çatıb. Bu göstərici sağlamlıq üçün çox zərərli hesab olunur.
Birləşmiş Millətlər Təşkilatı (BMT) Ukraynada mülki əhaliyə hücumların kəskin artmasını pisləyib.
AnewZ tətbiqini “Play Store” və “App Store”dan yükləyə bilərsiniz.
Bu mövzu haqqında fikriniz nədir?
İlk şərhi siz yazın