Meksika və ABŞ seçkilərədək ticarət sazişini yekunlaşdırmağa çalışırlar

Müzakirələrin gedişindən xəbərdar olan altı mənbə “Reuters” agentliyinə bildirib ki, Meksika və ABŞ noyabrın 3-də keçiriləcək aralıq seçkilərədək ticarət sazişini yekunlaşdırmağa çalışırlar.

Danışıqlar müvəqqəti razılaşma üzərində aparılır. Bu razılaşma ABŞ-nin Meksikaya tətbiq etdiyi bəzi tariflərin yumşaldılmasını nəzərdə tutur. Bunun müqabilində Meksikanın avtomobil istehsalında istifadə edilən komponentlər və Çin sərmayələri ilə bağlı müəyyən öhdəlikləri götürməsi gözlənilir.

Danışıqlar üçün rəsmi son tarix müəyyən edilməyib. Lakin hər iki ölkənin rəsmiləri seçkilərdən əvvəl razılığın əldə olunmasını siyasi baxımdan faydalı hesab edirlər.

Meksikanın İqtisadiyyat Nazirliyi danışıqları davam etdirməyə hazır olduğunu, lakin konkret müddətin müəyyənləşdirilmədiyini bildirib. ABŞ Ticarət Nümayəndəliyi və Ağ Ev şərh sorğularına cavab verməyiblər.

ABŞ ilə Kanada arasında danışıqların ötən ay nəticəsiz başa çatması Meksika ilə razılaşmanın əldə olunmasını daha da aktuallaşdırıb. İki ölkə arasında tarif mübahisəsi davam edir. Meksika isə Vaşinqtonla qarşıdurmadan yayınmağa və əməkdaşlıq yolu ilə güzəştlər əldə etməyə çalışır.

Meksika ixracının 80 faizindən çoxu ABŞ-yə göndərilir. Danışıqlar bu həftə ABŞ-nin ticarət naziri Hovard Latniklə Meksika Prezidenti Klaudiya Şeynbaum arasında keçirilən onlayn görüşdən sonra sürətlənib.

Tərəflər ABŞ–Meksika–Kanada Sazişi (USMCA) ilə bağlı daha geniş məsələlərin həlli üzərində iş aparıldığı bir vaxtda müvəqqəti ikitərəfli razılaşma əldə etməyə çalışırlar.

Danışıqlarda əsas maneələrdən biri ABŞ-nin polad, alüminium, avtomobil və avtomobil hissələrinə tətbiq etdiyi tariflərdir. Meksika və Kanadadan idxal olunan polad üçün tarif 50 faiz, avtomobillər üçün isə 25 faizdir.

Bir neçə avtomobil istehsalçısı hesab edir ki, Vaşinqton Meksikaya daha əvvəl Kanada ilə müzakirə etdiyi modelə bənzər təklif verə bilər. Bu modelə əsasən, avtomobil idxalına tətbiq olunan tarif 15 faizə endirilə, ABŞ mənşəli komponentlərin payından asılı olaraq isə təxminən 7 faizə düşə bilər.

• Trampın 5 000 dollar vədi respublikaçıların Konqresə nəzarəti saxlamasından asılıdır

Kopyalandı